Yohana 20

Yesu amuawiiya Maliamu kulawa Magidala

11 Maliamu kawa kagooka chongoi ya mbia aiya, uku akekwiiya nee enama na kusungiia he mbia, 12 akaona wandima wa uwanga wa Muungu waidi, wekuvaawo magwanda yekung’aayo muno, wekaa hada wekuwaho mwii wa Yesu ugonezwa yumwe he mtwi, wa kaidi he miundi. 13 Awo wandima wa uwanga wa Muungu wakamuuza, "Mmaa kwa mbwai waiya?"

Nae akawatambaisa, "Wamuusa Zumbe yangu na khimanya wekumwiikako!"

14 Ekugombekaho ayo, akahituka mgeeka akamuona Yesu kagooka aho, akini kheekumtanga inga ni Yesu. 15 Yesu akamuuza, "Mmaa waiya mbwai? Wamwoondeza ndai?"

Maliamu akamamakhanya uyo nee mgookezi wa kamnda akamwamba, "Mkuu inga ni weye mwekumuusa, nambia wekumwiikako, nami ninda nimdoe."

16 Yesu akamwetanga, "Maliamu!" Nae Maliamu akamhitukia Yesu na kumwamba kwa Kiebulania, "Laboni" mana yakwe, "Mhinyi."

17 Yesu akamwamba, "Usekunitoza khizati kuita uwanga kwa Tate, akini uite kwa wandugu zangu ukawambe, naita uwanga kwa Tate yangu na Tate yenu, Muungu yangu na Muungu yenu."

18 Ivyo Maliamu wa mzi wa Magidala akaita kuwamba wada wahina kuwa kamuona Zumbe na kuwa nee kamwamba ivyo.