1 सुरुवातीमेहें शब्द ओतो, आन शब्द देवोअरी ओतो, आन शब्द देव ओतो. 2 ओंज शब्द सुरुवातिही देवोअरी ओतो. 3 आखो बादो तियाज वाअहीं बोण्यों, आन जों किबी बोण्योहों तिहींमेहें रोत कोड्ली बी वस्तु तियाआ सिवाय ने बोण्‍यी. 4 तिया शब्दामेहें जिवन ओतो, आन तों जिवन मोनव्योअ उजालो ओतो. 5 उजालो आंदारामेहें सोमकेहे, आन आंदारो तियाहा जिकीत ने सेको*.

6 देवे तियाआ एका खबर्‍याहा मोकल्यू; जियाआ नाव योहान ओतो.✝ 7 तो आखा माअहोंहों उजालाआ बाप्तिम साक्शी कोअलोअ काजे आयू, जिहीं वाअहीं आखे माअहें उनाय आन विश्वास मिकीत सेके. 8 तो सोताहा उजालो ने ओतू, पोन तिया उजालाआ बाप्तिम साक्शी आपू आयुतो. 9 खोरो उजालो जो हारेक माअहुंहूं सोमकाडेहे, तों धरतीपोअ आवनारो ओतो.

10 तों शब्द दुन्याम ओतो, आन देवे दुन्‍या तिया वाअहीं बोणायी, तेबी दुन्‍या तियाहा ने ओलख्यु. 11 तो तियाआ कोअमेहें आयू, तेबी तियाआ कोर्‍याआ माअहूं तियाहा ने ओलख्यु. 12 पोन जियां तियाहा स्विकार कोअयू, मोन्ज्ये तियाआ नावोपोअ विश्वास कोअयू, तियांहां देवोअ पोर्‍ये बोणीइलाआ आधिकार आप्यू. 13 तें ने रक्ता वाअहीं के, शरीरोअ इश्शा वाअहीं के, मोनव्योअ इश्शा वाअहीं उब्ज्ये, पोन तें देवोप रोत उब्ज्ये.

14 आन शब्द शरीर बोण्यो; आन मेरवानी आन सत्या वाअहीं पुरो ओवीत आमाआं विसमेहें वोहती कोअयी, आन आमू तियाआ एहेलिही महिमा देख्यी, जे आब्हाआ एखला बेटाह्हाअ महिमा ओये.

15 बाप्तिस्मा कोअनारे योहाने तियाआ बाप्तिमेहें साक्शी आप्यी, आन आअड़ी-आअड़ीइ कोयो के, "ओ तोज होये, जियाआ बाप्तिमेहें आंय कोताप्य के, जो माआं फासाड़ी आवेहे, तो मापरोत वादार होय, काहाके तो मारोत पेल ओतू."

16 तियाआ मेरवानीइं भारपुरी वाअहीं तो आपाअ काजे आशिर्वाद बोण्यु, आपू आखाहा तियाआ आशिर्वादोअ फासाड़ी आशिर्वाद जोड़्यू. 17 देवे मोशे वाअहीं नियम आप्यू, पोन मेरवानी आन सत्य ईसु ख्रिस्ता वाअहीं आयो. 18 देवोहो कोडे केदीहींज नाहां देख्यू, पोन देवोअ एखले बेटेह्हेज, जो सादा आब्हाआ बोदाम रोहे, तिये तियाहा प्रगट कोअयू.

19 योहानोअ साक्शी ए होय के, जेहेलाम यहुदी आधिकार्‍यों येरुसालेमोम रोत थोड़ाक पुंजाराहां आन लेवीहीं बाप्तिस्मा कोअनारा योहानोहो ओं फुसे तेहें काजे मोकल्या के, "तू कोडू होये?"

20 तेहेलाम योहाने उत्तर आपीइलो ने नाकार्‍यो, पोन तो बिन्दास गोग्यू आन वारुहूं कोयो, "आंय ख्रिस्त कायनाहां."

21 ताहां तियां योहानोहो फुशो,

"ताहरुउ तु कोडू होये?" "तु एलिया होय के?"

तिये कोयो, "आंय नाहां."

तियां फुशो, "ताहां तु तो भविश्यवक्ता होय के?"

तिये वालित उत्तर आप्यो, "नाहां."

22 ताहां तियां तियाहा फुशो, "ताहरुउ तू कोडू होये? काहाके आमू आमाआं मोकलिइनाराहा जात कोइत कोत सेको. तू सोताआ बाप्तिमेहें कि कोहे?"

23 योहाने कोयो, "जेहें कोइत यशया भविश्यवक्ते कोयो:

"‘आंय जंगलोमेहें एका आअड़ीइनाराआ आवाज होये,

प्रभुउ काजे वाट हुदी बोणावा.’"

24 जियां खबर्‍याहां फरिसी माट्यों मोकल्याते. 25 तियां योहानोहो ओं प्रश्न फुशो, "जर तू ख्रिस्त नाहां, आन नाहां एलिया, आन नाहां तो भविश्यवक्ता, ताहरुउ बाप्तिस्मा काहा आपेहे?"

26 बाप्तिस्मा कोअनारे योहाने कोयो, "आंय ताम पाअयों वाअहीं बाप्तिस्मा कोअहो, पोन तुमाआं विसमेहें एक जोऊं उबू रोत रोयुहू, जियाहा तुमू नाहां ओलखीइता. 27 जो माआ फासाड़ी आवनारु होय, पोन आंय तियाआ खाहाड़ाआ पट्टी सोड़ीइलोअ बी लायक कायनाहां."

28 ए गोठी यारदेन खाडीइ तियी तोड़े बेथानी गावोमेहें ओवी, जिहीं योहान बाप्तिस्मा आपतुतो.

29 बिहीरे दिही योहाने ईसुहू तियाआ वोलेहे आवत्लु देखीत कोयो, "पाला, ओ देवोअ गिद्लू* होये, जो दुन्याआ पाप विसीत लेत जाहे. 30 ओ तोज होये, जियाआ बाप्तिमेहें मी कोयोतो, ‘एक माटी माआं फासाड़ी आवेहे, पोन तो माआं रोत वोडु होये, काहाके तो मारोत वेगुउ ओतू.’ 31 आंय सोताहा तियाहा ने ओलखीइतुतो, पोन आंय याअकाजे पाअयों वाअहीं बाप्तिस्मा आपतू आवोहो, काहाके इस्राएलोअ माअहें तियाहा जाईंत लेअहूं जोवे."

32 आन योहाने ए साक्शी आप्यी: "आंय आत्माहां पेरवाअ होस होरगाम रोत उतरीइत्लू देख्यू आन तो तिया पोअ बोहीत गोयू. 33 आंय सोताहा तियाहा ने ओलखीत सेकू, पोन देव, जिये माहूं पाअयों वाअहीं बाप्तिस्मा आपे तेहें मोकल्‍यू, तियेज माहूं कोयो, ‘तू आत्माहां निसे उतरीइत्लू आन जियापोअ रुकाअत्लू देखही, तोज माटी होय, जो पवित्र आत्मा वाअहीं बाप्तिस्मा आपनारु होये.’ 34 आन आंय तियाहा देख्युहू," आन आंय तुमुहूं साक्शी आपोहो के, "तो देवोअ बेटुह्हू होये."

35 फाशुउ आगल्येए दिहे योहान तियाआ बेन सेलाअरी तिहीं उबू रोत रोयुतो, 36 आन तिये ईसुहू जात्लाहा देखीत कोइत कोयो, "पाला, ओ देवोअ गिद्लू होये,"

37 ताहां ते बेन सेला तियाआ ए गोठ उनाइत कोइत ईसुउ फासाड़ी गोया. 38 ईसु फासाड़ी वोलीत तियांहां तियाआ फासाड़ी आवत्लाहा देख्या, आन तियांहां कोयो, "तुमू कोडाहा होदताहा?"

तियां तियाहा उत्तर आप्यो, "रब्बी, मोन्ज्ये ‘गुरुजी’ तु का रोत्लू?"

39 ईसु तियांहां कोयो, "आवा आन पाला." आन ते तियाअरी जाना वोल्या, तियां देख्यो के तो का रोहे, तेदिहीं ते तियाअरी रुकाइत गोया. काहाके एक आंदास हांजेए शारेक वाजीत गोयेते.

40 तियां बेनुमेहें रोत, जे योहानोअ गोठ उनाइत कोइत ईसुउ फासाड़ी आयाते, एक शिमोन पेत्राआ पाही आंद्रिया ओतू. 41 तिये पेल तियाआ पाही शिमोनोहो मिलीत कोइत तियाहा कोयो, "आमुहूं मसीहा जोड़ीत गोयू, मोन्ज्ये ख्रिस्त." 42 ताहरुउ आंद्रिया शिमोनोहो ईसुउ जागे लेत आवयू.

ईसु तियाहा पाल्यो आन कोयो, "तू योहानोअ पोर्‍यू शिमोन होये: तू केफा, मोन्ज्ये पेत्र कोवाअही."

43 बिहीरे दिही ईसु गालील जाअलोअ ठरव्यो. तो फिलीप्पोहो मिल्यू आन कोयो, "माआं फासाड़ी आव." 44 फिलीप बेथसैदाअ रेवासी ओतू, जिहीं आंद्रिया आन पेत्र रोताते. 45 फिलीप्प नथनेलोहो मिल्यू आन तियाहा कोयो, "जियाआ बाप्तिमेहें मोशेए नियमोमेहें आन भविश्यवक्तां बी लेख्योहो, तो आमुहूं जोड़ीत गोयुहू; तो योसेफोअ पोर्‍यू, ईसु नासरेथवालू होये."

46 नथनेले तियाहा कोयो, "केहें एखू हाजी वस्तू बी नासरेथोम रोत निहींत सेकेहे के?"

फिलीप्पे तियाहा कोयो, "आव आन पाल."

47 जाहां ईसु नथनेलोहो तियाअहें आवत्लाहा देख्यू, ताहां तियाआ बाप्तिम कोयो, "पाला, ओ खोराम खोरु इस्राएली होय: यामेहें कीज खोटी कायनाहां."

48 नथनेले तियाहा कोयो, "तू माहूं कि कोइत ओलखेहे?"

ईसु उत्तर आप्यो, "जेहेलाम ताहूं फिलीप्पे हादल्यू, तिया रोत बी पेल तू अंजिरोअ साड़ोअ निसे ओतू, तेहेलाम आंय ताहूं देख्यूतो."

49 नथनेले तियाहा उत्तर आप्यो, "गुरुजी, तू देवोअ बेटुह्हू होय; तू इस्राएलोअ महाराजा होये."

50 ईसु तियाहा कोयो, "आंय जो ताहूं कोयो के ‘आंय ताहूं अंजिरोअ साड़ोअ निसे देखल्यू,’ केहें तू याआज काजे विश्वास कोअहे? तू आगाड़ी या रोत बी वोडे वोडे कामे देखही." 51 आन तिये तियांहां कोयो, "आंय तुमुहूं खोरीज कोहो, तुमू होरगाहा उगड़ीइल्यो, आन देवदुतोंहों माहुंउं बेटाह्हा पोअ निसे उतरीइत्लाहा आन उसे जात्लाहा देखहा."