1 ବେସିମଲ୍‌ ଚିକାଣ୍‌ ବାଟା ହାର୍ଦି ତର୍‌ ହାର୍‌ ଆରି ଜଲମ୍‌ ଦିନ୍‌ ବାଟା ହାକି ଦିନ୍‌ ହାର୍‌ । 2 ତିନି ଇଞ୍ଜ ହାନିତାଂ ଆଡ଼୍‌ବିନି ଇଞ୍ଜ ହାନାକା ହାର୍‌; ଇନାକିଦେଂକି ହେଦାଂ ସବୁ ମାନାୟ୍‌ତି ହାରିହାରା ଚାଲାନାକା ଆରି ଜିତି ଲଗୁ ହେବେ ମାନ୍‌ଦିଆନ୍‌ କିନାନ୍‌ । 3 ଗ୍ଡାଇନିତାଂ ଦୁକ୍‌ ହାର୍‌; ଇନାକିଦେଂକି ମୁମ୍‌ନି ରାତ୍‌ନାକା ହୁଦାଂ ମାନ୍‌ ନିର୍ମଲ୍‌ ଆନାତ୍‌ । 4 ଗିଆନିର୍ତି ମାନ୍‌ ଦୁକ୍‌ ଇଞ୍ଜ ମାନ୍‌ଗାନାତ୍‌, ମତର୍‌ ମୁର୍କିୟାର୍‌ତି ମାନ୍‌ ୱାରିନି ଇଞ୍ଜ ମାନ୍‌ଗାନାତ୍‌ । 5 ମୁର୍କିୟାର୍‌ତି କେର୍‌କଣ୍‌ ୱେନି ବାଟା ଗିଆନିର୍ତି ଗଡ଼୍‌ ୱେନାକା ହାର୍‌ । 6 ଇନାକିଦେଂକି ଟାଙ୍ଗାନି ତାରେନ୍‌ ଜଲାଜ଼଼ିମା କୁଟିନି ରଣରଣ ଗାର୍‌ଜେନ୍‌ ଇନେସ୍‌, ମୁର୍କିୟାତି ଗ୍ଡାଇନାକା ହେଲାକେ; ଇଦାଂ ନେ ବେକାର୍‌ । 7 ନିଚୟ୍‌ ଅନିୟାଇ ଦନ୍‌ ଅନାକା ଗିଆନି ମାନାୟ୍‌ତିଂ ବକ୍‌ୱା କିନାତ୍‌ ଆରି ଲାଞ୍ଚ୍‌ ବୁଦି ନସ୍ଟ କିନାତ୍‌ । 8 କାମାୟ୍‌ ହାଂନି ବାଟା ହେବେନି ୱିହ୍‌ନାକା ହାର୍‌; ଆରେ, ମାନ୍ତିନି ଗାର୍ବିୟା ଆନି ବାଟା ମାନ୍ତ ସାନ୍ତି ଆନାକା ହାର୍‌ । 9 ରିସା ଆଦେଂ ଜାର୍‌ ମାନ୍ତ ତିର୍‌କାଡ଼୍‌ ଆମାଟ୍‌ ଇନାକିଦେଂକି ମୁର୍କିୟାର୍‌ତି ମାନ୍ତ ରିସା ବାହା କିନାତ୍‌ । 10 ନଂନି କାଡ଼୍‌ ବାଟା ଆଗେନି କାଡ଼୍‌ ହାର୍‌ ମାନାକା କାରଣ୍‌ ଇନାକା, ଇଦାଂ ଇନ୍‌ମାଟ୍‌, ଇନାକିଦେଂକି ଏପ୍‌ ଇ ବିସ୍ରେ ଗିଆନ୍‌ନି ପର୍‌ସନ୍‌ କିଉଦେରା । 11 ଗିୟାନ୍‌ ଆକର୍ତି ଆଦିକାର୍‌ନି ଲାକେ ହାର୍‌; ଆରେ, ୱେଡ଼ାହୁଡ଼୍‌ନି ମାନାୟାର୍‌ତି କାଜିଂ ହେଦାଂ ବେସି ମୁଡ଼୍‌ଦାକା । 12 ଇନାକିଦେଂକି ଡାବୁଙ୍ଗ୍‌ ଇନେସ୍‌ ଆହ୍‌ର ଲାକେ, ଗିୟାନ୍‌ ନେ ହେଲାକେ ଆହ୍‌ର ଲାକେ ଆନାତ୍‌; ମତର୍‌ ବିଦ୍ୟାତ ମୁଡ଼୍‌ଦା ଇଦାଂ ଜେ, ଗିଆନ୍‌ ଜାର୍‌ ଆଦିକାର୍‌ନି ଜିବୁନ୍‌ ରାକ୍ୟା କିନାତ୍‌ । 13 ପର୍‌ମେସ୍ୱର୍‌ତି କାମାୟ୍‌ ବାବି କିୟାଟ୍‌; ଇନାକିଦେଂକି ହେୱାନ୍‌ ଇନାକା ବାଂଟା କିତାନ୍‌ନା, ଇନେର୍‌ ହେଦାଂ ହାଣ୍‌କୁ କିଦେଂ ଆଡ୍‌ନାନ୍‌ ? 14 ସୁକ୍‌ ୱେଡ଼ାଲିଂ ୱାରି ଆଡୁ ଆରି ଦୁକ୍‌ ୱେଡ଼ାଲିଂ ବାବି କିୟାଟ୍‌; ମାନାୟ୍‌ତିଂ ୱାନିଦିନ୍ତ ଇନାକା ଗିଟାନାତ୍‌, ହେଦାଂ ହେୱାନ୍‌ ଇନେସ୍‌ ପୁଞ୍ଜେଙ୍ଗ୍‌ ଆଡୁନ୍‌, ଇଦାଂକାଜିଂ ପର୍‌ମେସ୍ୱର୍‌ ସୁକ୍‌ତିଂ ଆରି ଦୁକ୍‌ତିଂ ଲାଗେ ଲାଗେ ଇଡ୍‌ତାନ୍ନା । 15 ଆନ୍‌ ନା ଆହାର୍‌ ୱେଡ଼ାଲିଂ ଇସବୁ ହୁଡ଼୍‌ତାଂନା; ଦାର୍ମି ଲଗୁ ଇନା ଇନାୱେଡ଼ାଂ ଜାର୍‌ ଦାର୍ମିତ ନସ୍ଟ ଆନାନ୍‌, ଆରେ ଦୁସ୍ଟ ଲଗୁ ଜାର୍‌ ବାନ୍ୟାକାମାୟ୍‌ତ ଲାମାଜିବୁନ୍‌ ଆନାନ୍‌ । 16 ବେସି ଦାର୍ମି ଆମାଟ୍‌; କିବା ଜାର୍ତିଂ ବେସି ଗିଆନି ଚଚ୍‌ମାଟ୍‌; ଇନାକିଦେଂ ଏପ୍‌ ଜାର୍ତିଂ ନାସ୍‌ କିନାଦେର୍‌ ? 17 ଏପ୍‌ ବେସି ଦୁସ୍ଟ ଆମାଟ୍‌, କିବା ବକ୍‌ୱା ଆମାଟ୍‌; ଜାର୍‌ କାମାୟ୍ ୱାୱି ଆଗେ ଇନାକିଦେଂ ହାନାଦେର୍‌ ? 18 ଇଦାଂ ଆସ୍ତି ଇଡ୍‌ଦେଂ ପା ହେୱାନ୍‌ତାଂ କେଇଦାଂ ଉନ୍‌ନ୍ଦି ଅୱାକା ହାର୍‌; ଇନାକିଦେଂକି ଇନେନ୍‌ ପର୍‌ମେସ୍ୱର୍‌ତିଂ ପାଣ୍ଡ୍ରାନାନ୍‌, ହେୱାନ୍‌ ଇସବୁତାଂ ଜିଣାନାନ୍‌ । 19 ଗିଆନି ଲଗୁ କାଜିଂ ଗାଡ଼୍‌ନି ଦସ୍‌ ସାସନ୍‌କାର୍‌ୟା ବାଟା ରୱାନ୍ ଗିୟାନ୍‌ ବେସି ବାଡ଼୍‌କାସ୍‌ ଲାକେ ଆନାତ୍‌ । 20 ପାପ୍‌ କିୱାଦାଂ ହାର୍‌ କାମାୟ୍‌ କିନାନ୍‌, ଏଲେଂ ମାନାୟ୍‌ ଦାର୍ମି ନିଚୟ୍‌ ପୁର୍ତିତ ହିଲୁନ୍‌ । 21 ଏଚେକ୍‌ କାତା ଇନ୍ୟାନାତ୍‌, ହେସବୁତ ମାନ୍‌ଦିଆନ୍‌ କିମାଟ୍‌; କିତିସ୍‌ ଏଚେକାଡ଼୍‌ଦ ମି ଆଡ଼୍‌ୟାର୍‌ ମିଂ ସାଇପ୍‌ ହିଦ୍‌ନାକା ଏପ୍‌ ୱେନାଦେର୍‌; 22 ଇନାକିଦେଂକି ମି ମାନ୍‌ ପୁନାତ୍‌ ଜେ, ଏପ୍‌ ପା ବିନ୍‌ନିକାର୍‌ରିଂ ହେଲାକେ ବାର୍‌ବାର୍‌ ସାଇପ୍‌ ହିତାଦେର୍‌ନା । 23 ଆନ୍‌ ଗିୟାନ୍‌ ହୁଦାଂ ଇସବୁ ପରିକ୍ୟା କିତାଂନା; ଆନ୍‌ ଇଚାଙ୍ଗ୍‌, ଆନ୍‌ ଗିଆନି ଆନାଂ; ମତର୍‌ ହେଦାଂ ନାତାଂ ବେସି ଦେହା ମାଚାତ୍‌ । 24 ଇନାକା ମାନାତ୍‌, ହେଦାଂ ଦେହା ମାନାତ୍‌ ଆରି ବେସି ଡେଙ୍ଗା; ହେଦାଂ ଇନେର୍‌ ଗାଟାନାର୍‌ ? 25 ଗିୟାନ୍‌ ଆରି ସବୁ ବିସ୍ରେନିକା ଡ଼ୁକ୍ତିକାତା ପୁଞ୍ଜେଙ୍ଗ୍‌, ଆରେ ଦୁସ୍ଟନିକା ଜେ ନିର୍ବୁଦିଆ ଆରି ମୁର୍କିଆ ଜେ ବାୟାଲାକେ, ଇଦାଂ ପୁଞ୍ଜେଙ୍ଗ୍‌ ଆନ୍‌ ମାସ୍ତାଙ୍ଗ୍‌ ଆରି ନା ମାନ୍‌ ହେଦାଂ ଆନ୍‌ମାନ୍‌ ଆରି ଡେକ୍ତେଙ୍ଗ୍‌ ଲାଗାତାତ୍‌ । 26 ଆରେ, ଆନ୍‌ ହୁଡ଼୍‌ନାଙ୍ଗା ଜେ, ଇମ୍‌ଣି କଗ୍‌ଲେତି ମାନ୍‌ ଡ଼ୁକା ଆରି ଜାଲ୍ ଲାକେ ଆରି କେଇ ଗାଚ୍‌ଚି ଲାକେ, ହେୱାନ୍‌ ହାକି ବାଟା ବେସି କେନାକା; ଇନେନ୍‌ ପର୍‌ମେସ୍ୱର୍‌ତିଂ ସାରି କିନାନ୍‌, ହେୱାନ୍‌ ତା ତାକେଣ୍ଡାଂ ରାକ୍ୟା ପାୟାନାନ୍‌; ମତର୍‌ ପାପ୍ୟା ତା ହୁଦାଂ ଆହ୍ୟାନାନ୍‌ । 27 ହିକ୍ୟାହିନାକାନ୍‌ ଇନାନା, ହୁଡ଼ାଟ୍‌, ଆନ୍‌ ଡ଼ୁକ୍ତିକାତା ପୁଞ୍ଜେଙ୍ଗ୍‌ ର ବିସ୍ରେତିଂ ଆରେରଞ୍ଜାଙ୍ଗ୍‌ ଲାହାଂ ଇଡ୍‌ଜି ଗାଟାତାଂନା; 28 ନା ପାରାଣ୍‌ ସବୁୱେଡ଼ାଂ ଡେକ୍‌ଚି ମାନାତ୍‌, ମତର୍‌ ଆନ୍‌ ହେଦାଂ ଗାଟାୱାତାଂନା; ହାଜାର୍‌ ବିତ୍ରେ ଆନ୍‌ ର ମାନାୟ୍‌ ଗାଟାତାଂନା; ମତର୍‌ ହେ ୱିଜ଼ାର୍‌ତି ବିତ୍ରେ ଆନ୍‌ ର କଗ୍‌ଲେ ଗାଟାୱାତାଂନା । 29 ହୁଡ଼ାଟ୍‌, ଆନ୍‌ ଏଚେକ୍‌ ମତର୍‌ ଗାଟାତାଂନା ଜେ, ପର୍‌ମେସ୍ୱର୍‌ ମାନାୟ୍‌ତିଂ ହୁଦାର୍‌ କିଜ଼ି ରଚ୍‌ଚାନ୍‌; ମତର୍‌ ହେୱାର୍‌ ବେସି ହପ୍‌ତେଂ ଡେକ୍‌ତାର୍‌ନା ।