Lucas 17

पाप

1 येसुये उसिसरंलाई हैओडोवरं, "पाप डोवपरिःङने परिछ्यारं पक्का पनि रानेलेरं। हैनि पनि बनै घ्योव डुखं रानेले नो मीलाई, जोलो ओकारनये एटाव परिछ्यारं रानेलेरं! 2 जो मीये आव आलिज़ारंलाम टोबोलाई पाप डोव परिःङो, नोलो ओढेङलं रान्ठैलो टोबो ओपाता झुन्डैडे समन्डरलं ख्याने नोलो ओलागिटं चाव टाने ले।" 3 जेलागिटं होस्यार लेच्यो।

"नभाइये अपराड याडोवखे भने नोलाई हक्लै, होकाम नो ओपापलाम यावोलखे भने नोलाई छेमा यो। 4 नभाइये नबिरोडलं टछाटंज़ सात पाला पाप याडोव, होकाम सात पालाज़ वोल्डे राडे ओपापलाम यावोलखे भने नङ नोलाई छेमा डो।"

बिस्वास

5 येसुलो ओसाचीराई प्रभुलाई हैयाडोव, "गे गेबिस्वास बडैडे गयासिके।"

6 प्रभुये हैओडोवरं, "जेसं सुरसुङलो ओसै हालेया पनि जिबिस्वास ओलेखिन् के जे आव ह्वैलो उसिङलाई, ‘नङ आकाम चिसिडे समन्डरलं रुपिसिनान’ जेडोखे भने नोये नो जेरोः ठैने ले।"

टोबो नौकरलो ओयेःन

7 "जे कोइराई जेनौकर येःङ किडे होसोनो ग्वाला नाडे याराखे भने नोये हो नौकरलाई, चानो राडे काङ गज़्योरिके डोवयेडोरो? 8 बुरु ङालाई काङ झैडे गयाङ्के, होकाम नवाम्फो पोसिडे ङा काङ ङामज़्योया समं ङासेवा डो। होकाम नङ नज़्योके, वार्डे है माडोवयेडोरो? 9 होकाम ओअरोयो येःन ओडोव रःङडे नो नौकरलाई स्याबास योवयेडोरो? 10 हैजैडे जेलाई अरैसिव स्यान्टै येःन जेडोव पान्त्रा जे पनि ऐ वार्च्यो, ‘गे के उरु स्यानाव नौकररंज़ ची। गे के गेयेःनयाज़ डाडेगेनै।’"

येसुये डस जना लाई ओससोमोरं

11 येसु यरुसलेमडे ओनाज़्याकं सामरिया सोनो गालीलनि नेसान्डिलाग्यान्टं ओनाव। 12 येसु टोबो नाङखारलं ओनाज़्याकं डस जना कुःरिरासं ओडैसिव। नोरं टाडाङामज़ च्याङसिडे 13 कस्सिडे कीःडे हैयाडोव, "ए येसु गुरबा, गेलाई डया डासि।"

14 येसुये नोरंलाई रःङडे हैओडोवरं, "गनाच्योके नाडे सेवा डोनेरं लेवङ सतन्सिनाच्यो।" नोरं यानाज़्याकंज़ यासमो। 15 नोरंलाम टोबोये ओल ओसोमो रोः ओसोनो होकाम कस्सि-कस्सि किःडे परमेस्वरलो ओप्रसन्सा डोये डोये वोल्डे ओराव, 16 होकाम येसुलाई ढन्याबाड याडे ओखङटाम ढो ओडोव, नो मी टोबो सामरी लेव। 17 येसुये हैओवारो, "होकाम समोरं डस जनारं माङ्क डोरो? उरु नौ जनारं कान्डे यानाव? 18 होकाम वोल्डे राडे परमेस्वरलो ओप्रसन्सा डाने आव बिडेसी काम उरु काङ्काज़ याम्लेव रो?" 19 होकाम येसुये होलाई हैओडोव, "गच्याङसिनके होकाम नयेम्डे गनानके। नबिस्वासये नङलाई ससम्डे नैसोनो।"

राज्य राने

20 परमेस्वरलो ओराज्य खर्क रा वार्डे फरिसीराई यापजैकं येसुये हैओडोवरं, "परमेस्वरलो ओराज्य रःन्ने झैडे माराये, 21 मीराई आङं लिज़्या! नि होङ लिज़्या! वार्डे हैवार्नेलेरं कडालेकं परमेस्वरलो ओराज्य जेखार्लज़ लिज़्या।"

22 येसुये उसिसरंलाई हैओडोवरं, "ऐटानाव डिनरं पनि राने लेरं मानवालो ओज़ालो टछा टानि पनि उडिन रःङने युङ डाने जेले हैनि पनि जे रःङने जेमले। 23 मीराई जेलाई येसु के आङं ची लिज़्या नि होङं ची लिज़्या, डाने लेरं हैनि पनि जे टानाच्यो, नोराई याछिन्ट टाबाच्यो। 24 कडालेकं गोङज़ा उमिल्किकं नमटं टङ्ङा ओछ्योङाम छुटंङा ओछ्यो समं उज्यालो झोयो। हो मान्टिज़ मानवालो ओज़ा ओराकं पनि टानेले। 25 हैनि पनि मानवालो ओज़ाये ङाःडे बनै भ्या डुखं डैनेले होकाम आव पुस्ताला मीराई चाव ङप्सिने मालेरं।" 26 नोआलो ओपालालं जोस्याव ओटाव, मानवालो ओज़ालो ओपालालं पनि हेटावज़ टानेले। 27 नोआ जाँस ज्युङलं उम्पसिया समं मीरं ज़्याने ओँने बेह्याँ डोने याडोज़्याव। होकाम नमं डिम्डे भलं राडे रीः बडिडे स्यान्टैलाई नास ओझोयोरं।

28 "लोतलो ओबेलाकं पनि नैज़ ओटाव, मीरं ज़्योवग्यान, ओँवग्यान याडोज़्याव, बैपार डोवग्यान, अन्न वावग्यान होसोनो ज़ीःमरं झोयोग्यान याडोज़्याव। 29 जो छ्याम लोत सडोमलाम उपुलुव, होछ्याम नमटाम मेः सोनो गन्डक वाडे स्यान्टैलाई नास ओझोयोरं।"

30 "मानवालो ओज़ा रःन्ने छ्याम ऐटावज़ टाने ले। 31 हो छ्याम जो मी ज़ीःमलो ओपटाहाटं ले हो मीलो ओसमानरं ज़ीःमलं यालेखे भने नो चनाने मेलं टाझरिकं। हैजैडेज़ येःङला लेव पनि वोल्डे ज़ीःम्डे टाराकं। 32 लोतलो ओज्यालाई चेटैच्यो! 33 जोये ओपोहोन जोगैने पानो, हो सिनेले, जो सि, होलो ओपोहोन बान्चिनेले। 34 ङा जेलाई हैङाडाच्योज़्या, नोछ्याम रिलं नेबऱ्याङनि टोबो पोटंज़ ऐस्याव टानेलेनि नोनिलाम टोबोलाई लाङ्डे छुटंलाई ख्यानैसिनेले। 35 नेबऱ्याङ मेमानि बोलोङज़ रान्ठै नेहेज़्याकं टोबोलाई लाङ्डे छुटंलाई होकंज़ ख्यानैसिने ले। 36 [नेबऱ्याङ मीनि येःङलं बोलोङ टानेलेनि, नोनिलाम टोबोलाई लाङ्डे छुटंलाई होलंज़ ख्यानैसिने ले।"]

37 होकाम फरिसीराई येसुलाई यापंजोयो, "काङंखेने प्रभु?"

येसुये नोरंलाई हैओडोवरं, "जोङ सिव क्याङ ले होङ गिड्डरं डुप्सिरं।"