1 ଏପ୍‌ ପର୍‌ମେସ୍ୱର୍‌ତି ଇଞ୍ଜ ହାନିୱେଡ଼ାଲିଂ ଜାଗ୍ରତ୍‌ତ ଜାର୍‌ କାଲ୍‌ ଇଟାଟ୍‌; ଇନାକିଦେଂକି ମୁର୍କିୟାର୍‌ ପୁଜା କିନି ବାଟା ୱେନାକା ହାର୍‌; ଲାଗିଂ ହେୱାର୍‌ ବାନ୍ୟା କାମାୟ୍‌ କିନାର୍‌ ଇଞ୍ଜି ପୁନୁର୍‌ । 2 ଏପ୍‌ ଜାର୍ ୱେଇଦ ବାନ୍ୟାଚିନ୍ତା ବାବିକିମାଟ୍‌, ଆରି ମାପ୍ରୁତି ତର୍‌ଦ ଇନାକାପା ରାଣ୍‌ କିମାଟ୍‌, ଇନାକିଦେଂକି ପର୍‌ମେସ୍ୱର୍‌ ସାର୍ଗେତ ମାନାନ୍‌ ଆରି ଏପେଙ୍ଗ୍‌ ପୁର୍ତିତ ମାନାଦେର୍‌; ଇଦାଂକାଜିଂ ମିଦାଂ ଅଲପ୍‌ କାତା ଇନି ଆଗେ ଚିନ୍ତା କିୟାଟ୍‌ । 3 ଇନାକିଦେଂକି ବେସି କାମାୟ୍‌ନି ଅଲପ୍‌ କ୍ଡେଞ୍ଜ୍‌କଣ୍‌ ଆନାତ୍‌; ଆରେ କାତାନି ଅଲପ୍‌ ମୁର୍କିୟାନି କାଟ୍‌ ଆନାତ୍‌ । 4 ଏପ୍‌ ପର୍‌ମେସ୍ୱର୍‌ ଲାଗାୟ୍‌ ମାନ୍‌ସି କିତିସ୍‌, ହେଦାଂ ଉଲ୍‌ଟି ହିଦେଂ ମାଲାୟ୍‌ କିମାଟ୍‌; ଇନାକିଦେଂକି ମୁର୍କିୟାର୍ ତାକେ ହେୱାନ୍ତି ସାରି ଆକାୟ୍‌; ଏପ୍‌ ଇନାକା ମାନ୍‌ସି କିନାଦେର୍‌, ହେଦାଂ ଲେଉଟାଇ ହିଆଟ୍‌ । 5 ମାନ୍‌ସି କିଜ଼ି ଉଲ୍‌ଟି କିୱି ବାଟା ମି ମାନ୍‌ସି କିୱାକା ହାର୍‌ । 6 ଏପ୍‌ ଗାଗାଡ଼୍‌ତିଂ ପାପ୍‌ କିନି କାଜିଂ ମି ମୁମ୍‌ଦିଂ ହିମାଟ୍‌; ଇଦାଂ ବୁଲ୍‌ ଆତାତ୍‌ ଇଞ୍ଜି ଦୁତ୍‌ ମୁମ୍‌ଦ ଇନ୍‌ମାଟ୍‌; ଇନାକିଦେଂ ପର୍‌ମେସ୍ୱର୍‌ ମି କାଟ୍‌ତ ରିସାଜ଼ି ମି କେଇନି କାମାୟ୍‌ ନାସ୍‌ କିଦ୍‌ନାନ୍‌ ? 7 ଇନାକିଦେଂକି କ୍ଡେଞ୍ଜ୍‌କଣ୍‌ ଆରି ବେକାର୍‌ନିକା ବେସି ଆରି ବେସି କାତା ହୁଦାଂ ଏଲେଙ୍ଗ୍‌ ଗିଟାନାତ୍‌; ମତର୍‌ ଏପ୍‌ ପର୍‌ମେସ୍ୱର୍‌ତିଂ ପାଣ୍ଡ୍ରାଡୁ ।

8 ଏଚେକାଡ଼୍‌ଦ ଏପ୍‌ ଇମ୍‌ଣାକାପା ରାଜିତ ଅର୍କିତ୍‌ କାଜିଂ ଗଣ୍ଡ୍‌ଗଲ୍‌, ଅନିୟାଲାକେ ବିଚାର୍‌ ଆରି ନିୟାୟ୍‌ ବିନେ ଆନାକା ହୁଡ଼୍‌ନାଦେର୍‌, ତେବେ ହେ ବିସ୍ରେ କାବା ଆମାଟ୍‌; ଇନାକିଦେଂକି ଉଚ୍‌ ବାଟା ରୱାନ୍‌ ଉଚ୍‌ ହୁଡ଼୍‌ନାନ୍‌; ଆରେ, ହେୱାର୍‌ତାଂ ଉଚ୍‌ ମାନାନ୍‌ । 9 ଆରେ, ପୁର୍ତିନି ପାଡ଼୍‌ ୱିଜ଼ାର୍‌ କାଜିଂ; ବୁଇଁତ ତାସ୍‌କିନି କାଜିଂ ରାଜା ଲାବ୍‌ ପାୟାନାନ୍‌ । 10 ଇମ୍‌ଣି ମାନାୟ୍‌ ଟାକାଂ ୱାରିୟାନାନ୍‌, ହେୱାନ୍‌ ଟାକାଂତ ସାରି ଆଉନ୍‌; କି ଇମ୍‌ଣି ମାନାୟ୍‌ ମାଜାନ୍‌ ଆଦେଂ ୱାର୍‌ୟାନାନ୍‌, ହେୱାନ୍‌ ଆୟିସ୍‌ ବାଡାୟ୍‌ କିଦେଂ ସାରି ଆଉନ୍‌; ଇଦାଂ ନେ ବେକାର୍‌ । 11 ଦନ୍‌ ବାଡାତିସ୍‌, ହେବେ କସ୍ଟକିନାକାର୍‌ ବାଡାନାର୍‌; ଲାଗିଂ ଜାର୍‌ କାଣ୍‌ଗାତ ହୁଡ଼୍‌ନାକା ପିସ୍ତି ହେବେନି ଆଦିକାର୍‌ତି ଇନା ଲାବ୍‌ ? 12 ଆଡ଼ିଏନ୍‌ କାମାୟ୍‌ କିଜ଼ି ଜିନି ଲଗୁ ଅଲପ୍‌ କି ବେସି ଚିଚିସ୍‌ ପା ହେୱାନ୍ତି ହୁଚ୍‌କାଣ୍‌କୁ ସୁକ୍‌ନିକା ଆନାତ୍‌; ମତର୍‌ ମାଜାନ୍ତି ପୁରା ହେୱାନିଂ ହୁଚ୍‌କାଣ୍‌କୁ ହିଉକ୍‌ । 13 ଦନ୍‌ ଆଦିକାର୍‌ ହୁଦାଂ ଜାର୍‌ କାରାପ୍‌ କାଜିଂ ଦନ୍‌ ଇଟ୍ୟାନାତ୍‌, ଇ ରଞ୍ଜାଙ୍ଗ୍‌ ନନାକା ଲାକେ କସ୍ଟ ଆନ୍‌ ୱେଡ଼ା ତାରେନ୍‌ ହୁଡ଼୍‌ତାଂନା; 14 ଆରେ, ଗଟ୍‌ଣା ହୁଦାଂ ହେସବୁ ଦନ୍‌ ଜିରାନାତ୍‌; ଆରେ ହେୱାନ୍ ମେହି ଚଞ୍ଚିସ୍‌, ହେୱାନ୍ତି କେଇଦ ଇନାକାପା ମାନ୍‌ଗୁତ୍‌ । 15 ହେୱାନ୍‌ ଜାର୍‌ ତାଡ଼ିପଟତାଂ ଇନେସ୍‌ ୱାତାନ୍‌, ହେ ଲାକେ ନାଗ୍‌ଡ଼ାଜ଼ି ୱାନି ଲାକେ ମାସ୍‌ନାନ୍‌, ଆରେ ହେୱାନ୍‌ ଜାର୍‌ କସ୍ଟ କାଜିଂ ଜାର୍‌ କେଇଦ ଇନାକା ପିଣ୍‌ଜି ଅଦେଂ ଆଡ୍‌ନାନ୍‌, ଏଲେଙ୍ଗ୍‌ ଇନାକା ରଚେ ଅଦେଂ ଆଡୁନ୍‌ । 16 ଆରେ, ହେୱାନ୍‌ ଇନେସ୍‌ ୱାତାନ୍‌, ସବୁତାକେ ଜେ ହେଲାକେ ହାନାନ୍‌, ଇଦାଂ ନେ ନନାକା ଲାକେ କସ୍ଟ; ଲାଗିଂ ଡ଼ୁଇ କାଜିଂ ହେୱାନ୍‌ କସ୍ଟ କିତାନ୍‌, ହେୱାନ୍ତି ଇନାକା ଲାବ୍‌ ? 17 ଆରେ, ହେୱାନ୍‌ ହାନିପାତେକ୍‌ ମାଜ୍‌ଗାତ କାଦି କିନାନ୍‌, ଆରେ ହେୱାନ୍‌ ବେସି ରିସା ଆନାନ୍‌, ଆରେ ହେୱାନିଂ ଦୁକ୍ ଆରି ଚିନ୍ତା ଗିଟାନାତ୍‌ । 18 ହୁଡ଼ାଟ୍‌, ତିନାକା ଆରି ଉଣାକା କିନାକା ଆରି ପର୍‌ମେସ୍ୱର୍‌ତି ହିତ୍‌ତି ବେସିଆଇଁସ୍‌ ବିତ୍ରେ ମାନାୟ୍‌ ୱେଡ଼ା ତାରେନ୍‌ ଇମ୍‌ଣାକା ଇମ୍‌ଣାକା କସ୍ଟ କିନାନ୍‌, ହେ ସବୁ କସ୍ଟତ ସୁକ୍‌ବଗ୍‌ କିଦେଂ, ଇଦାଂ ନେ ହେୱାନ୍ତି ପାକ୍ୟାତ ହାର୍‌ ଆରି ହଲ୍‌ନାକା ଇଞ୍ଜି ଆନ୍‌ ହୁଡ଼୍‌ତାଂନା; ଇନାକିଦେଂକି ଇଦାଂ ନେ ହେୱାନ୍ତି ବାଗ୍‌ । 19 ଆରେ, ପର୍‌ମେସ୍ୱର୍‌ ଇମ୍‌ଣାକାପା ମାନାୟ୍‌ତିଂ ଦନ୍‌ ସମ୍ପ୍‌ତି ଦାନ୍‌ କିଜ଼ି ହେଦାଂ ବଗ୍‌ କିଦେଂ ଜାର୍‌ ବାଗ୍ ଇଡ୍‌ଦେଂ ଆରି ଜାର୍ କସ୍ଟତ ୱାରି କିଦେଂ ସାକ୍ତି ହିତିସ୍‌, ଇଦାଂ ନେ ପର୍‌ମେସ୍ୱର୍‌ତି ଇନାମ୍‌ । 20 ଇନାକିଦେଂକି ହେୱାନ୍‌ ଜାର୍‌ ଆଇଁସ୍‌ନି ଦିନ୍‌ସବୁ ଆଦିକ୍‌ ଏତୁ କିଉନ୍‌; ଇନାକିଦେଂକି ପର୍‌ମେସ୍ୱର୍‌ ହେୱାନ୍ତି ମାନ୍ତ ୱାରି ଉପ୍‌ଜାୟ୍‌ କିଜ଼ି ହେୱାନିଂ ଉତର୍‌ ହିନାନ୍‌ ।