1 की ओवे माआं, आंय वेल जावाड़ी देदी! काहाके आंय तियांआं होस ओत गोयू, जेहें कोइत उनालाम फलवे पाड़ीत लेदे तिहीं रोत एक बेन रोत जातेहे, आन दाराक्शे वितीत गोये तिहीं रोत हेरवू रोत जाहे तेहलुहू आंय ओत गोयुहू; माहूं गोमे एहलुहू दाराक्शाआ एखु गुम्सू जाआं ने सापड़्यू आन पेल्ला बारोअ अंजीरोअ एखु फलवो माहूं ने सापड़्यो. 2 इमानदार माअहें धरतीपोअ रोत आरवाइत गोयेहे, आन मोनव्योमेहें एक बी सिदो माअहुंउं ने रोयो; आखे माअहें खुन कोइलाअ उद्देशोवाअहीं हेंहींत रोतेहे, आन जाल मांडीत कोइत जिवज्योअ पायहोहो हावोज बोणावतेहे. 3 तें तियांआं बेनु आथोवाअहीं मोन लागाड़ीत खाराब कामे कोअतेहे; आधिकारी आन न्यायाधिश लास खाअहूं तियार रोताहा, आन वोडे माअहें तियांआं पोट्टोज कोअतेहे, एहें कोइत एं आक्खे मिलीत कोइत ठोगोअ सालाड़तेहे. 4 तियां मेऱ्येए जें आखा रोत हाजे ओते, तें कड़वा साड़ोअ होस दुख आपनारो होय, जो आखा रोत सिदो होय, तो काटावाली वाड़ी रोत बी खाराब होय. ताआ जागल्याहा कोल्यु दिही मोन्जे ताआ डोंडोअ दिही आवित लागुहू. ते ताअहांज फोगजीत जाय. 5 दोस्तीपोअ विश्वास मा कोअहा, खास जोड़ीदारोपोअ बी भरिवसू मा मिकहा; एतोज नाहां पोन तुमाआं मेराली लाडीइरी बी सांबालीत रोजा. 6 काहाके पोऱ्यु तियाआ आब्हाअ मानपान नाहां कोअतु, आन पोऱ्यी आयहीइ मानपान नाहां कोअती, आन वोवड़ीह्ही हावेह्हेए सोबी लागेहे; आन मोनव्योअ दुस्मोन तियाआ कोऱ्येएज माअहें रोतेहे.✝ 7 पोन आंय यहोवा देवोअहें नजर टाकोहो, आंय माआं तारनारा देवोअ वाट पालोहो; माआं देव माआं उनाय.

8 ए माआं दुस्मोन! माहूं पालित खुश मा ओवीही; काहाके आंय पोड़ीहीं तेबी फाशुउ उठीहीं; आन आंय आंदाराम पोड़ीहीं तेबी यहोवा देव माआं काजे उजालो होय. 9 आंय यहोवा देवोअ विरुद्दाम पाप कोअयुहू, जाअहूं जांआं यहोवा माआं आडवारी ने पोड़े, आन माआं वोगेहे निर्णय ने आपे, ताअहूं जांआं माहूं तियाआ खोत वेठुहूंज पोड़े. तो माहूं उजालाअ जागे जांआं पोताड़े; आन आंय तियाआ न्याय पालिहीं. 10 ताहां माआं दुस्मोन जो माहूं ओं कोहे के, ताआ यहोवा देव का टोलीत गोयु, तें बी तियाहा पाले आन लाजे वाअहीं सोब टापे. आन आंय माआं डोआवाअहीं तियाहा पालिहीं; ताहां तें वाटेए मेरेए गाराआ होस टाकी देवाय. 11 ताआ होयरोअ वाड़ बांदीइलाआ दिही आवे, तेदिहीं ताआ हींव पोली ओवे. 12 तेदिहीं आश्शूर होयरोम रोत्ते मिसर देसोम जांआं, आन मिसरोम रोत्ते फरात नोयीइ जागे जांआं, आन एकी दोऱ्या रोत्ते बिहीरी दोऱ्या, आन एका डोगोअ रोत्ते बिहीरा डोगोअ रोनारे माअहें ताआ जागे आवनारे. 13 तेबी धरतीपोअ रोनारा वाअहीं आन तियांआं खाराब कामोअ फलोअ वाखरी उजाड़ुज रोय.

14 सोताआ माअहोंअ राखवाली आन सोताआ इसामेहें जोड़ल्या मेडाआ टोलाआ राखवाली ताआ डेंगारी वाअहीं कोअजी, जे उजाड़ जागामेहें आन हाजा जागाआ विसमेहें रोतेहे. तियांहां पेल रोतुज जेहेलोहो बाशान आन गिलादोअ जागामेहें सोरुहूं द्या.

15 जेहेलेहे मिसर देसोम रोत ताआ निहीत आवीइलोअ दिहोमेहें बोगलाइलाअ कामे देखाड़्ये, तेहेलेज ओमे आंय तियाहा देखाड़ीहीं. 16 आक्खे देसे ते केतेहे बी सेक्तीमान काहा नाहां रोते, ते इस्राएल देसोहो पालीत कोइत बोगलाइत जाये. आन तियांआं कानोअ पोड़दा फाटीत जाय; आन तियांआं सोबीम रोत आवाज ने निहे. 17 ते होरतींडनारा जिवतोरोअ होस, हापोअ होस तुलो साटे, आन ते कापते- कापते तियांआं दोराम रोत बारथे निहे. आन ते बिते-बिते आपाआ यहोवा देवोअ जागे जाये; ते ताआ ताके कापे. 18 ताआ होसऱ्युउ एहेलुहू देव का होय जो पापोहो माफ कोए आन सोताआ खाजगी वासाअला माअहुंउं पापोहो टापी देय? तु सादाज नाहां खोत कोअतु रोतु, काहाके तु दया वाअहीं खुस ओवेहे. 19 तु आमापोअ फाशुउ दया कोअही, आन आमाआं पापोअ कामोहों सोताआ गुडाआ थुड़ी सेंदीत टाकही, तु आमाआं आखा पापोहो उंडा दोऱ्यामेहें टाकी देही. 20 तु याकोबोअ बाप्तिमेहें ते खोरी गोठ कोअही, आन अब्राहामोअ बाप्तिमेहें ते मेर देखाड़ही, जियीइ शप्पत तुमे जुनावाडोअ दिहोम रोत्ते ओमे जाआं आमाआं वेगाआ डायहांअरी खातु आयुहू.