João 13

ईसु तियाआ सेलाआं गुडा तुवत्लू

1 वल्हांडण तिवारोअ पेलेए तो दिही ओतू, जेहेलाम ईसुहू जाआंत गोयो के दुन्याहा सोड़ीत आब्हाअ जागे जाअलोअ माआं ते वेल आवित लागीही, ताहां तियाआ माअहें जें दुन्यामेहें ओते जियांपोअ तो कायम मेर कोअतुतो, तियां पोअ आखरी जाआं तेहेलीहीज मेर कोअतू रोयू.

2 ताहां रोटू खाअलाअ वेले जाहां सैतान शिमोन इस्कार्योतोअ पोर्‍यू यहुदाआ मोनोमेहें ओं टाकीत सुकूतो के तियाहा तोआडो, 3 ईसु, ओं जाइंत कोइत के आब्हे आखो बादो तियाआ आथोम कोइ देदोहो आन तो देवोअ जागे रोत आयुहू आन देवोअ जागे जाहे, 4 तियाहा काजे तो रोटू खाअलोअ सोड़ी देत उठीत कोइते तियाआ उपर्‍येए आंगड़े काडी देदे, आन पोतड़ू लेत कोइत तियाआ कंबरेएरी वेटालित लेदू. 5 ताहरुउ बासनोमेहें पाईं पोइत कोइत सेलाअ गुडा तुवीइलोन हिद्लाआ कंबरेएरी बांदल्या पोतड़ा वाअहीं नुसीइलोअ सालू कोअयो. 6 जाहां तो शिमोन पेत्राअ जागे आयू, तेहेलाम पेत्रे तियाहा कोयो, "प्रभु, केहें तू माआं गुडा तुवेहे?"

7 ईसु तियाहा उत्तर आप्यो, "जो आंय कोअहो, तों ताहूं ओमे ने समजाये, पोन याअ फासाड़ी समजीही."

8 पेत्रे तियाहा कोयो, "तू माआं गुडा केदिहींज ने तुवुहूं जोवे!"

ओं उनाइत कोइत ईसु तियाहा कोयो, "जर आंय ताआ गुडा ने तुवो, ताहां माअरी ताआ किज वाटू ने रोनारु."

9 शिमोन पेत्रे तियाहा कोयो, "प्रभु, ताहां माआं गुडा एताज नाहां, पोन आथ आन मुन्को बी तुवीदे."

10 ईसु तियाहा कोयो, "जो उंगल्योहो तो सोको होय, तियाहा गुडाअ सिवाय बिहीरो किज तुवीइलाअ गरज नाहां; आन तुमू सोका होये, पोन आखाज नाहां." 11 ईसु तियाहा ओलखीइतुतो जो तियाहा धोकू देत तोइत आपनारु ओतू, तिहींज वाअहीं तिये कोयो, "तुमू आखाज सोका कायनाहां."

12 जेहेलाम ईसु तियांआं गुडा तुवी देदा, आन तियाआ आंगड़े पेवीत कोइत फाशुउ बोहीत गोयू, ताहां तियांहां कोनु वोल्यू, "केहें तुमुहूं समजाअयो के आंय तुमाअरी कि कोअयोहो? 13 तुमू माहूं गुरु आन प्रभु कोताहा, आन तुमू बोराबरुज कोताहा, काहाके आंय तोज होंव. 14 जर आंय गुरु आन प्रभु ओत कोइत तुमाआं गुडा तुवया, ताहां तुमू बी एकान एकाअ गुडा तुवुहूं जोवे. 15 काहाके आंय तुमुहूं नमुनू देखाड़ी देदुहू, ताहां जेहें कोइत आंय तुमाअरी कोअयोहो, तेहेंज कोइत तुमू बी कोअया कोआ. 16 आंय तुमुहूं खोरीज कोहो, एक सेवक तियाआ मालख्यो रोत वोडू कायनाहां, आन नाहां खबर्‍यु तियाआ मोकलीइनारा रोत वोडू. 17 ओमे तुमुहूं ओं सत्य मुंदू होये, आन ओं जर तुमू सोताआ जिवनोम लेत सालहा ताहां तुमाआं केतोह बाहरी ओवे!