1 आव रोः हैवार्डे ओखेमो पाना येसुये स्वर्गडे रःङडे हैओवारो, "ए बाबु, समय केरिडे ले, नज़ालो ओमहिमा ओटाकं, होसोनो नज़ाये नमहिमा ओसोटोनोकं। 2 नङ नज़ालाई स्यान्टै मीराई याक्याङ तर्ट अडिकार याडे ननै, कडालेकं नङ नयोव खर्कज़ माखेम्ने जीबन स्यान्टै मीरंलाई ओयोडुवरंकं वार्डे। 3 आबो खर्कज़ मासिने जीबन आवज़, नोराई नङ, टोबोज़ाज़ सत्य परमेस्वरलाई ओसरेःसनरंकं, होसोनो नङ नपरिःङो येसु ख्रीस्टलाई गसरेरंकं। 4 जो येःन नङ ङालाई नयाङो, नो पुरा झैडे ङा नङलाई प्रिठीबीलं नमहिमा टाने झैडेङानै। 5 आबो ए बाबु, प्रिठीबी उसिर्जिने भन्डा ङाडे नङाःकं ङा जो ङामहिमा लेव, हैजैडे हो महिमा ङालाई याङ।"

6 "प्रिठीबीलाम जो मीरं ङालाई नयाङोरं, नोरंलाई ङा नमिन सटन्डे ङानैड्योरं। नोरं नमीरंज़, नोरंलाई नङ ङालाई नयाङोरं, होकाम नोराई नबचन ठैज़्यारं। 7 होकाम नोराई नङ ङालाई नयाङो स्यान्टै रोः नङ लेवङाम राव ची वार्डे याबुझिव। 8 कडालेकं जो बचन नङ ङालाई नयाङो, ङा नोरंलाई याडेङानैरं, होकाम नोराई नो ग्रहन डाडे नैरं। ङा नङ लेवङाम ङाराव ची वार्ने नोराई डस्साज़ सन्डेनैरं, होसोनो नङ ङालाई नपरिःङसोङो ची वार्डे नोराई बिस्वास डाडेनैरं।

9 ङा नोराई यालागिटं बिन्ती प्रार्ठना ङाडोये, प्रिठीबीलो ओलागिटं ङा बिन्ती प्रार्ठना ङाम्डो, हैनि पनि नोराई यालागिटं, जोरंलाई नङ ङालाई याडे ननैसङ। कडालेकं नोरं नङ नमीरंज़। 10 ङा लेवकं स्यान्टै जो लिज़्या नमीज़, होसोनो नङसं जो लिज़्या ङामीज़। ङा ङामहिमा नोरं लेवटं रःन्डेले।" 11 "ङा नङ लेवङ ङारारिज़्या। आबो ङा प्रिठीबीलं भ्या समय समं लेनेङामले। हैनि पनि नो मीरंके प्रिठीबीलंज़ लेनेलेरं। ए चोखो बाबु, नोरंलाई चावसं जोगैरं। नोरंलाई नमिनलो ओसक्तिये चावसं नैरं जो मिन ङालाई याडे ननैसङ, नङ सोनो ङा टोबो गेटाव मान्टिज़ नोरं पनि टोबोज़ टानेलेरं। 12 जोका समं ङा नोरासं ङालेव, नङ ङालाई नयाङो नमिनङाम नोरंलाई ङाजोगोयोरं। नोरंमढ्येलाम बिनासलो ओज़ा बाहेक उरु काङ्का पनि नास माटारंये, कडावार्क सास्त्र पुरा टाव परिने लेव।"

13 "आबो ङा नङ लेवङ ङारारिज़्या, ङा प्रिठीबीलं ङालेकं आव रोः ङा ङापाङये, ङा ङाआनन्ड नोराई यायुङलं स्यान्टै किसिमये पुरा ओटाकं। 14 ङा नोरंलाई नपोयो बचन ङायोवरं, प्रिठीबीये नोरंलाई उघिनोयोरं कडावार्क नोरं ङा मान्टि प्रिठीबीलारं माङ्करं ची। 15 नङ नोरंलाई प्रिठीबीलाम लाङरं वार्डे ङा बिन्ती प्रार्ठना ङामडो, नोरंलाई डुस्टङाम चावसं नैरं। 16 नोरं प्रिठीबीलारं माङ्करं ची, जो स्याव ङा पनि प्रिठीबीला माङ्क। 17 नोरंलाई सत्यलं चोखो झैरं, नबचन सत्य ची। 18 जो स्याव नङ ङालाई प्रिठीबीलं नपरिःङसोङो, ङा पनि नोरंलाई प्रिठीबीलं परिःङडेङानैरं। 19 नोराई यालागिटं ङा ङालाईज़ चोखो ङाजैज़्या, कडालेकं नोरं पनि सत्यलं चोखो गटारंकं।"

20 "ङा आवराई यालागिटंया मान्त्रा बिन्ती ङाम्डो, आवराई यालाङो सोर ठैडे ङालाई बिस्वास डानेराई यालागिटं पनि बिन्ती ङाडो, 21 कडालेकं नोरं स्यान्टै टोबो गटारंकं। ए बाबु, जोस्याव नङ ङासं नलिज़्या, होसोनो ङा नङसं, हैजैडे नोरं पनि गेलेवडे गटारंकं, होसोनो नङ ङालाई नपरिःङसोङो वार्डे प्रिठीबीये बिस्वास गोडोवकं। 22 जो महिमा नङ ङालाई नयाङो, ङा नोरंलाई याडे ङानैरं कडावार्क गे टोबो गेटाव मान्टि नोरं पनि टोबो गटारंकं। 23 ङा नोरासं, नङ ङासं, होकाम नोरं पुराज़ टोबो ओटारंकं, होसोनो नङ ङालाई नपरिःङसोङो ची, ङालाई मया नडाङो स्याव नङ नोरंलाई पनि मया नडोवरंज़ वार्डे प्रिठीबीये ओसोनोकं।"

24 "बाबु, ङा इछ्या ङाडो, नङ ङालाई नयाङो मीरं ङा जोङ ङाले ङासंज़ ओलेरंकं, होसोनो ङामहिमा ओरःङरंकं, जो महिमा, प्रिठीबी उसिर्जिव भन्डा ङाःडेकाम ज़ ङालाई मया नडाङो कारनये नङ ङालाई नयाङो ची।"

25 "नङ सहि निया डाने बाबु, प्रिठीबीये नङलाई मासरेःसोनो, ङा के नङलाई ङासरेःसन, होसोनो नङ ङालाई नपरिःङसोङो ची वार्डे आवराई सनरंये। 26 नङ ङालाई नडाङो मया नोराई लेवटं पनि ओलेकं, होकाम ङा नोरं लेवटं लेव ङाढुकं वार्डे नोराई नङलाई सःरेडुने ङाझैसोनो होसोनो अजं पनि यासरेडुने ङाझैसन्ज़्या।"