दानियेल 12

आखरीइ वेल

1 "तियी वेले मिखाएल नावोअ वोडू मुख्यू, जो ताआ माअहुंउं वोल उबू रोहे, तो उबू रोय. ताहां एहेलिही ओड़सनीइ वेल रोय, जेहेलोहो यी धरतीपोअ राज्ये बोण्ये तोयोंअ रोत ओमे जाआं केदिहीं नाहां ओवो, आन ने ओवे; तेहेलाम ताआ माअहूंम रोत जेताहा जोंओंअ नावे देवोअ पुस्तकोमेहें लेखाअयेहे, तें वासात जाय. 2 जें धरतीइ निसे माहणोमेहें हुवित रोयेहे तियांमेर्‍येए वारुज माअहें जागीत उठे, वार जोएं ते हादाफल्याआ जिवनोअ कोअते उठे, आन वार जोएं ते तियांआं खाराब नावोवाअहीं आन हादाफल्याआ अपमानोअ काजे उठे. 3 ताहां समजदार माअहें जुगोअ उजालाआ होस रोय, आन जें वार जोओंहों धर्मी बोणावतेहे, तें हादाफल ताराआ होस उजालावाले रोये."