1 ୱେଡ଼ା ତାରେନ୍‌ ଆନ୍‌ ରଞ୍ଜାଙ୍ଗ୍‌ ଦୁକ୍‌ନି ବିସ୍ରେ ହୁଡ଼୍‌ତାଂନା, ଆରେ ହେଦାଂ ମାନାୟ୍‌ତି ପାକ୍ୟାତ ବଜ୍‌; 2 ପର୍‌ମେସ୍ୱର୍‌ ଇନେ ଇନେରିଂ ଏଚେକ୍‌ ଦନ୍‌, ସମ୍ପ୍‌ତି ଆରି ଗାଜା ସନ୍‌ମାନ୍‌ ହିନାନ୍‌ ଜେ, ହେୱାନ୍ତି ମାନ୍‌ନି ଇଚା ପୁରା କିଦେଂ ଇମ୍‌ଣି ବିସ୍ରେ ପା ଅବାବ୍‌ ମାନୁତ୍‌, ଆତିସ୍‌ପା ହେଦାଂ ବଗ୍‌ କିଦେଂ ପର୍‌ମେସ୍ୱର୍‌ ହେୱାନିଂ ପାଣ୍‌ ହିଉନ୍‌, ମତର୍‌ ବିନ୍‌ ଲଗୁ ହେଦାଂ ବଗ୍‌ କିନାନ୍‌; ଇଦାଂ ବେକାର୍‌ ଆରି ବାନ୍ୟାନି ରଗ୍‌ ଲାକେ । 3 ଏଚେକାଡ଼୍‌ଦ ଇମ୍‌ଣି ମାନାୟ୍‌ ସଏ ହିମ୍‌ଣାଂ ଗାଟାଜ଼ି ବେସି ବାର୍ହୁ ଜିଜ଼ି ଗାଜାଜିବୁନ୍‌ ଆନାନ୍‌, ମତର୍‌ ହେୱାନ୍ତି ପାରାଣ୍‌ ଏଚେକାଡ଼୍‌ଦ ସୁକ୍‌ତ ସାରି ଆୱିତିସ୍‌, ଆରେ ଏଚେକାଡ଼୍‌ଦ ହେୱାନିଂ ମୁଚ୍‌ୱିତିସ୍‌, ତେବେ ଆନ୍‌ ଇନାଙ୍ଗା, ଜଲମ୍ ଆନି ବାଟା ହାନାକା ହାର୍‌; 4 ଇନାକିଦେଂକି ହେଦାଂ ହାତି ବାର୍‌ତି କାଡ୍‌ଦେ ଉକ୍‌ଡ଼଼ାନିକଦା ଲାକେ ୱାନାତ୍‌ ଆରି ମାଜ୍‌ଗାତ ହାନାତ୍‌, ଆରେ ହେବେନି ତର୍‌ ମାଜ୍‌ଗାତ ମେହାନାତ୍‌; 5 ଆରେ, ଇ କାଡ଼ଦେ ୱେଡ଼ା ହୁଡ଼୍‌ୱାତାତ୍‌ନା କି ପନ୍‌ୱାତାତ୍‌ନା; ଆତିସ୍ ଇ ହାଜ଼ି ଉବ୍‌ଜାତି ହିମ୍‌ଣା ହେୱାନ୍ ମାନାୟ୍‌ ବାଟା ଆଦିକ୍ ଜମ୍‌ନାନ୍‌ । 6 ଆରେ, ହେ ମାନାୟ୍‌ ଇମ୍‌ଣାକାପା ମଙ୍ଗଲ୍‌ ବଗ୍‌ କିୱାଦାଂ ରି ହାଜାର୍‌ ବାର୍ହୁ ବାଚାତିସ୍‌ ପା ୱିଜ଼ାର୍‌ କି ଇ ବାହାତ ହାଲୁର୍‌ ? 7 ମାନାୟ୍‌ତି ସବୁ କସ୍ଟ ତା ୱେଇ କାଜିଂ, ଆତିସ୍ପା ଚିଚିସ୍ ନାସ୍‌କିତ ପୁରା ଆଉତ୍‌ । 8 ଲାଗିଂ ମୁର୍କିୟା ବାଟା ଗିୟାନିତି ଇନାକା ଲାବ୍‌ ? ଆରେ, ଜିତାକାର୍‌ତି ମୁମ୍‌ଦ ଚାଲାଦେଂ ପୁନାନ୍‌ ଇମ୍‌ଣି ଅର୍କିତ୍‌ ଲଗୁ, ହେୱାନ୍ତି ଇନାକା ଲାବ୍‌ ? 9 ମାନ୍ତି ଆସ୍ୟା ବାଟା ସାରି ବଗ୍ ହାର୍‌; ଇଦାଂ ନେ ବେକାର୍‌ ଆରି ଡ଼ୁଇନି ପାଚେହାନାକା ମତର୍‌ । 10 ଇନାକା ଆତାତ୍‌ନା, ବେସି କାଡ଼୍‌ ଆତାତ୍‌ ହେବେନି ତର୍‌ ହିଆଜ଼ି ମାଚାତ୍‌, ଆରେ ହେ ମାନାୟ୍‌ ଇଞ୍ଜି ପୁନା; ଆରେ, ହେୱାନ୍ ଜାର୍‌ତାଂ ସାକ୍ତିଲାହାଂ; ବିରଦ୍‌ କିଦେଂ ଆଡୁନ୍‌ । 11 ବେକାର୍‌ନିକା ବାଡାୟ୍‌ କିନାକା ବେସି ମାନାତ୍‌, ହେବେ ମାନାୟ୍‌ତି ଇନାକା ଲାବ୍‌ ? 12 ଇନାକିଦେଂକି ମାନାୟ୍‌ ଡ଼ିଗା ଲାକେ ଜାର୍ତି ଇମ୍‌ଣି ବେକାର୍‌ ଜିବୁନ୍‌ନି ଦିନ୍‌ସବୁ ଚାଲାନାଦେରା, ହେ ଜିବୁନ୍‌ କାଡ଼୍‌ତ ତାଦାଂ ମଙ୍ଗଲ୍‌ ଇନାକା, ଇଦାଂ ଇନେର୍‌ ପୁନାର୍‌ ? ଆରେ, ମାନାୟ୍‌ତି ହାତିସ୍‌ ୱେଡ଼ା ତାରେନ୍‌ ଇନାକା ଗିଟାନାତ୍‌, ଇଦାଂ ଇନେର୍‌ ହେୱାନିଂ ୱେଚ୍‌ଚେଂ ଆଡ୍‌ନାର୍‌ ?