लुक 8

27 जाहां ईसु तालावोअ मेरे उतर्‍यू, ताहां तिया होयरो मेर्‍योअ पुतें लागलो एक माहुंउं तियाहा मिल्‍यो, जाअखीलाहा दिही ओत गोयाते तिये आंगड़े ने पेवयेते आन कोअमेहें बी ने पोन माहणोमेहें रोया कोअतोतो. 28 तो ईसुहू देखीत किगल्यो आन तियाआ गुडाअहीं निसे पोड़ीत, जोरमेहें आअड़ीत कोयो, "ए ईसु, वोडाम वोडा देवोअ बेटाह्हा, ताआन माआं की लेणो-देणो? आंय ताहूं रावणी कोअहो के, माहूं तारास मा देही." 29 काहाके ईसु तिया एठा आत्माहां तिया माहूंम रोत निहीत जाय तेहें आदेश आपतुतो, माहें तियाहा ताल-ताल हाकले वाअहीं आन बेड़ी वाअहीं बांदतेते, तेबी तिया बांद्‍ल्‍याहा तों तोड़ीत टाकतोतो आन पुत तियाहा जंगलो मेहें लेत फिरतुतो.

30 ईसु तियाहा फुशो, "ताआ नाव कि होये?"

तिये कोयो, "सैन्य" काहाके जाअखीलेहें पुतोअ आत्में तियामेहें फोहीत रोयेते. 31 आमुहूं उंडा खायाराम जाअलोअ आदेश मा आपिही कोत तियां पुतों ईसुहू रावणी कोअयी.

32 तिहीं भुंडड़ाआ एक वोडु टोलू सोर्‍या कोअतुतो, तियाहा कोत ते पुतें तियां भुंडड़ामेहें फोहीइलो काजे रावणी कोअयी. आन तिये तियांहां जाअहूं देदे. 33 ताहां तें पुतें तिया माहूंमेहें रोत निहींत कोइत भुंडड़ामेहें गोये, आन तो भुंडड़ाआ टोलुज डोगोअ तोड़ी पोअ रोत उडीत वोडा तालावोमेहें पोड़्यू आन बुडीत मोयू.

34 ते सारवाली ओं देखीत कोइत नाठा आन होयरोम आन गाँवोम जात कोइत ए बातमी कोत देदी. 35 ताहां माअहें कि ओवलो तो पाले निहींये. आन जिया माहूंमेहें रोत पुते निठेते, तियाहा ईसुउ गुडाअहीं सुद्दीपोअ बोहीत रोल्‍यो देखीत कोइत बिये.