Lucas 21

रान्डिनिलो ओभेटी

1 ढनीराई प्रार्ठना डोने ज़ीःमला डान नैने जालं याभेटी याचरैज़्याव येसुये ओरोःङोरं। 2 येसुये टोबो गरिब रान्डिनिये नलं नेपैसा ओचरोयो पनि ओरोःङो। 3 होकाम येसुये हैओवारो, "ङा डस्साज़ जेलाई हैङाडाच्योज़्या, आव गरिब रान्डिनिये स्यान्टैराई भन्डा भ्या चरैडे नोयो। 4 कडालेकं आव स्यान्टैराई के यासं लेव भ्या सम्पतिटाम हाईडे चरैडेनैरं, हैनि पनि आवये गरिब टाडे पनि ओल्स लेव भरि स्यान्टै चरैडे नोयो।"

प्रार्ठना ज़ीःम नास टाने बारेलं येसु ओपाङो

5 होकाम कोइ-कोइराई चा-चाव लुङरं सोनो डानलं राव बस्तराई सजैसिव प्रार्ठना डोने ज़ीःमलो ओबारेलं रोः याडोव। होकाम येसुये हैओडोवरं, 6 "जे जो जेरःङज़्या, टछा ऐटाव समय रानेले नोरं स्यान्टै टाःडे टोबो लुङ तर्ट छुटं लुङ पनि बाङ्की रहिने माले।"

आफंट सोनो बिफंट

7 नोराई येसुलाई यापजोयो, "गुरबा आव स्यान्टै नपाङज़्याव रोःरं खर्क टाने लेरं? होकाम आव रोःरं पुरा याटारिकं खैटाव चिन्नरं टाने लेरं?"

8 येसुये हैओडोवरं, "होस्यार लेच्यो, जेलाई काङ्काराई पनि जियुङ टाबलेड्याच्योरंकं। ङामिन्ट भ्याबिछुरं ‘ङा येसुज़’ होकाम ‘बेला नजिकं राडेले,’ वार्डे हैवार्रये। नोराई याछिन्ट जे टाबारिच्यो। 9 जे लराई ओटाज़्याव सोनो चाव माचाव रोःरं ठैनेजेले हो बेलाकं टाछेच्यो, कडालेकं ङाःडे ऐटाव घटनारं टानेज़ले, हैनि पनि होपान्त्राज़ समय खेम्ने माले।"

10 होकाम येसुये नोरंलाई हैओडोवरं, "डेस डेसलो उबिरोडलं सोनो राज्य राज्यलो उबिरोडलं च्याङसिनेले। 11 घ्यो-घ्योव भुम्चालरं नानेले। कोइ-कोइ पोयालं अनिकाल सोनो घ्यो-घ्योव रोगोये मीरं बनै सिनेलेरं, चब्बनै छे-छेङप्सिव टानेले, होकाम नमटं बडा-बडाघ्योव चिन्नरं रःन्नेलेरं।" 12 हैनि पनि आव घटनारं टाने भन्डा ङाःडे मीराई जेलाई क्योःडे सहटैने लेरं, जेलाई यहुडीरं याडुप्सिने ज़ीःमयालं सुम्पिड्याने लेरं, होकाम झ्यालखानालं झाने लेरं। ङामिन जेरोयो कारनये जेलाई राजाराई सोनो हाकिमराई याङाःकं लाङने लेरं। 13 हैनि पनि जेलागिटं आव टोबो ङागोहाइ पाङने मौका टानेले। 14 हैजैडे जे जोगिनेलो लागिटं कडि पाङने हो रोः ङाःडेकामज़ जियुङलं टासुन्चिच्यो। 15 कडालेकं ङा जेलाई ऐटाव पाङने याः सोनो बुड्डि यानेङाले, जिबिरोडला पाङनेरं जेरोःलो ओजबाफ याडुने मालेरं होसोनो जेपाङो रोःलो ओबात्रा पनि डोडुने मालेरं। 16 हैनि पनि ज्यामा जेबाबुरं, जेडाज्यु भाइरं, जेआफ्नोरं सोनो जेनैराई पनि जेलाई सोक्योःने लेरं होकाम जे मड्डेलाम कोइ-कोइरंलाई नोराई सैःने लेरं। 17 ङालाई जिपुगारिसोङो कारनये जेलाई स्यान्टै मीराई घिनैने लेरं। 18 हैनि पनि जेङैःटा टोबो जेचेम पनि नास टाने माले। 19 जे माआटिडे जेलेवये जेपोहोन बान्चिनेले।

येसुये यरुसलेम नास टाने बारेलं ओपाङो

20 जे यरुसलेमलाई सेनाराई याघिरिव जेरोःङो पान्त्रा नो के चानोज़ नास टा वार्डे ठा सन्च्यो। 21 होकाम यहुडियाला लेनेरं पाहारडे ओढोङरंकं। सहरला लेनेरं होलाम ओहाइसिरंकं, नाङखारलं लेनेरं सहरलं टापसिरंकं। 22 कडालेकं सर्सिव स्यान्टै रोःरं पुरा टानेलो लागिटं पैचा रैने ऐटाव डिन रानेले। 23 ओहो! नो डिन छ्याम मुःऱ्या सोनो नुन ओँने याज़ालेव मेमारंलाई प्रिठीबीलं बनै घ्योव डुखं रानेले, होकाम आव मीरंलाई परमेस्वरलो उरिस रःन्नेले। 24 नोरंलाई तरवालये सैःनेलेरं, होकाम स्यान्टै डेसडे कैती झैडे लाङनेलेरं। होकाम यहुडीरंकाम उरुका मीराई यासमय पुरा ओमटाया समं नोराई यरुसलेमलाई याखङये सिडे नैनेलेरं।

मानवालो ओज़ा राने

25 "निमी, स्यावैँ सोनो सोरोयालं चिन्नरं रःन्नेले होकाम समन्डरलो ओगा सोनो ओछल्काराई प्रिठीबीला स्यान्टै डेसरं अप्ठारोलं परिडे आत्तिने लेरं। 26 सङसारला टारिज़्याव घटनालो सङ्खा डैडे मीरं याछ्यासैये याचेटं माःनेले, कडालेकं नम्टा सक्तिरं खल्बलिने लेरं। 27 होकाम मानवालो ओज़ालाई सक्ति सोनो घ्योव ओमहिमासं बाडलटं ओराज़्याव नोराई रःङनेलेरं। 28 आव रोःरं पुरा याटारिकं च्याङसिडे जेङैः छेन्डे भाल्सिच्यो कडालेकं जे आव रोःटाम चानोज़ हाइसिने जेले।"

डीलो उसिङटाम सिछ्या

29 येसुये नोरंलाई टोबो सात्रो हैओडोवरं, "डीलो उसिङ सोनो स्यान्टै सिङरंलाई रःङच्यो, 30 नोराई पलाःव ख्या याख्याव रःङडे जेज़ ठा जेसन उभ्याली नजिकं राडेले वार्डे। 31 हैजैडेज़ ङा हैङावार्ज़्याव आव रोःरं याटाव जेरःङ, होकाम परमेस्वरलो ओराज्य नजिकं लिज़्या वार्डे ठा सन्च्यो।"

32 ङा जेलाई डस्साज़ हैङाडाच्यो, आव स्यान्टै घटनारं पुरा याम्टाया समं आव पुस्ता खेम्डे नानेमाले। 33 नमरं नामरं नास टाडे नानेलेरं, हैनि पनि ङापाङ खर्क पनि नास टाने माले।

जागा लेच्यो

34 "हैनि पनि जे जेलागिटं होस्यार लेच्यो। मानि मोज मजाक, मःङडे लेने, सोनो जेजीबनला चिन्ताये जियुङ बलेड्याच्योवके होकाम जेलाई नो डिन अम्ल्याङसानि माहाला मान्टि राके। 35 कडालेकं ऐझैडेज़ सङसारलं लेने स्यान्टैरंलाईज़ आव माहाला मान्टि टाडे रानेले। 36 हैनि पनि आव रारिज़्याव स्यान्टै रोःटाम हाइसिने सोनो मानवालो ओज़ालो ओङाःकं नानेलागिटं तयार टाने एकसप्ड्या प्रार्ठना डाडे जागा लेच्यो।"

37 येसुये लाकं प्रार्ठना डोने ज़ीःमलं पोयोरंये, होकाम रिलं होलाम पुलुडे जैतुन डान्डाटं री भरि लेये। 38 येसुलो ओबचन ठैने वार्डे स्यान्टै मीरं छकाल्ने प्रार्ठना डोने ज़ीःमलं रारंये।