Ipinako sa Krus si Hesus
17 palabas ng lungsod. Ipinapasan nila kay Hesus ang kanyang krus papunta sa lugar na tinatawag na Lugar ng Bungo (na sa wikang Arameo ay Golgota). 18 Doon nila ipinako sa krus si Hesus, kasama ng dalawa pa. Sa kanan ang isa at ang isa namaʼy sa kaliwa, at nasa gitna nila si Hesus.
19 Pinalagyan ni Pilato ng karatula ang krus ni Hesus, at ganito ang nakasulat: Si Hesus na taga-Nazaret, ang Hari ng mga Hudyo.
20 Nakasulat ito sa mga wikang Arameo, Latin, at Griyego. Maraming Hudyo ang nakabasa nito, dahil malapit lang sa lungsod ang lugar kung saan ipinako sa krus si Hesus.
21 Nagreklamo ang mga namamahalang pari kay Pilato, "Hindi dapat ‘hari ng mga Hudyo’ ang isinulat nʼyo kundi, ‘Sinabi ng taong ito na siya raw ang hari ng mga Hudyo.’ "
22 Ngunit sinagot sila ni Pilato, "Kung ano ang isinulat ko, iyon na."
23 Nang maipako na ng mga sundalo si Hesus, kinuha nila ang kanyang damit at hinati-hati sa apat, tig-iisang bahagi ang bawat sundalo. Kinuha rin nila ang kanyang panloob na kasuotan na hinabi nang buo at walang tahi o dugtong.
24 Kaya sinabi ng isang sundalo, "Huwag na natin itong paghatian. Magpalabunutan na lang tayo kung kanino ito mapupunta."
Nangyari ito upang matupad ang sinabi sa Kasulatan:
"Ang aking mga damit ay kanilang pinaghati-hatian,
at nagpalabunutan sila para sa aking panloob na kasuotan."19:24 Salmo 22:18.
At ito nga ang ginawa ng mga sundalo.
25 Nakatayo malapit sa krus ni Hesus ang kanyang ina, ang kapatid ng kanyang ina, si Maria na asawa ni Clopas, at si Maria na taga-Magdala. 26 Nang makita ni Hesus ang kanyang ina na nakatayo roon katabi ng minamahal niyang alagad, sinabi niya, "Ituring po ninyo siyang anak." 27 At sinabi naman niya sa alagad niya, "Ituring mo siyang ina." Mula noon, tumira na ang ina ni Hesus sa tahanan ng alagad na ito.