11 देवोहो बित सालीइलोअ कि होय तों आमुहूं मुंदू होये; तिहीं वाअहीं आमू माअहुंहूं समजाड़ताहा, पोन देव आमुहूं ओलखेहे, आन माआं आशा होये के, तुमू बी आमुहूं वारुहूं ओलखीइतेहे. 12 आमू तुमाआं सामने सोताआ वोडाय नाहां कोअता, पोन तुमुहूं आमाआं बाप्तिम वोडाय कोइलोअ जागू आपताहा; काहाके जे मोनोम नाहां, पोन तियांआं उपर्‍याआ रुपोहो देखीत वोडाय कोअताहा, तियांआं काजे तुमापोअ कि तेबी उत्तर जोवे. 13 जर आमू गांडा बोण्या तेबी देवोअ वोतीइ; आन हुशार ओवा ताहां तुमाआं काजे होय. 14 काहाके ख्रिस्ताआ मेर आमापोअ राज कोअहे; तियाहा काजे आमू एहेलोहो मानताहा के, एक आखाआ वोतीइ मोयू ताहां आखे मोइत गोये. 15 आन तो एताआ काजे आखाआ वोतीइ मोयू के, जें जिवते रोय तें आगाड़ी रोत सोताआ काजे नाहां, पोन तियाआ काजे जिवा, जो तियांआं काजे मोइत गोयू आन फाशुउ जिवतु बी ओवू.

16 तियाहा काजे ओमें रोत आमू कोडाहा, मुखोअ दशा देखीत नाहां ओलखीइता; भले, आमू ख्रिस्ताहा तियाआ मुख देखीत ओलख्युतो, पोन तेबी ओमें रोत तियाहा आमू तेहें कोइत नाहां ओलखीइता. 17 तियाहा काजे जर एखू ख्रिस्तामेहें ओय, ताहां तों नोवो बोण्योहों; जुनी गोठी जाती रोयी; पाला, आखी गोठी नोवी ओत गोयीही. 18 ए आखी गोठी देवोप रोत ओवीही, तियेज ख्रिस्ता वाअहीं सोताअरी आपाआ होमजोण कोअयी आन बिहीराहा बी तियाअरी होमजोण कोइलोअ काम आपुहूं होप्योहो. 19 मोन्ज्ये देव दुन्याआ गुनाआं ईसाब दुन्यापोअ ने लेदू, पोन ख्रिस्ता वाअहीं तिये सोताअरी होमजोण कोअयी, आन तों होमजोण कोइलोअ काम आपुहूं होप्योहो.

20 तियाहा काजे, आमू ख्रिस्ताआ राजदुत होय; देव आमा वाअहीं तुमुहूं विनंती कोअत्लू जेहें होय. आमू ख्रिस्ताआ पक्शाम रोत तुमुहूं विनंती कोअताहा के, तुमू देवोअरी होमजोण काडीत ल्या. 21 जियाहा पाप कि होय तोज ने मुंदू ओतो, तियाहा तिये आपाआ वोतीइ पाप ठरव्यू, मोन्ज्ये आपू तियाम रोत कोइत देवोअरी धर्मीपणोअ भागिदार बोणुहूं जोवे.