1 João 3

देवोअ पोर्‍ये

1 आपुहूं देवोअ पोऱ्ये ओं नाव जोड़्योहो याम देव आब्हे आपापोअ केतीही मेर देखाड़्यिही तों पाला! आन खोरीज आपू तेहलेहे होयज बी. तिहीं वाईं दुन्या आपुहूं नाहां ओलखीइती, काहाके तियां देवोहो बी ने ओलख्यु. 2 माआं मेराला पाव्हीइला, ओमे आपू देवोअ पोऱ्ये होय, आन ओमे जाआं ओं नाहां जी मुंदू के, आपू की रोहूं, पोन एतुहू मुंदू होय के, जाहां ख्रिस्त आवे, ताहां आपू बी तियाआ होस रोहूं, काहाके जेहलुहू तो होय, तेहलुन तेहलुज आपू तियाहा देखहूं. 3 आन जिये कोडे बी आशा मिक्यिही, ख्रिस्त जेहलुहू सोकु होय, तेहेंज कोइत तो आपुहूं बी सोके कोअहे.

4 जो कोडो बी पाप कोअहे, तों देवोअ नियम तोड़ेहे; काहाके पाप ताम देवोअ नियमोंअ विरुद्द होय. 5 तुमुहूं मुंदू होय के, पाप उसलीत लेत जाअलोअ काजे ख्रिस्त प्रगट ओवू; आन तियाआ सोभावोम पाप कायनाहां. 6 तिहीं वाईं जों कोडो ख्रिस्ताम जिवन जिवेहे तों पाप नाहां कोअतो. पोन जों कोडो पाप कोअहे, तिये नाहां केदिहीं तियाहा देख्यू के नाहां केदिहीं ओलख्यु.

7 माअ पोर्‍यां, ठोगाअहा मा! जों कोडो हाजे कामे कोअहे, तों ख्रिस्ताआ होस धर्मी होय. 8 पाप कोअनारो सैतानोअ वोगेहे रोत होय; काहाके सैतान सुरवातिही रोतीज पाप कोअतू आयुहू. सैतानोअ कामे आरवीत टाकीइलोअ काजे देवोअ बेटुह्हू आयू.

9 जों देवोअ पोऱ्यो होय, तों पाप नाहां कोअतो. काहाके देवोअ बीज तियामेहें रोहे; आन तों पाप कोअतीज नाहां सेकतो, काहाके तों देवोअ उब्ज्योहो. 10 याज वाईं देवोअ पोऱ्ये आन सैतानोअ पोऱ्ये ओलखात जातेहे. जों कोडो हाजे कामें नाहां कोअतो तों देवोअ कायनाहां आन जों सोताआ पाव्हीइलापोअ मेर नाहां कोअतो, तों बी देवोअ माहुंउं कायनाहां.

एकमेकापोअ मेर कोआ

11 जो संदेश तुमू वेगे रोत उनाअयेहे तो ओंज होय के, आपू एकमेकापोअ मेर कोअहूं जोवे. 12 काइन तिया पाप्योअहीं रोत ओतू आन तिये सोताआ पाही हाबेलोअ खुन कोअयो, आपू तियाआ सारके ने बोणुहूं जोवे; आन तिये काहा कोत तियाआ पायहोअ खुन कोअयो? काहाके तियाआ कामे खाराब ओते, आन तियाआ पायहोअ कामे हाजे ओते.

13 माआं पाव्हीइला, जर दुन्या तुमाआं सीस कोअतीय ताहां पोंग्लाअहा मा. 14 आपुहूं मुंदू होय के, आपू मोतोम रोत पार उनकीत जिवनोमेहें पोतीत गोयेहे, काहाके आपू आपाआ पाव्हीइलापोअ मेर कोअतेहे. जो कोडो मेर नाहां कोअतो तों मोतोजमेहें रोहे. 15 जो कोडो पायहोअ नेत बोअह्हींइं सीस कोअहे तों खुनी होय; आन खुनी माअहूं पोअ अमर जिवन नाहां रोतो, ओं ते तुमुहूं मुंदूज होय. 16 तिये आपाआ काजेहे सोताआ जिव आपी देदू या वाअहीं आपू तियाआ मेर ओलख्यी; आन आपू बी आपाआ पाव्हीइलाआं काजे जिव आपुहूं जोवे. 17 पोन आपामेऱ्याआ एखापोअ दुन्यादारीइ मालधन ओये, आन तों तियाआ पाव्हीइलाहां गरीब देखीत कीइमाय ने कोअतोय ताहां तियाम देवोपोअ मेर होये एहें कि कोइत कोत सेकतेहे? 18 माआं पोऱ्या, आपाआ मेर शब्दा वाईं आन जिबी वाईं एतीज नाहां, पोन कामोवाअहीं आन सत्यावाअहीं बी मेर कोअहूं जोवे.

देवोअ सामने हिम्मत

19 याज वाअहीं आपू ओलखाअहूं के आपू सत्याआ होय; आन जियी गोठीम आपाआ मोन आपुहूं दोशी ठरवे तियी गोठीम आपू देवोअ सामने सोताआ मोनोहो हिम्मत आपित सेकहूं. 20 काहाके जर आपाआ मोन आपुहूं दोशी ठरिवतोय ताहां देव आपाआ मोनो रोत वोडु होय आन तियाहा आखो मुंदू होय. 21 मेराला दोस्तां, जर आपाआ मोन आपुहूं दोशी ने ठरवे ताहां, आपुहूं देवोअ सामने आविलोअ हिम्मत जोड़ेहे. 22 आन जों कि बी आपू मागतेहे तो आपुहूं जोड़ीत जाहे, काहाके आपू तियाआ आदेश मानतेहे आन तियाहा जो गोमेहें तोंज कोअतेहे. 23 तियाआ आदेश ओज होय के आपू तियाआ बेटाह्हा ईसु ख्रिस्ताआ नावोपोअ विश्वास कोअहूं जोवे आन तिये आदेश आप्युहू तेहेंज कोइत एकमेकापोअ मेर कोअहूं जोवे. 24 जों देवोअ आदेशोअ पालन कोहे तों देवोअरी रोहे, आन देव तियाअरी रोहे. आन तिये जो पवित्र आत्मा आपुहूं आप्युहू तिया वाअहीं आपुहूं मुंदू जाहे के देव आपाअरी रोहे.