1 हुसताअरीही मामार डाया पुंजारा, डायहां, आन कायदाअ मास्तरहों, आन पुरु पोन्सूज निर्णय लेदो. ईसुहू बांद्यू, आन तियाहा लेत जात कोइत पिलातोअ आथोम होपी देदू. 2 पिलाते तियाहा फुशो, "तू यहुदीइ राजा होय के?"

तिये तियाहा कोयो, "तूज सोताह कोहे."

3 डाया पुंजारा तियापोअ वारुज गोठीइ आरोप लागाड़ताते. 4 पिलाते तियाहा फाशोअ फुशो, "केहें तू कीज उत्तर नाहां आपतू के, पाल, एं तापोअ केतीही गोठीइ आरोप लागडतेहे?"

5 ईसु तिहीं रोत कीज उत्तर ने आप्यो; पिलात जाआं जुदू बोगलाईत गोयू.

6 पिलात तिया तिवारोम कोडा बी एका गुनेगारोह तियांआं काजे सोड़ी देतुतो. 7 जियां दोंगा मेहें खुन कोअयोतो तिहीं मेर्‍युउ बरब्बा नावोअ एक माटी ओतू 8 आन गर्दी उसे जात कोइत रावण्या कोइ वोल्‍यी, के जेहें कोइत तु आमाआं काजे एता वोर्ह्यों कोअतू आयू तेहेंज कोइत कोअ. 9 पिलाते तियांहां कोयो, "आंय यहुदीइ राजाहा सोड़ी देंव एहेलिही तुमाआं इश्शा होय के?" 10 काहाके तियाहा मुंदू ओतू के डाया पुंजारा आद्रायी वाअहीं तियाहा तोआड्युतो.

11 पोन डाया पुंजारा माअहोंहों रोढे आवाड्‍ये के तो बरब्बाहाज तुमाआं कोअते सोड़ी देअहूं जोवे. 12 एहेलोह उनाइत पिलात फाशुउ तियांहां फुशो, "ताहां जियाहा तुमू यहुदीइ राजा कोतेहे तियाहा आंय कि कोओ?"

13 तें फाशेए आअड़्ये, "तियाहा क्रुस खांबो पोअ टांगी देवा!"

14 पिलाते तियांहां कोयो, "काहा? ये कि बाक्तो कोअयोहो?"

पोन तें फाश्येए बी आअड़्ये, "याहा क्रुस खांबो पोअ टांगी देवा!"

15 ताहां पिलात माअहोंहों खुस कोइलोअ इश्शा वाअहीं बरब्बाहा तियांआं कोअते सोड़ी देदू, आन ईसुहू सापका देत कोइत क्रुस खांबोपोअ टांगेतेहें काजे होपी देदू.

16 सेयनिक ईसुहू राजवाड़ाआ मांयते खोलीमेहें लेत गोया, तियी खोलीइ नाव प्रीटोरियम ओतो, आन पुरी तुकड़ीही हादीत लेतावया. 17 ताहां तियां ईसुहू जामण्यो आंगड़ो पेवाड़्यो आन काटाआ पागड़ी गुथीत कोइत तियाआ मुंडोपोअ मिकी देदी, 18 एहें कोत वोंदा वोल्या, "ए यहुदीयांआं राजा सलाम!" 19 ते तियाआ मुंडोपोअ बुरवाड़ा वाअहीं देता जात तियाआ सोबीपोअ थुपताते, आन टोसणे पोड़ीत तियाहा वोंदताते. 20 जाहां ते तियाआ अपमान कोइत सुक्या, ताहां तियाहा पेवाड़ल्यो जामण्यो आंगड़ो काडीत तियाआ आंगड़ो पेवाड़ी देदो; आन ताहां क्रुस खांबोपोअ टांगीइलो काजे बारथे लेत गोया.

21 अलेक्झांडर आन रुफुसोअ आब्हू शिमोन, तो एक कुरेनी ओतू, तो गांवोंअहें रोत आवत्लू तेहलुज तेहेंज रोत निहींयू, तियां तियाहा क्रुस खांब आखलीत जायतेहें काजे जबरजस्तीज तोअयु. 22 ते ईसुहू गुलगुता नावोअ जागे लेत आवया जियाअ अर्थ मुनकाअ खोबज्याअ जागू होय. 23 तिहीं तियाहा मोगो मोगो गुंदाअनारु रोह पेलीत दाराक्शाआ रोह आपा वोल्‍या, पोन तिये ने पिदू. 24 तिहीं रोत तियाहा क्रुस खांबो पोअ टांगी देदू आन तियाआ आंगड़े तियां वाटीत लेदे, आन कोडो कि लेनारो होय तो पालिइलोअ काजे तियां सिट्टी फडकावयी.✝15:24 भजन 22:18 25 दिहेए नोव वाज्येते जेहेलाम तियां तियाहा क्रुस खांबोपोअ टांग्यू. 26 तियाआ विरुद्दाम एकी पाटी पोअ लेख्योतो, "यहुदीयांआं राजा" 27 तियाअरी बेन डाखा बी क्रुस खांबोपोअ ओता, एक तियाआ हाजाड़्यीइ वोगेहे आन बिहीरु बांगाड़्यीइ वोगेहे. 28 ताहां पवित्र शास्त्राअ ओं वसन पुरो ओवो के, तियाआ गणती डाखुमेहें ओवी.

29 आन तियाआ जागे रोत वाटे लागनारे माअहें तियाआ निंदा कोअतेते आन मुनके कुटावी कुटावीइ कोतेते, आरे वा! तुज तोम ना मंदिरोहो ओदारीत कोइत तीन दिहोम फाशुउ बोणावनारु! 30 क्रुस खांबोपोअ रोत निसे उतर आन सोताआ जिवोह तेंव वासाड़!

31 एहेंज कोइत डाया पुंजारा आन कायदाअ मास्तरहों बी ईसु अपमान कोअयू. ते तियां तियांआज कोना वोल्‍या "बिहीराहा वासाड्या पोन सोताआ जिवोह ने वासाड़ीत सेकत्लू! 32 ओमे या ‘ख्रिस्त’ आन इस्राएलोअ राजाहा क्रुस खांबो पोअ रोत निसे उतरुहूं दे, एताआ काजे के आमू ओं देखीत भरिवसू कोइत सेको."

जियांहां तियाअरी क्रुस खांबो पोअ सोढ़व्याते, तियां बेनू बी ईसुउ निंदा कोअयी.

33 ताहां पुरा मुलखोमेहें दिहेए वेले जाआं आंदारो टापाइत रोयो. 34 दिहे तीन वाजता ईसु जोरेज आअड़ीत कोयो, "इलोई, इलोई, लमा शबकतनी." मोन्ज्ये "माआं देवा, माआं देवा, तुमे माहूं काहा सोड़ी देदू?"

35 जें आहने उबे रोयेते, तिहीं मेर्‍येए थोड़हे माअहें उनाअये, ताहां तियां कोयो, "होंबला, ओ एलियाहा हादेहे." 36 एक जोंअ गुगदीइतुज गोयू. तिये कडवा-खाटा रोहोम स्पंज बुडाड़ीत पिगव्यू. आन तो बुरवाडाआ डांडा पोअ मिकीत कोइत ईसुहू पियतेहें काजे आप्यू आन कोयो, "माताअहूं, याहा निसे उतारीइलो काजे एलिया आवेहे के नाहां तो आपू पालत्ला."

37 ताहां ईसु जोरमेहें आअड़ीत रोड़्यू आन जिव सोड़ी देदू.

38 ताहां मंदिरोअ पोड़दू उसे रोत निसे जाआं फाटीत कोइत बेन तुकड़ा ओत गोयू. 39 सैनिकहोंअ एक आधिकारी जो ईसुउ सामने उबू रोत रोयुतो, तियाहा आअड़ीत केहें कोइत जिव सोडत्लू तो देख्यू. ताहां तिये कोयो, "ओ माटी खोरीज बी देवोअ बेटुह्हू ओतू!"

40 थोडही बोईं जे तिहीं उबी रोत रोयीते तिहींमेएं मरिया मग्दालिनी, हाना याकोबोअ आन योसेफोअ आयही मरिया आन सलोमी ए ओती. 41 ईसु जेहेलाम गालील मुलखोमेहें ओतू ताहां ए आखी बोईं तियाआ सेवा कोअतीते; आन येरुसालेमोम बिहीरी बी बोईं ओती.

42 तेहेलाम दिही बुडीत गोयूतो आन आरामोअ दिहोअ*15:42 आरामोअ दिहोअ यहुदी माअहोंअ आरामोंअ दिही. आगल्‍युउ दिही मोन्ज्ये तियारी कोइलोअ दिही ओतू. 43 अरमितीवालू योसेफ ओतू, तो वोडा पोन्साअ सदस्य ओतू आन तो सोताह देवोअ राज आवेतेहें काजे वाट जोवतुतो. तो योसेफ हिम्मतो वाअहीं पिलातोअ जागे गोयू आन ईसुउ तोड़ माग्यो. 44 ईसु एतू वेगु केहें कोइत मोयु तों देखीत पिलात पोंगलाईत गोयू; आन तिये सेयनिकोअ आधिकार्‍योहो हादीत कोइत फुशो. ईसुहू मोल्‍याहा जाअखीलिही वेल ओवली के केहें? 45 आधिकार्‍ये कोल्‍यी खबर उनाइत कोइत पिलाते योसेफोहो तो तोड़ आपी देय तेहें कोयो. 46 ताहां योसेफ हाजामेर्‍योओ एक साअको वेसातो लेदो, आन तोड़ोहो क्रुस खांबोपोअ रोत उतारीत कोइत तिया साअकामेहें गुंउंटावित तियाहा तिये खड़कामेहें खुउंल्‍या माहणोमेहें मिक्यो. तिहीं रोत तिये माहणोअ दोओपोअ एक डोण होरकावी देदू. 47 ईसुहू का मिकतेहे तों मरिया मग्दालिनी आन याकोब आन योसेफोअ आयही मरिया नेहें पाल्या कोअतीते.