1 आंय जेहें कोइत ख्रिस्ताआ होस सालोहो तेहेंज कोइत तुमू माआं होस साला.✝11:1 1 करिन्थ 4:16; फिलि 3:17

2 आंय तुमाआं वोडाय कोअहो, काहाके तुमू माआं गोठी कायम ओर कोअतेहे, आन आंय कोत मिक्यीही ते पद्दत वारुहूं पालन कोअतेहे. 3 पोन माआं इश्शा होय के तुमू ओं जांइत लेअहूं जोवे के, ख्रिस्त माट्योअ मुन्को होय, आन माटी बोईंइं मुन्को होय, देव ख्रिस्ताआ मुन्को होय. 4 हारेक माटी जो प्रार्थना कोअतामेहें नेत संदेश देतामेहें मुन्को टापेहे, तो सोताआ इज्जत नाहां कोअतू. 5 पोन जे बोईं मुन्को उगड़ाअलोज मिकीत प्रार्थना नेताहां भविश्यवाणी कोअहे, ते सोताआ मुन्काआ इज्जत नाहां कोअती, काहाके ते टालगी बोईंइं होस होय. 6 जर एखू बोईं मुन्को ने टापतीय, ताहां ते सिंग्ये कातरावीत लेअहूं जोवे; जर बोईंहीं टालगी कोइलोअ लाज आवतीय, ताहां ओढ़नी फांगुहूं जोवे. 7 पोन माटी तियाआ मुन्को ने टापुहूं जोवे, काहाके तो देवोअ साप आन महिमा होय; बोईं माट्योअ महिमा होय. 8 काहाके माटी बोईंप रोत नाहां ओवू, पोन बोईं माट्योप रोत ओवीही. 9 आन माटी बोईंइं कोअते नाहां बोणावयू, पोन बोईं माट्योअ काजे बोणावयीही.✝11:9 उत्प 2:18-23 10 तियाहा काजे देवदुतोंअ वाखरी बोईंही आधिकारोअ निशाणी तियीइ मुंडोपोअ मिकुहूं जोवे. 11 तेबी प्रभुमेहें बोईं बिगर माट्योअ कायनाहां, आन माटीइ बिगर बोईंइं कायनाहां. 12 काहाके जेहलोहो बोईं माट्योप रोत उब्जेहे, तेहलोज माटी बी बोईंप रोत उब्जेहे; पोन आखी गोठी देवोप रोत होय.

13 ओं तुमूज ठरवा के, बोईंहीं मुंड ने टापे तेहेंज देवोहो प्रार्थना कोइलो ओं होबा देहे के? 14 माटी सिंग्ये वादाड़े ए लाज आवे एहलीही गोठ होय, ओं निसर्ग जाआं हिकाड़ेहे. 15 पोन जर बोईं नांबे सिंग्ये मिके, ताहां तों तियीइ काजे होबा होय, काहाके सिंग्ये एं तियीही टापे तेहें काजे आप्येहे. 16 पोन जर एखाहा तोणाइलोअ ओय, ताहां जांइत लेअहूं जोवे के, ए आमांआं आन देवोअ मंडड़ीइ एहलीही रीत कायनाहां.

17 पोन ओमें ए आगल्यीइ सुसना आपतू जात तुमाआं नाव हाजो नाहां काडतू, काहाके तुमू टोलू वोलतेहे, ताहां हाजो नाहां ओवतो, पोन बाक्तो ओवेहे. 18 सुरुवातिही तोम आंय ओंज उनाअहो के, जेहेलाम तुमू मंडड़ीमेहें एकठे ओवतेहे, ताहां तुमामेहें टोला पोड़ताहा, आन याआ माहूं थोड़थोडू विश्वास आवेहे. 19 काहाके तुमाआं विसमेहें टोला रोअहूंज बी जोवे, मोन्ज्ये तुमामेहें जें खोरे होय तें ओलखाअहूं जोवे. 20 तुमू जेहेलाम टोलू वोलतेहे, ताहां खोरो कोइत प्रभु भोज*11:20 सोकु रोटू खाअलो कोअते नाहां, 21 काहाके जेहेलाम तुमू खातेहे, तेहेलाम तुमामेर्‍योअ हारेक जोओं वेगोज खात लेहे, तिहींवाईं एखु फुकल्योज रोत जाहे, आन एखु मातीत जाहे. 22 खाअलोन पिइलोअ कोअते तुमाआं कांय कोएं कायनाहां के? के देवोअ मंडड़ीही कमी समजीइतेहे, आन जियांपोअ कायनाहां तियांहां लाजवाड़तेहे? आंय कि कोंव? यी गोठीम आंय तुमाआं हाजो नाव काडो के? नाहां, आंय तुमाआं नाव नाहां काडतू.

23 काहाके देवोअहीं रोत माहूं जो मुंदू जोड़्युहू, तोज आंय तुमाआं जागे बी पोताड़ी देदुहू के, जियी राती प्रभु ईसु तोआयू, तियीज राती तिये रोटू आथम लेदू, 24 आन देवोहो आभार मानित मुड़्यू आन कोयो, "ओं जों माआं डिल होय, ओं आंय तुमाआं काजे आपोहो. माआं ईतेमेहें ओं कोअजा." 25 तेहेंज कोइत रोटू खादू तिहींइं फासाड़ी तिये कटिवरु आथम तोअयु आन कोयो, "ओ कटिवरु माआं रक्तामेहें नोवी शप्पत होय. जेहेलाम बी ओं पिहा, ताहां माआं ईतेमेहें ओं कोअजा."✝11:25 निर्ग 24:6-8; यिर्म 31:31-34

26 काहाके जेती वाआ बी तुमू ओ रोटू खातेहे आन या कटिवराम रोत पितेहे, ताहां तुमू प्रभु आवे ताअहूं जाआं तियाआ मोतोअ पुकारु कोअतेहे. 27 तियाहा काजे जों कोडो बी विण हाने सोकू रोटू खाय आन तियाआ कटिवराम रोत पिय, ताहां तों प्रभुउ डिल आन रक्ताआ विरुद्दाम गुनेगार ठरे. 28 तियाहा काजे माहुंउं पेल सोताआ मोनोहों तापासीत लेअहूं जोवे, तिहींइं फासाड़ी तिया रोटाम रोत खाअहूं जोवे आन तिया कटिवराम रोत पिअहूं जोवे. 29 काहाके जों प्रभुउ डिलोअ अर्थ विण जांअयेंज तिहींम रोत खातोय आन पितोय, ताहां तों या खाअला पिइला वाअहीं सोताआ जिवोपोअ डोंड हाटवीत लेहे. 30 तिहींज वाअहीं तुमामेएं वारुज जोएं लुले आन मांदवाड़्ये पोड़्येहे, आन वारुज जोएं तोम मोइत बी गोये. 31 जर आपू सोताआ मोनोहों तापासीत पालहूं, ताहां आपापोअ डोंड ने आवनारु. 32 पोन प्रभु आपुहूं डोंड आपित हाने लागाड़ेहे, एताआ काजे के, दुन्याअरी लागीत आपू बी दोशी ने ठरुहूं जोवे.

33 तियाहा काजे माआं पाव्हीइला, जेहेलाम प्रभु भोज खाअलो काजे टोलू वोलहा, ताहां एकमेकाहा वाट जोवा. 34 जर एखु फुकल्यो ओय, ताहां तों तियाआ कोइज खात लेअहूं जोवे, मोन्ज्ये टोलू वोलहा, ताहां डोंड ने जोड़ीत सेके. रोल्‍यी गोठी आंय आविहीं ताहां हुदारिहीं.