1 फाशुउ ईसु सेलाहां बी कोयो, "एक मालदार ओतू, तियाआ एक पोशाअ कारभारी ओतू, आन माहें तिया पोअ एहेलुहू आरोप लागाड़्यु के, तो तियाआ मालख्योअ पोशा वाया जावाड़ेहे. 2 ताहां तिये तियाहा हाद्‍यु आन कोयो, ताआ बाप्तिम आंय ओं कि उनाअहो? ‘तु माहूं ताआ कामोअ ईसाब आप, काहाके तु ओमे रोत आगाड़ी पोशाअ कारभारी ने रोत सेकत्लू.’ 3 ताहां तिये कारभार्‍ये विसार कोअयू, ‘माआं मालिख मापोर्‍योअ काम बुउसेहे. माहूं तोम कादुउ बी खुंउंता नाहां आवडीइतो, आन बीख मागीइलोअ तोम माहूं लाज आवत्ली. ताहां ओमे आंय कि कोअहीं? 4 आंय कि कोअहीं तो ओमे माहूं मुंदू पोड़्यू, एताआ काजे के जेहेलाम मालिख माहूं पोशाअ कारभार्‍योअ कामोम रोत काडी देय, ताहां माअहें माहूं तियांआं कोओ हादीत लेय.’ 5 ताहां कारभार्‍ये तिया मालख्योअ उदारो लेनाराहां हाद्ये आन पेलठाहा फुशो, ‘तुमे माआं मालख्योपोअ केतोह उदारो कोअल्यो?’ 6 तिये कोयो, ‘एक होव मापले*16:6 मापले तेल नेत वोहीत जानारी वस्तू मोजीइलोअ एक माप जेयतुनोअ तेल,’ ताहां पोशाआ कारभार्‍ये तियाहा कोयो, ‘ताआ खाताआ वही लेत बोहो, आन निसे पोन्नास मापले लेखी दे.’ 7 फाशुउ तिये बिहीराहा फुशो, ‘तुमे केतोह उदारो कोअल्यो?’ तिये कोयो, ‘एक हाजार पोता गोंवें,’ तिये कोयो, ‘ताआ खाताआ पुस्तक लेताव आन निसे आँठ होव पोता लेखी दे.’"

8 "एहेलिही हुशारीइ कामे देखीत कोइत मालख्ये तिया लबाड़ कारभार्‍योहो कोयो, ‘वारेवा!’ काहाके यी गोठीम दुन्यादारीइ माअहें उजालाआ माअहूं रोत वादार हुशारी वाअहीं वेवारो कोअत्ले."

9 आन ईसु कोनु वोल्यू, "तियाहा काजे तुमुहूं कोहो के, दुन्यादारीइ मालधनो वाअहीं तुमाआं काजे दोस्ती बोणावीत ल्या. याअ काजे के जेहेलाम तों धन सेलात जाय, ताहां तुमुहूं अमर जिवनोमेहें लेत लेये. 10 जो थोड़ी गोठीमेहें इमानदार रोय, तो जाअखी गोठीमेहें बी इमानदार रोये; जो थोड़ी गोठीमेहें लबाड़ रोय, तो जाअखी गोठीमेहें बी लबाड़ रोये. 11 तियाहा काजे जर, दुन्यादारीइ मालधनोमेहें इमानदार ने निहे, ताहां तुमुहूं खोरो मालधन काहा कोडो होपे? 12 आन जर बिहीराअ मालधनोमेहें तुमू इमानदार ने निहे, ताहां जो तुमाआं होय तियाहा कोडो तुमुहूं आपे?"

13 "कोड्लूज पावर बेन मालख्योअ सेवा ने कोइत सेकत्लू: काहाके तो एकाआ सीस कोए आन बिहीराअरी मेरे वाअहीं रोय, नेत एकाअरी आरी मिलीत रोय आन बिहीराअ सीस कोए. तुमू देवोअ आन पोशाआ सेवा एकवार्‍यीज नाहां कोइत सेकते."

14 जेहेलाम फरिसी ओं आखो उनाअया, ताहां ते ईसुहू फेसावित देखाड़ा वोल्या, काहाके ते पोशाआ लालसी ओता. 15 ईसु तियांहां कोयो, तुमू माअहोंअ सामने सोताहा धर्मी बोणताहा, पोन देव तुमाआं मोनोहों ओलखेहे, काहाके जे गोठ माअहोंअ नजरेमेहें महत्वाआ होय, ते देवोअ नजरेमेहें सिसड़ाअलिही होय.

16 मोशेए कायदु आन भविश्यवक्ताआं लेख्यो बाप्तिस्मा कोअनारा योहानोअ जागे जाआं लागू रोयो; तोयोंअ रोत देवोअ राजोअ हाजी बातमी माअहूं मेहें परसार ओवेहे, आन तिहींमेहें हारेक जोओं उदाबादीज मांयते फोहेहे.*16:16 मत्तय 11:12, 13 17 तेबी जुग आन धरती जाआं टोलीत जाअलोअ सोपो ओय पोन देवोअ कायदाआ हानाम रोत हानू कानू नेत मात्रू बी ने केदिहीं टोले.

18 जो कोडो तियाआ लाडीही टाकीत बिहीरी बोईंइंरी वेहवाल कोअहे, तो सिनालो कोअहे, आन तेहलोज जो कोडो एहेलिही टाकल्यी बोईंइरी वेहवाल कोअहे, तों बी सिनालो कोअहे.

19 एक मालदार माटी ओतू, जो खुब मोगे-मोगे आंगड़े पेवतुतो, आन दाड़ख्युउ जाअखीलिही मोज्या कोइत रोतुतो. 20 तिहीं लाजर नावोअ एक गरीब माटी ओतू, तियाआ डिल पाकला फोडक्या वाअहीं हितड़ात ओतो. तियाहा मालदार माट्योअ बाअणाअ जागे लेत आवित बोहाड़ी देतेते. 21 तिया मालदारोअ टेबलोपोअ रोत जो थोड़ थोडू रोटू पोड़े, तो तेबी खात कोइत ताराओ एहेलिही तियाआ आशा ओती, आन तेतापोअ हुंणे आवित कोइत तियाआ फोडक्ये साटतेते.

22 "ताहरोअ एहेलोह ओवो के तो बिखारी माटी मोइत गोयू, आन देवदुतों तियाहा होरगामेहें अब्राहामोअ बोदाम लेत जात मिकी देदू. तो मालदार बी मोयु आन तियाहा माहणोम ओजीत बी देदू. 23 आन तो अधोलोकोम तारास कोअया कोअतुतो, तेहेलाम तियाआ नजर उसे टाकीत पाल्‍यी, ताहां, अब्राहाम आन तियाआ बोदाम लाजरोहो बोहीत रोल्‍यू सेटे रोत देख्यू. 24 ताहां तिये आअड़ीत कोयो, ‘ए बा, अब्राहाम रा! मापोअ दया कोइत लाजरोहो मोकलेए, एताआ काजे तो तियाआ आंगुउ जारकीज पाअयोंमेहें पिगवीत कोइत माआं जिबीही हेली कोए. काहाके आंय इंहीं यी आगीम तोडपोहो!’"

25 "पोन अब्राहामे कोयो, ‘माआं बेटा, ओर कोओ, तु जिवता जिव हाजी वस्तु देखीत लेदी, लाजरोहो बाक्ती गोठी एतीज जोड़्यी, पोन तो ओमे इंहीं होकेहे रोहे आन तेहलुज तु बी ओंहों दुख भोगेहे. 26 आन एतोज नाहां, तुमाआं आन आमाआं विसमेहें वोडू बी खायारु बोणावयुहू मोन्ज्ये इंहीं रोत कोडो तियी मेरे ने जात सेके आन जिहीं तु होय तिहीं रोत इंहीं ने कोडो आवित सेके.’ 27 ताहां तिये मालदार माट्ये कोयो, ‘ताहरुहू ए बा अब्राहाम, आंय ताहूं रावण्या कोअहो, के लाजरोहो माआं आब्हाआ कोअ मोकलेए. 28 काहाके माआं पास पाही होये, ते तेंव या तारासोअ जागाम ने आवुहूं जोवे कोत तो इहींइं साक्शी तेबी आपे.’"

29 "पोन अब्राहामे तियाहा कोयो, ‘ताआ पायहोंअ जागे तोम मोशे आन भविश्यवक्ताआं गोठी होये, तियां ते गोठी उनाअहूं जोवे.’ 30 तिये मालदारे कोयो, ‘एहेलोह नाहां, बा, अब्राहाम! पोन मोल्यामेर्‍योअ एखु जात कोइत कोय, ताहां तें तियांआं मोन वाले.’ 31 ताहां अब्राहामे तियाहा कोयो, ‘तें जर मोशेए आन भविश्यवक्ताआ ने उनातेय, ताहां मोल्या मेऱ्योअ एखु जात कोइत कोय, तेबी तें तियाआ ने उनाय.’"