दानियेल 9

24 "ताआ माअहें आन ताआ सोका होयरोअ काजे सत्तर आठीवड़ा ठरवाअयाहा, काहाके तियामेहें तियांआं सेवट जाआं पाप कोइलाआ आन खाराब काम कोइलाआ सोड़ी देअहूं जोवे, आन हादाफल्योअ सतीपण प्रगट ओवुहूं जोवे; आन दर्शनोअ गोठी पोअ आन भविश्यवाणी पोअ सिक्कू लागुहूं जोवे, आन सोकाम सोकाआ अभिशेक कोअहूं जोवे. 25 तियाहा कोत ओं जाईंत आन समजीत ले, काहाके येरुसालेमोहों फाशोअ बोहाड़ीइलोअ आदेश निहींइलो वाअहीं अभिशेक कोअल्या*9:25 अभिशेक कोअल्या मसीह मुख्याआ वेले जाआं हांत आठीवड़ा सेके. तिहीं रोत बाहासाट आठीवड़ा सेके, तेहेलाम सोवकड़ी आन खायारान-हायारा तिया होयरोहो फाशोअ तारासोअ दिहोम बोहाड़े. 26 ते बाहासाट आठीवड़ा सेकीत जाय, तेहेलाम तिया देवोअ निवड़ीइल्या माट्योहो माइत टाके; पोन किज ने आथ लागे; आन बिहीरा आवनारा मुख्याआ माअहें होयर आन सोका जागाहा आरवीत देय, आन तिया मुख्याआ सेवट फोला खाडाआ होस ओवे; तेबी तियाआ सेवट जाआं लड़ायी ओवती रोय; काहाके तियाहा उजाड़ीइलो नक्की ठरीत गोयोहो. 27 तो मुख्यू एका आठीवड़ाआ काजे वारुज जोओंअरी कड़क शप्पत खाय, पोन आरदाज आठीवड़ा सेके तेहेलाम तो अर्पण आन गाराहा कोइलाआ बोंद कोए; ताहां उजाड़नारी सिसड़ाअली वस्तू देखाय आन ठरल्यी गोठ पुरी ओवे ताअहूं जाआं उजाड़नारापोअ देवोअ खोत रोय."