1 दितवारोअ दिही वोडी वेगर्‍यीइजे, ते आखी बोईं तियीं तियार कोअल्‍यो हाजो गुंदाअनारो मासालो लेतीज माहणोअहीं आयी. 2 तियीं माहणोपोअ रोत डोण होरकावी देद्लू देख्यू. 3 ते मांय गोयी, पोन तियींहीं प्रभु ईसुउ तोड़ ने सापड़्यो. 4 तिहीं वाअहीं ते कानीबानीज ओत गोयी, तियींइं जागे उसकाहीज पांडे पांडेज आंगड़े पेवित बेन माटी उबा रोया. 5 ताहां ते आखी बोईं बित गोयी, आन निसे पुंयींइं वोल सोब कोइत रोयी, तेहेलाम तियां बेनू जोओं तियींहीं कोयो, "जो जिवतु होये तियाहा तुमू मोल्‍यामेहें काहा होदतिही? 6 तो इंहीं कायनाहां, पोन जिवित उठ्युहू. तो गालीलोमेहें ओतू, तेहेलाम तिये कि कोल्‍यो तो इतवा. 7 ‘गरजेए होये के माहुंउं बेटुह्हू पापीइ आथोम तोइत आपाय, आन क्रुस खांबो पोअ सोढवाय, आन तिसरे दिही जिवीत उठे.’"

8 ताहां तियाआ गोठी तियींहीं इतवुउ आयी, 9 आन माहणोअहीं रोत वोलीत आवयी आन तियां इग्‍यार जोओंहों, आन बिहीरा आखाहा, ए आखी गोठी कोत देदी. 10 जियीं बोईं सेलाहां ए गोठी कोयी ते मरिया मग्दालिनी, योआन्ना आन याकोबोअ आयही मरिया ओती, आन तियींइरी बाकी बोईं बी ओती. 11 पोन सेलाहां ए गोठी फोगायीइ एहेलिही लागी, आन ते तियींइं गोठी पोअ विश्वास ने कोअयू. 12 ताहरुउ पेत्र उठीत कोइत माहणोअहीं गोयू. आन तिहीं उसावित पाल्‍यो, ताहां साअके एतेज पोड़ीत रोल्‍ये देख्‍ये, आन जो ओवोतो तिहीं वाअहीं तो सोताहा मोनाअ मोनेज बोगलाइत गोयू आन वोलीत कोअ जातु रोयू.*24:12 थोड़ाक जुना लेख्याम ओं वसन नाहां जोड़तो.

13 तेदिहींज तियाआ सेलामेर्‍याआ बेन जोओं येरुसालेम रोते हांत मैल दुर एतोह एम्‍माउस नावोअ एका गांवोंअहें जाताते. 14 आन ते जे गोठी ओवली ओती, तिहींइं बाप्तिमेहें गोठी मेकताज जाताते. 15 आन जेहेलाम ते गोगताज आन सर्सा कोअताज जाताते, तेहेलाम ईसु सोताहा तिहीं आवित कोइत तियांअरी सालु वोल्‍यू. 16 तियां तियाहा देख्यू, पोन ते तियाहा ओलखीत ने सेक्‍या. 17 ईसु तियांहां कोयो, "तुमू सालता-सालता कोड्ली गोठीइ सर्सा कोअत्लाते?"

ते नाराज ओत कोइत ठावकाज ऊबा रोत गोया. 18 ओं उनाइत कोइत तियांमेर्‍युउ क्लयपा नावोअ एक ओतू तिये कोयो, "केहें तू येरुसालेमोमेहें एखलुज परदेसी होये, जो नाहां जांअतू के यां दिहोमेहें तिहीं कि-कि ओवोहो?"

19 ईसु तियांहां फुशो, "कोड्ली गोठी?"

तियां तियाहा कोयो, "नासरेथवाला ईसुउ बाप्तिमेहें जो देवोअ आन आखा माअहोंअ विसमेहें ओं देखाड़ी देदो, के तो एक वोडू भविश्यवक्ता ओतू. 20 आन मुख्य पुंजारा आन आमाआं आधिकार्‍यों तियाहा माईं देअलोअ आदेश आपे तेहें काजे तोआड़ी देदू, आन तियां तियाहा क्रुस खांबो पोअ टांग्यू. 21 पोन आमाआं आशा ओती के ओज इस्राएलोहो सोड़वे. यीं आखी गोठीही सोड़ीत यी घटनाहा ओवल्याहा तिसरु दिही होय. 22 आज आमामेर्‍यीइ थोड़ीक बोईं बी आमुहूं बोगलावी देदाहा, जे वेगर्‍यीइ माहणोअहीं गोयीते; 23 आन जेहेलाम तियाआ तोड़ ने जोड़्यो, ताहां ते एहें कोतीज आयी, के आमुहूं देवदुतोअ दर्शन जोड़्यो आन तियां देवदुतों कोयो के, तो जिवतुज होये. 24 ताहां आमाआं टोलामेर्‍येए थोड़ेक जोएं माहणोअहें गोये, आन जेहें कोइत तियीं कोयो, तेहेंज कोइत देख्यो; पोन तियाहा पालित ने सेक्ये."

25 ताहरुउ ईसु तियांहां कोयो, "तुमू केताहा फोगा होये! आन भविश्यवक्तां जो किबी कोयोहो, तियापोअ विश्वास कोइलोमेहें तुमू केताहा नादान होये! 26 केहें जरुरी ने ओतो के ख्रिस्त ओ दुख वेठीत कोइत तियाआ महिमा मेहें जाये?" 27 आन एहें कोइत मोशेप रोत सुरवात कोइत आखा भविश्यवक्ताअहीं जाआं आन पवित्र वसनोमेहें तियाआ बाप्तिमेहें जो कोयोतो, तो आखो फोड़ीत कोइत समजाड़्यो.

28 ते जेहेलाम तिया गावोंअ आहने आया, जिहीं तियांहां जाअलो ओतो, ताहां ईसु एहेलोह देखाड़्यो के तो आगाड़ी जानारु होये. 29 पोन तियां तियाहा रावणी कोइत कोयो, "आमाअरी रुकाइत जा; काहाके दिही बुडीत गोयुहू आन आंदारो पोडो वोल्‍योहो." ताहां तो तियांअरी रोअलोअ काजे गोयू. 30 जाहां तो तियांअरी टेबलोपोअ रोटू खानू बोठू, ताहां तिये रोटू आथोम तोअयु आन आभार मानित मुड्यू आन तियांहां आपू वोल्‍यू. 31 तेहेलाम तियांआं डोआ उगाड़्या आन तियां तियाहा ओलखीत लेदू, पोन तो तियांआं नजरेम रोत आरतात गोयू. 32 ताहां ते एकानेकाहा कोना वोल्‍या, वाटे सालतामेहें तो आपाअरी गोठी मेकत्लू आन देवोअ वसन फोड़ीत कोत आपत्लू तेहेलाम आपाआ जिवोमेहें ने गिगलाअतोतो के?

33 ताहां ते ताबुड़ उठीत कोइत येरुसालेमोअहें वापिस गोया. ताहां तियांहां आकरा सेला आन तियांअरीइ हाती एकीज जागे टोलवात रोल्‍ये मिल्‍ये. 34 सेला आन बाकी जोएं कोने वोल्‍ये, "खोरीज प्रभु जिवित उठ्युहू! आन तो शिमोनोहो देखाअयुहू."

35 फाश्याआ तियां बेन सेला वाटे कि ओवो तो कोत देखाड़्यो, आन रोटू मुड़त्लू तेहेलाम तियाहा केहें कोइत ओलख्यु तो तियां कोत देखाड़्यो.

36 ते ए गोठी तियांहां कोत आपत्ला तेहलाज मेहें ईसु तियांआं विसमेहें उबू रोयू आन तियांहां कोयो, "तुमुहूं होक मिले."

37 ते धिमकाअया आन बिया. तियांहां एहेलोह लागो के, ते पुतोहो देखताहा. 38 पोन तिये तियांहां कोयो, "काहा एहेलाहा धिमकाअला ए? तुमाआं मोनोम सौंसू काहा आयू? 39 आंय तोज होय के बिहीरु होय, माआं आथेन गुडा सापलीत पाला? काहाके पुतोअ ताम आडे आन माहां नाहां रोतो."

40 एहें कोयोन ताहरुहू तो तियाआ आथेन गुडा देखाड़्या. 41 तेबी तियांहां विश्वास ने बोहतुतो, काहाके ते जुदी खुसीम ओते, आन बोगलात गोयेते. ताहां ईसु तियांहां फुशो, "इंहीं तुमापोअ खाअलोअ काजे काविंहीं होय के?" 42 ताहां तियां पुजल्‍या मासाआ डुनकू आप्यू. 43 तिये तो आथोम लेदू आन तियांआं सामने खादू.

44 ताहां तिये तियांहां कोयो, "ए गोठी जे आंय तुमाअरी ओतू ताहां कोयीते, ते मोशेए कायदाअ पुस्तक, भविश्यवक्ताआ लेख्यो आन भजने यांमेहें कोयीही ते पुरी ओवुहूं जोवे."

45 तिहींइं फासाड़ी देवोअ वसन समजीइलोअ काजे तिये तियांआं मोने उगाड़्ये. 46 आन तियांहां कोयो, "एहेलोह लेख्योहो के, ख्रिस्ताहा दुख वेठाअहूंज जोवे, आन मोल्याम रोत तीन दिहोम फाशोअ जिवीत उठुहूं जोवे, 47 आन पापोंअ माफीइ कोअते येरुसालेम रोत सुरुवात कोइत आखी दुन्‍यामेहें तियाआ नावो वाअहीं मोन फिरावोअ आन गुनाआं माफीइ परसार ओवुहूंज जोवे. 48 तुमू यीं गोठीइ पुरावू होये. 49 आन पाला, माआं आब्हे जो वायदो आप्योहो, तियाहा आंय तुमापोअ मोकलिहीं; पोन जाअहूं जाआं तुमू होरगाआ सेक्ती वाअहीं ने पोआत जाहा, ताअहूं जाआं या होयरोहो सोड़ीत मा जाहा."

50 ताहरुउ ईसु तियांहां बेथानी होयरोअहीं जाआं लेत गोयू, आन आथ उसा कोइत तियांहां आशिर्वाद आप्यू. 51 आन आशिर्वाद आपतू. जात तियांहां सोड़ी देदे आन तो होरगामेहें विसाइत गोयू. 52 ताहरेए तें तियाआ भक्ती कोअयी आन जुदे खुस ओत कोइत येरुसालेमो मेहें जाते रोये. 53 आन तें मंदिरोम कायम देवोअ स्तुती कोअते रोये.