1 माहूं वोडाय कोइलोअ फायदू कायनाहां तेबी कोअहूं पोड़ेहे; तियाहा कोत आंय प्रभुउ आपल्यो दर्शन आन प्रगटीकरणोअ गोठी कोअहीं. 2 ख्रिस्ताम एका जोओंहों आंय ओलखोहो; सुहूद वोरह्ये ओवे, शरीर लेत ओय के बिगर शरीरोअ ओय, देवोहोज मुंदू; तों माहुंउं तिसरा होरगाम जाआं विसाइत गोयो. 3 एहेला माहुंहूं आंय ओलखोहो, कि मुंदू शरीर लेत ओय के, बिगर शरीरोअ देवोहोज मुंदू. 4 तों माहुंउं होरगाम विसाइत गोयो, आन एहेलिही गोठी जे कोत आपुहूं जोगीही नाहां आन जे सोबीपोअ जाआं शब्द ने काडुहूं जोवे ते तों उनाअयो. 5 एहेलाहा माहूंपोअ ते आंय वोडाय कोअहीं, पोन सोताआ कमजोरीहीं सोड़ीत बिहीरी गोठीपोअ वोडाय ने कोओ. 6 जर माहूं वोडाय बी कोअहूं पोड़े, तेबी आंय फोगू ने बोणो, काहाके आंय खोरो गोगिहीं; पोन आंय रुकात जाहीं, एहेलोह ने ओवे के, एखु माहूं देखतोय नेत उनाअतोय, तों माहूं देखेहे तिया रोत वादार ने समजुहूं जोवे.

7 आन प्रगटीकरणोअ वादार वोदीइलोअ वोजेसे आंय फुगीत ने जाअहूं जोवे कोत, माआं डिलोमेहें एक काटू बुडाड़ीत मिक्युहू, तो माहूं टुसीलनारु सैतानोअ एक दुत होय; मोन्ज्ये आंय वादार फुगीत जाअहूं ने जोवे कोत तो मिकाअलू होय. 8 मामेहें रोत तो निहींत जाअहूं जोवे कोतीज मी प्रभुहू तीन वारी जाआं विनंती कोअयी. 9 पोन तिये माहूं कोयो के, "माआं मेरवानी ताआ काजे भारपुर होय; काहाके ताआ कमजोरीमेहें माआं ताकत पुरी ओवेहे." तियाहा काजे आंय जास्ती खुसी वाअहीं माआं कमजोरीपोअ वोडाय कोअहीं, मोन्ज्ये ख्रिस्ताआ ताकत मापोअ सावलू कोअती रोअहूं जोवे. 10 आन तिहींज वाअहीं आंय ख्रिस्ताआ वोतीइ कमजोरीमेहें, बेजतीम, अड़सनेम, तारासोम, कठीण वेलेम बी खुस रोहो, काहाके जेहेलाम आंय कमजोर रोहो, ताहांज आंय वातड़ू बोणोहों.

11 आंय फोगू बोण्यू, पोन तुमाआं वाखरीज माहूं एहेलोहो कोअहूं पोड़्यो. तुमू तोम माहूं पुरु भरीवसू आपुहूं जोवतोतो, काहाके आंय कीज कायनाहां, तेबी जे वोडा प्रेशित होय, तियां रोत आंय कम कायनाहां. 12 प्रेशितोंअ निशाणी बी तुमाआं विसमेहें आखी जातीइ सहनशीलता वाअहीं जाअखीलाहा समत्कार, वोडे वोडे कामें, ताकतवाले कामें देखाड़्येहे. 13 बिहीरी मंडड़ी रोत तुमू कोड्ला एवडा कमी ओता, फक्त एतीज गोठीम ना के, आंय तुमापोअ पोशाअ कोड्लीज मदत नाहां माग्यी? मेरवानी कोइत यी गोठीइ तुमू माहूं माफ कोई द्या.

14 पाला, आंय ओमे नेहें तीन वारी तुमाआं जागे आविइलाअ तियार होय, आन आंय तुमापोअ मदत मागीइलोअ कोड्लूज वोजू नाहां टाकतु, काहाके माहूं तुमाआं पोशा नाहां पोन तुमूज जोवे. काहाके आयहीन आब्हाअ कोअते पोर्‍ये ने मेलवुहूं जोवे, पोन आयहीन आब्हू पोर्‍याआं कोअते मेलवुहूं जोवे. 15 आंय तुमाआं काजे वादार खर्स कोअहीं, तेतोज नाहां पोन आंय सोताहा बी तुमाआं कोअते खर्स ओत जाहीं. आंय तुमापोअ वादार मेर कोअत्लू कोत तुमू मापोअ कमी मेर कोअहा के?

16 एहेलोह बी ओत सेकेहे के, आंय तुमापोअ वोजू ने टाक्यु, पोन तुमुहूं हुशारी वाअहीं धोकू देत फसाड़ीत लेदे! 17 आंय तुमाआं जागेहे जियांहां मोकल्या, तियांमेर्‍याआ एखा वाअहीं आंय तुमापोअ काविंहीं फायदू लेदू के? 18 मी तितुसोह समजाड़ीत मोकल्युहू आन तियाअरी एका पायहोहो मोकल्युहू, केहें तितुस तुमुहूं काविंहीं धोकू देत माग्यो के? केहें आमू एकाज उद्देशोवाअहीं आन पद्दती वाअहीं काम नाहां कोअता के?

19 ओंमे जाआं तुमुहूं एहेलोह लागतोय के आमू तुमाआं सामने सफायी आपताहा. पोन नाहां! आमू तोम ख्रिस्तामेहें देवोअ सामने हजर होय जाईंत गोगताहा, माआं मेराला पाव्हीइलां, आमू ओं आखो तुमाआं हाजाआ कोअतेज कोताहा. 20 काहाके माहूं बिक लागेहे के आंय आविहीं, ताहां जो आहरु मी कोअयू, तेहलेहे तुमू ने रोहा, आन तुमू जो आहरु कोअयुय तेहलुहू आंय ने रोंव; केहेंनेत तुमामेहें भान्गड़्यी, खोद्राय, खोत कोइलो, विरोद, इजराय, अपमान, साड़ी कोइलोअ, वोडाय कोइलोअ, गड़बड़ आन खाकलाविसल रोत सेकेहे. 21 एहेलोह ने ओवुहूं जोवे के आंय तुमाआं जागे आविहीं, तेहेलाम जियां पेल पाप कोअयुतो आन खाराब कामें, सिनालोअ कामें, लुसड़ाय यां कामोअहें रोत मोन ने फिरव्यो, तियांआं वाखरी माहूं माआं देवोअ सामने फाशोअ बी दाबाअहूं पोड़े, आन माहूं वारुज जोओंअ कोअते रोड़ुहूं पोड़े.