João 5

रीःलो कुन्डलं सम्ने

1 होकाम, येसु यहुडीराई यापर्बटं यरुसलेमलं ओनाव। 2 यरुसलेमलं भेडा उमिन लेव झलालो ओछ्योकं टोबो कुन्ड ले, नोलो ओगोराटं पाँस गोटा मैरा लेव, नोलाई हिब्रुङाम बेठस्डा डोरंये। 3 नलं स्यान्टै किसिमला रोगीरं, अन्डलारं, लङ्गरारं, आढा याक्याङ सिवरं गलङडे लेरंये। नोरं रीः खाबलाकं छल्किने हो समय केनरंये। 4 कडावार्क स्यान्टैराई भन्डा घ्योव प्रभुलो टोबो ओकटंवाल बेला-बेलाकं रीःलो कुन्डलं झरिडे रीः हल्लैडेवरंये, होकाम रीः उछल्किव पाना जो ङाडे रीःलं पसि, जोस्याव रोगोये ठलिव मी पनि नो समये। *५:४ कोइ पुरानो सर्सिव कितापयालं आव बचन माले

5 नलं अरतिस बर्सकाम ठलिव टोबो मी लेव। 6 येसुये नोलाई नलं गलङडे उलिज़्याव ओरोःङो नो भ्या समंज़ नेटानाव ठलिवज़ ओलेवलेव वार्ने ठा सन्डे येसुये नोलाई हैओडोव, "नङ सम्ने नुयुङ उलिज़्याव रो?"

7 रोगीये येसुलाई हैओडोव, "अँ, प्रभु जो बेला रीः छल्किये ङालाई रीःलो कुन्डलं झाने काङ्का ङामीरं मालेरं, ङा ङानाज़्याकंज़ ङा भन्डा ङाःडे छुटं मी रीःलं नाये।"

8 येसुये नोलाई हैओडोव, "च्याङसिडे नटान सोचैडे नान।" 9 होपानाज़ नो मी ओसोमो, होकाम ओटान घुर्डे नो मी ओनाव।

नोछ्याम यहुडीरं यानाःसिने डिन लेव। 10 हैजैडे नो समो मीलाई यहुडीराई हैयाडोव, "आव के नाःसिने डिन ची, नङलाई टान घुर्ने अडिकार माले।"

11 होये नोरंलाई जबाफ ओयोवरं, "जोये ङालाई ओससम्सोङो होयेज़ हैओडाङो, ‘नटान घुर्डे नान।’"

12 होराई नोलाई यापजोयो, "नङलाई टान घुर्डे बाङन डाने काङ्का?" 13 नो समो मीये नो काङ्का वार्डे मासरेवये, कडालेकं नलं बनै भ्या मीरं यालेवये येसु नलाम नाडे खेम्डे उलिज़्याव।

14 होकाम येसुये नोलाई प्रार्ठना डोने ज़ीःमलं डैसिडे हैओडोव, "रःङ, नङ सम्डेनले फरि पाप टाडो, होकाम नङलाई अजं भ्या माचाव टाटाकं।" 15 ङालाई ससम्नेके येसु ची ओलेवलेव वार्डे नो मीये नाडे यहुडीरंलाई हैओडोवरं।

16 आव कारनये यहुडीराई येसुलाई सहतैने सुरु याडोव, कडालेकं येसुये आव येःन यहुडीरं नाःसिने डिन छ्याम ओडोव। 17 होकाम येसुये नोरंलाई हैओडोवरं, "ङा ङाबाबुये आर्क समं येःन डोज़्याव, ङा पनि येःन ङाडोज़्या।"

18 हैजैडे यहुडीराई येसुलाई सैःने कोसिस याडोव, कडावार्क येसुये यहुडीरं नाःसिने डिन लो ओन्याम ओममानिवयाज़ माङ्क, बुरु ओल परमेस्वरसं बराबर झैसिडे परमेस्वरलाई ङाबाबु ओवारो।

ओज़ालो ओअडिकार

19 येसुये नोरंलाई हैओडोवरं, "सत्य रोः ङा जेलाई हैङाडाच्यो, ओज़ाये ओबाठङ कडि पनि माडोडुव, बुरु बाबुये जो ओडोज़्याव रोःङो हो मान्त्राज़ डोवये, कडालेकं बाबुये जो डोवये ओज़ाये होज़ डोवये। 20 कडालेकं ओबाबुये ओज़ालाई मया डोवये, होसोनो ओबाबुये ओल्ज़ ओडोज़्याव स्यान्टै येःन ओज़ालाई सटन्ड्योवये। आव भन्डा घ्योव येःन ओबाबुये ओज़ालाई डोव परिःङनेले, होकाम जे अचम्ब टानेजेले। 21 कडालेकं बाबुये जो झैडे सिवरंलाई सिवलाम ज्युङडा झैडे ओसोचोयोरं होकाम नोरंलाई जीबन योवरंये, हैजैडेज़ ओज़ाये पनि जोलाई इछ्या डोव, होलाई जीबन योवये। 22 कडालेकं बाबुये काङ्कालो उनियाज़ माडोवये, हैनि पनि स्यान्टै निया डाने येःन ओज़ालाई याडेनोयो, 23 कडालेकं स्यान्टैये ओज़ालाई ओमानिरंकं, जो झैडे नोराई बाबुलाई मानिरंये। ओज़ालाई मामानिनेराई ओल्लाई परिःङने ओबाबुलाई पनि मामानिरंये।"

24 "सत्य रोः ङा जेलाई हैङाडाच्यो, जोये ङाबचन ठोयोये होसोनो ङालाई परिःङनेलाई बिस्वास डोव, नोसं खर्कज़ मासिने जीबन ले, बुरु नो सिनेङाम जीबनलं पसिडेले। 25 सत्य रोः ङा जेलाई हैङाडाच्यो, नो समय रारिज़्या, नो समय आर्कज़, होकाम सिवराई परमेस्वरलो ओज़ालो ओगा ठैनेलेरं, नो ठैनेरं बान्चिने लेरं। 26 कडालेकं बाबुसंज़ जीबन ओलेव, होमान्टि ओज़ालाई पनि ओल्सज़ जीबनलो उरुप टाने अडिकार याडेनोयो। 27 होकाम नोलाई निया डाने अडिकार याडेनोयो, कडालेकं नो मानवालो ओज़ा ची।" 28 "आवटं अचम्ब टामानिच्यो, कडालेकं समय राज़्या, खाडरला लिज़्यावरं स्यान्टैये नोलो ओगा ठैनेलेरं, 29 होकाम चाव येःन डानेरं जीबनलो लागिटं सिवलाम ज्युङडा टानेलेरं, होसोनो माचाव येःन डानेरं डन्ड डैनेलो लागिटं सिवलाम ज्युङडा टानेलेरं।"

येसुलो ओसाची

30 "ङा ङाज़ कडिज़ ङामडोडु। जोस्याव ङाठै, होस्यावज़ निया ङाडोये, होकाम ङानिया ठीकंज़ ठहरिये, कडालेकं ङा ङाइछ्या माङ्क, बुरु ङालाई परिःङनेलो उइछ्या ङामानिये।"

31 होकाम ङा ङाबारेलं गोहाइ ङायोखे भने ङागोहाइ सत्य माटाये। 32 ङाबारेलं गोहाइ याने छुटं लिज़्या, ङा ङासंन, ङाबारेलं होये जो गोहाइ योवये, नो गोहाइ सत्य ठहरिये। 33 "जे युहन्ना लेवकं मीरंलाई पजोयो जिपरिःङोरं, होकाम होये सत्यलो गोहाइ याडेनोयो। 34 ङालाई काङ्का पनि मीलो ओसाची माचाहिये, बुरु जे छुट्कारा डोयोजिढुकं वार्डे ङा आव रोः हैङावार्ज़्या। 35 युहन्ना चाङने सोनो चम्किने टुकि लेव, होकाम जे नोलो उउज्यालोटं टिगिडा टानि पनि जेरेङो।"

36 "होकाम ङासं जो गोहाइ लिज़्या, नो युहन्नालो भन्डा घ्योव ले। कडावार्क जो येःनरं पुरा डाने बाबुये ङालाई याडेनैसोङो, नो येःन ङा ङाडोज़्या, होकाम नोराईज़ बाबुये ङालाई उपरिःङसोङो वार्डे ङाबारेलं गोहाइ योज़्यारं। 37 ङालाई परिःङने ङाबाबुयेज़ ङाबारेलं गोहाइ याडेनोयो। नोलो ओगा जे खर्कज़ जेठोयो माले, होसोनो नोलो उरुप खर्कज़ जेरोःङो माले। 38 नोलो ओबचन जेलेवकं मारहिये, कडालेकं जोलाई नोये उपरिःङो, नोलाई जे बिस्वास जेमडाये। 39 जे सास्त्रटं जिखिमये, कडालेकं नटं खर्कज़ मासिने जीबन डैसि वार्डे हैजेवार्ये। ङा ङाबारेलं गोहाइ याने नो सास्त्रज़, 40 हो टानि पनि जे जीबन डैने ङालेवकं जेमराये।"

41 "ङा मीराई याडोव महिमा ग्रहन ङामडो, 42 बुरु परमेस्वरलो ओमया जे जियुङलं माले वार्डे ङा ङासंन। 43 ङा ङाबाबुलो उमिन्ट ङाराव ची, हैनि पनि जे ङालाई ग्रहन जेमडाङये। छुटं कोइ ओल उमिनसंज़ याराखे भने होलाई ग्रहन डानेजेले। 44 जे कैजैडे बिस्वास जेडाडु, होकाम जे-जेज़ जेमान जिखिमसिये, होकाम नो महिमालाई जे वोल्डे पनि जेमरःङये, जो टोबोज़ाज़ परमेस्वर लेवङाम राये?" 45 "आव टासमझिच्यो, कि ङा बाबुलो ओङाःकं जेलाई डोस लैनेङाले। जेलाई डोस लैनेके मोसा लिज़्या, नोसं जे आस डाडे जेनै। 46 कडालेकं जे मोसालाई बिस्वास जेडाखिन्के ङालाई पनि बिस्वास जेडाङखेहो, कडालेकं मोसाये ङाबारेलं सर्डेनोयो। 47 हैनि पनि जे होये ओसोरो रोःरं बिस्वास जेमडाखे भने, ङारोःटं कैजैडे बिस्वास जेडा?"