1 साताका पैला डिन छ्याम छकाल्ने गघ नो मेमाराई तयार याझोयो चाव मङ-मङ बासिने बस्त रैडे नोरं खाडरलं याराव। 2 नोराई खाडर तर्टाम लुङ फैसिव यारोःङो। 3 हैनि पनि खाडरलं यापसिकं नोराई प्रभु येसुलो ओक्याङ माडैरंये। 4 नोरं नो रोःटं अलमल टाडे यालिज़्याव हो बेलाकं मिलङज़ खोर झिने क्वा क्वाइसिव नेबऱ्याङ मीनि नोराई याछ्योकं नेच्याङसिरिव। 5 नोरं याछेव, होकाम याछ्यासैये याङाःकं नामलं बलाङ याफुलुप्सिव, होकाम नो मीनि नोरंलाई हैनेडोवरं, "जे ज्युङडा मीलाई सिवराई याखार्ल कडाने जिखिम्ज़्याव? 6 नो आलं माले, ज्युङडा टाडे सोडेले। गालीललं ओलेकं येसुये जेलाई कै ओडाच्योव नो चेटैच्यो, 7 मानवालो ओज़ा पापी मीराई याकुइटं सुम्पिसिने सोनो क्रुसटं टाङ्गिसिने ले होकाम सोङलाका ज्युङडा टाडे सोनेज़ ले।"

8 नोराई येसुये ओपाङो रोः याचेटोयो। 9 होकाम खाडरलाम वोल्डे नोराई नो स्यान्टै टाव रोः एघारजना उसिसरासं सोनो उरुका स्यान्टै मीरंलाई हैयाडोवरं। 10 नो मेमारं मरियम मग्डलिनी, योअन्ना सोनो याकुबलो वामा मरियमरं लेवरं। नोरासं लेव उरु मेमाराई पनि आव रोः प्रेरितरंलाई हैयाडोवरं। 11 हैनि पनि नोराई आव रोः सोझोज़ हैयावार्ज़्याव ची यावारो होकाम नोराई मापतिरंये। 12 हैनि पनि पत्रुस ठर-च्याङसिडे खाडर लेव पोडे ज़ोःनाडे ओरःङनाव। होकाम घोम लेडे ओरःङकं येसुलो सिव ओक्याङ पोसिव सुति क्वालो उकुत्रारं याज़ ओरोःङो। नो घटना रःङडे नो अचम्ब टाडे ओनाव।

13 हो छ्याम येसुलो उसिसरंलाम नेबऱ्याङनि यरुसलेमकाम ठोकै एघार किलो मिटर टाडाङं इम्माउस यावार्ज़्याव नाङखारडे नेनाव। 14 टाडे खेमो स्यान्टै घटनालो ओबात्रा नोनि नेडोज़्याव। 15 नोनि पाङडे छलफल नेडोज़्याकं येसु ओल्ज़ नजिकं राडे नोनिसं ओनाव, 16 हैनि पनि नोनि निमिलंङ येसुलाई मासरेःने झैसिव लेव। 17 येसुये नोनिलाई हैओडोवनि, "जिन बावग्यान जेडोकं कडिलो ओबात्रा जेडोज़्याव?"

नोनि जामा डुखि टाडे ठन नेअडिव। 18 नो नेबऱ्याङनिलाम क्लोओपासये येसुलाई जबाफ ओयोव, "यरुसलेम डुलिडे राडे पनि नला रोः नङ ठा नमसन?"

19 येसुये नोनिलाई ओपजोयोनी, "कडि रोः?"

नोनि जबाफ नेयोव, "नासरतला येसुलो ओबारेलं, येसु टोबो अगमबक्ता लेव परमेस्वरलो सोनो यहुडीरंकाम उरुका मीराई याङाःकं येःन्ट सोनो पाङनेटं बनै सक्तिसाली लेव। 20 हैनि पनि मुख्या सेवा डोनेरं सोनो गेनेताराई येसुलाई सैःने डन्ड याने यासुम्पिव होकाम नोलाई क्रुसटं याटाङगिव। 21 इस्राएललाई छुट्कारा झैने आवज़ वार्डे गे आस डोडे गेनैज़्याव। आव स्यान्टै रोःरं राःडे आव घटना ओटाव आछिम सोङला याटा। 22 नो बाहेक गेसंका कोइ-कोइ मेमाराई गेलाई अचम्ब झैडे नैसिरं नोरं आछिम छकाल्ने गघ खाडरलं यानाव, 23 होलं येसुलो ओक्याङ माडैरंये। नोरं राडे गेलाई हैयाडोसिव, ‘गे स्वर्गटा कटंवालरंलाई गेरोःङोरं, नोराई येसु ज्युङडा याटाडु यावारो।’ 24 गेलाम पनि कोइ-कोइ गेनैरं खाडरलं नाडे यारःङनाव, नलं हो मेमाराई जो स्यानाव हैयावारो हो स्यानावज़ याडैनाव, हैनि पनि येसुलाई मारःङरंये।"

25 येसुये नोनिलाई हैओडोवनि, "ए रोः माबुझिने मीरं जे जियुङ आढङ कम्जोर टाडेले अगमबक्ताराई हैयावारो रोःरं बिस्वास जेमडाये। 26 होकाम ख्रीस्टये आव डुखं डैने सोनो ओमहिमालं नाने आवस्यक मालेव डोरो?" 27 होकाम मोसा सोनो स्यान्टै अगमबक्तारं काम सुरु डाडे ओबारेलं सास्त्रता सर्सिव स्यान्टै रोःराई यामाने नोनिलाई हैओडोवनि

28 नोरं जो नाङखारलं यानारिज़्याव हो नाङखारलो ओछ्योकं याकेनाव। येसु अजं नो नाङखारकाम पनि होडेज़ नाने स्यानाव ओझैसिव। 29 हैनि पनि नोनि येसुलाई ऐ वार्डे कर नेडोव, "गिनसंज़ गलेनके, रीःम्डे पनि याटारिडु, नम पनि यानुपरिडु।" होकाम येसु नोनिसं लेने वार्डे येसु पनि ज़ीःमलं उपसिनाव।

30 येसुये नोनिसं ज़्याव याज़्योरिज़्याकं येसुये बरे छेन्डे आसिक ओयोव होकाम बरे केःडे नोनिलाई ओयोवनि। 31 होकाम नोनि निमिलंङ ओरोःनो, होकाम नोनि येसुलाई नेसःरेव। होकाम येसु नोनि नेङाःकाम फ्वाङ ओमाःव। 32 नोनि नेपाङसिव, "येसु येम्ट गिनसं ओपाङ्क गिनलाई सास्त्रता ओमाने खुलिडे ओयासिकं गियुङलं जोस ओराव माङ्क डोरो?"

33 नोनि होपान्त्राज़ ठार-ठर च्याङसिडे यरुसलेमडे नेवोलो, होकाम एघार जना उसिसरं सोनो नोरासं टोबोकं डुप्सिवरंलाई नेडोयोरं, 34 होकाम नोरंलाई ऐ नेडोवरं, "प्रभु के डस्साज़ ज्युङडा टाडे ओसोव ची ओलेव-लेव होकाम सिमोन लेवङ ओसतन्सिवज़ ओलेव-लेव।"

35 नोनि येमयाला रोःरं सोनो बरे ओकेःकं कैजैडे नोनि नेसःरेव हो रोः हैनेडोवरं।

36 नोराई आव रोः याडोज़्याकंज़ येसु नोराई याखार्ल नाडे ओच्याङसिनाव होकाम हैओडोवरं, "जेलाई सान्ति ओटाकं।"

37 नोरं याछेव, होकाम याछ्यासैये याआतिव होकाम, "गे के भुत आत्मा गेरःङज़्या" वार्ने यासुन्चीव। 38 हैनि पनि येसुये नोरंलाई हैओडोवरं, "जे कडाने छेडे जेआतिज़्याव, होकाम जियुङलं कडाने सङ्खा जेडोज़्याव? 39 ङाखङरं, ङाकुइरं गरःङच्योके, ङाज़ ची, ङालाई छुडे बिचार गोडोच्योके। कडालेकं भुत आत्मालो ओस्यारं सोनो उरुःरं माटाये, हैनि पनि जे जेरःङज़्या ङा के लिज़्या।"

40 ऐ ओवारो पान्त्रा येसुये नोरंलाई ओखङरं, उकुइरं सटन्डे ओयोवरं। 41 हैनि पनि रेङडे मापतिने स्यानाव टाडे छक्क याटाकं येसुये नोरंलाई हैओडोवरं, "जेसं आकं ज़्याने ज़्याव उलिज़्यावरो?" 42 नोराई याफिनो ङाःलो टोबो उकरी येसुलाई यायोव। 43 होकाम नो रैडे येसुये याङाःकंज़ ओकोयो।

44 येसुये नोरंलाई हैओडोवरं, "जेसं ङालेका ङापाङो पाङरं आवरंज़, होसोनो मोसालो ओसास्त्रटं अगमबक्तारं सोनो भजनलो उकितापटं ङाबारेलं सर्सिव स्यान्टै रोःरं पुराज़ टानेले।"

45 सास्त्र गुबुझिरंकं वार्डे येसुये याबुड्डी फैडे ओयोवरं। 46 येसुये नोरंलाई हैओडोवरं, "ऐटाव सर्सिवले, ख्रीस्टये डुखं डैने होकाम सोङलाका सिवलाम ज्युङडा टाव परिये, 47 होकाम स्यान्टै मीरंलाई येसुलो उमिन्ट पापलाम वोल्ने सोनो पाप छेमालो प्रचार यरुसलेमलाम सुरु टाव परिये। 48 जेज़ आव रोःराई यासाचीरं ची। 49 ङा ङाबाबुये जेलाई ङायाच्यो वार्डे कबंल ओडोवलाई जेलेवङं ङापरिःङ हैनि पनि रोटं स्वर्गटाम सक्ति जेमडैया समं जे आव सहरलंज़ लेच्यो।"

50 होकाम येसुये नोरंलाई बेठानिया समं ओलाङोरं, होकाम उकुइ छेन्डे नोरंलाई आसिक ओयोवरं। 51 येसुये नोरंलाई आसिक झाडे ओयोज़्यारंकं येसु नोराई लेवकाम उछुटिव, होकाम रोटं स्वर्गटं ओलाङसिव। 52 नोराई येसुलाई ढो डाडे बनै रेङये-रेङये यरुसलेमडे यावोलो। 53 होकाम नोरं परमेस्वरलो ओप्रसन्सा डाडे प्रार्ठना डोने ज़ीःमलं यालेव।