Jeremias 50

Ang Mensahe Tungkol sa Babilonia

1 Ito ang sinabi ng Panginoon sa propetang si Jeremias tungkol sa Babilonia at sa mga mamamayan nito:

2 "Ipahayag sa mga bansa ang balita

nang walang inililihim!

At itaas ang watawat na tanda

ng pagkawasak ng Babilonia!

Madudurog at mapapahiya

ang kanyang mga diyos-diyosan

pati na ang diyos-diyosang si Bel at Merodac.

3 Sapagkat sasalakayin ang Babilonia

ng isang bansa mula sa hilaga,

at magiging tiwangwang

ang lugar na ito.

Wala nang maninirahan dito

dahil tatakas ang kanyang mga mamamayan

pati ang mga hayop.

4 "Ako, ang Panginoon,

ay nagsasabing sa panahong iyon,

ang mga mamamayan ng Israel at Juda

ay iiyak na lalapit sa akin,

ang Panginoon na kanilang Diyos.

5 Magtatanong sila ng daan

papuntang Jerusalem*50:5 Jerusalem: Sa Hebreo, Zion. Ganito rin sa talata 28|JER 50:28.

at pupunta sila roon.

Gagawa sila ng walang hanggang kasunduan sa Panginoon

at hindi na nila ito kakalimutan.

6 "Ang mga mamamayan ko

ay parang mga tupang naliligaw.

Pinabayaan sila ng kanilang mga pastol

doon sa kabundukan at kaburulan

at hindi na nila alam ang daan pauwi.

7 Sinasakmal sila ng mga nakakakita sa kanila.

Sinasabi ng mga kaaway nila, ‘Nagkasala sila sa Panginoon

na siyang tunay nilang kapahingahan

at pag-asa ng mga ninuno nila

kaya wala tayong kasalanan

sa ating pagsalakay sa kanila.’

8 "Tumakas kayo mula sa Babilonia!

Iwanan na ninyo ang bansang iyan!

Mauna na kayong tumakas

katulad ng mga kambing

na nangunguna sa mga kawan!

9 Sapagkat ipapasalakay ko ang Babilonia

sa alyansa ng mga makapangyarihang

bansa mula sa hilaga.

Sasalakayin nila ang Babilonia

at masasakop nila ito.

Bihasa ang mga tagapana nila

at walang mintis ang kanilang pagpana.

10 Sasamsamin nila ang mga ari-arian ng Babilonia

at talagang magsasawa sila,"

sabi ng Panginoon.

11 "Mga taga-Babilonia, sinamsam ninyo

ang pag-aari ng mga mamamayan ko.

Tuwang-tuwa kayo at masaya

na parang dumalagang baka

sa pastulan

o kabayong humahalinghing.

12 Ngunit ilalagay ko sa kahihiyan ang inyong bansa.*50:12 bansa: Sa literal, ina.

Magiging pinakaaba ito sa lahat ng bansa,

at magiging isa itong tuyot

at nakatiwangwang na disyerto.

13 Dahil sa galit ng Panginoon,

wala nang maninirahan sa Babilonia

at itoʼy magiging tiwangwang.

Masisindak at mangingilabot

ang lahat ng dadaan dito

dahil sa lahat ng nangyari sa bansang ito.

14 "Kayong mga tagapana,

humanay na kayo sa inyong puwesto

sa palibot ng Babilonia.

Panain ninyo siya

sapagkat nagkasala siya sa Panginoon.

15 Sumigaw kayo laban sa kanya

sa lahat ng dako!

Tingnan nʼyo! Sumuko na ang Babilonia!

Nawawasak na ang mga tore niya

at gumuho na ang mga pader niya.

Ang Panginoon ang naghiganti

sa kanya.

Kaya paghigantihan ninyo siya

at gawin ninyo sa kanya

ang ginawa niya sa iba.

16 Paalisin ninyo sa Babilonia

ang mga nagtatanim

at nag-aani gamit ang karit.

Iligtas ninyo ang mga bihag

sa espada ng mga kaaway

at patakasin ninyo sila

at pauwiin sa sarili nilang lupain.

17 "Ang mga Israelita ay parang

mga tupang nagkalat

na hinahabol ng mga leon.

Una, sinakmal sila

ng hari ng Asiria,

pagkatapos ang pinakahuling

ngumatngat ng mga buto nila

ay si Haring Nebucadnezar ng Babilonia."

18 Kaya ito ang sinasabi ng Panginoong Diyos ng mga Hukbo, ang Diyos ng Israel:

"Parurusahan ko si Haring Nebucadnezar

at ang Babilonia

katulad ng pagpaparusa ko sa hari ng Asiria.

19 Ngunit pababalikin ko

ang mga Israelita sa kanilang bansa.

Magiging parang mga tupa silang

nanginginain sa kabundukan ng Carmel

at sa kapatagan ng Bashan,

at sa kaburulan ng Efraim at Gilead,

at silaʼy mabubusog.

20 Sa mga araw na iyon,"

sabi ng Panginoon

"wala nang makikitang mga kasalanan

at pagsuway

sa mga natitirang mga mamamayan

ng Israel at Juda

sapagkat patatawarin ko na sila.

21 "Salakayin ninyo ang Merataim

at ang mga nakatira sa Pekod.

Patayin ninyo sila at lipulin nang lubusan

bilang handog para sa akin," sabi ng Panginoon.

"Gawin ninyo ang lahat ng iniuutos ko sa inyo.

22 Iparinig nʼyo ang sigawan ng labanan at ingay ng puspusang pangwawasak.

23 Ang Babilonia ay parang martilyong

dumurog ng mga bansa,

subalit ngayon siya na ang nadurog.

Nakita ng mga bansa

kung paano nawasak ang Babilonia!

24 O Babilonia, nahuli ka

sa bitag na inilagay ko para sa iyo.

Nahuli ka dahil lumaban ka

sa Panginoon.

25 Binuksan ko ang taguan ng aking mga armas

at inilabas ko ang aking mga sandata

dahil sa aking galit.

Sapagkat ako, ang Makapangyarihang Panginoon,

ay may gagawin sa iyo, O Babilonia.

26 Mga kalaban ng Babilonia, na nasa malalayong lugar,

salakayin na ninyo ang Babilonia!

Buksan ninyo ang kanyang mga bodega.

Ipunin ninyo ang inyong

mga nasamsam katulad ng trigo.

Lipulin ninyong lubos

ang mga taga-Babilonia

at huwag kayong magtitira kahit isa.

27 Patayin ninyo ang lahat ng kanilang batang toro.

Lipulin ninyo silang lahat.

Kahabag-habag sila

sapagkat dumating na ang panahon

na dapat silang parusahan.

28 Pakinggan ninyo ang mga taong

nakatakas sa Babilonia

habang isinasalaysay nila sa Jerusalem

kung paano naghiganti ang Panginoon

na ating Diyos

dahil sa ginawa ng mga taga-Babilonia

sa ating Templo.

29 "Ipatawag ninyo ang mga tagapana upang sumalakay sa Babilonia!

Palibutan ninyo upang walang makatakas.

Paghigantihan ninyo siya sa kanyang ginawa;

gawin ninyo sa kanya

kung ano ang ginawa niya sa iba

sapagkat kinalaban niya ang Panginoon,

ang Banal na Diyos ng Israel.

30 Sa mga araw na iyon, mamamatay sa mga lansangan

ang mga kabataan niyang lalaki

pati ang lahat ng kanyang kawal,"

sabi ng Panginoon.

31 "Ako, ang Panginoong Diyos ng mga Hukbo,

ay nagsasabing kalaban kita,

Babiloniang mapagmataas!

Dumating na ang araw

na ikaw ay aking parurusahan.

32 Ikaw na palalo ay mawawasak

at walang tutulong sa iyo

para ibangon ka.

Susunugin ko ang iyong mga bayan

at ang lahat ng nasa paligid nito."

33 Sinabi pa ng Panginoong Diyos ng mga Hukbo:

"Inaalipusta ang mga mamamayan ng Israel

at ganoon din ang mga taga-Juda.

Binihag sila at binantayang mabuti

upang hindi sila makauwi sa bayan nila.

34 Ngunit ako ang kanilang Manunubos,

Panginoong Diyos ng mga Hukbo,

ang aking pangalan.

Ipagtatanggol ko sila at bibigyan ng kapayapaan,

ngunit guguluhin ko ang

mga mamamayan ng Babilonia.

35 "Ang espada ng kapahamakan

ay tatama sa mga taga-Babilonia," sabi ng Panginoon

"laban sa mga nakatira sa Babilonia,

pati sa mga pinuno

at matatalinong tao nito.

36 Tatama rin ito sa kanyang

mga bulaang propeta

at silaʼy magiging mga mangmang.

Tatama rin ang espada sa kanyang mga sundalo

at silaʼy maduduwag.

37 Tatama ang espada sa kanyang mga kabayo, karwahe,

at sa lahat ng kumakampi sa kanya.

At silaʼy manghihina gaya ng mga babae!

Tatama rin ito sa kanyang mga kayamanan

at itong lahat ay sasamsamin.

38 Matutuyo ang lahat

ng pinagkukunan niya ng tubig!

Sapagkat ang Babilonia

ay lugar na punong-puno ng napakaraming diyos-diyosan,

mga diyos-diyosang nagliligaw sa mga tao.

39 "At ang Babilonia ay titirhan na lang ng mga hayop sa gubat,

mababangis na hayop,

mga asong-gubat, at mga kuwago.

At hindi na maninirahan ang tao

sa Babilonia magpakailanman.

40 Kung paanong winasak

ng Diyos ang Sodoma at Gomora,

at ang mga bayan sa palibot nito,

ganoon din ang mangyayari sa Babilonia.

Wala nang taong maninirahan doon,"

sabi ng Panginoon.

41 "Tingnan ninyo! May mga sundalong

dumarating mula sa hilaga.

Isang makapangyarihang bansa at ang mga hari

mula sa malayong lupain na lalaban sa Babilonia.

42 Ang dala nilang mga sandata

ay mga pana at mga sibat.

Malulupit sila at walang habag.

Ang ingay nilaʼy parang malalakas na alon

habang nakasakay sila sa kanilang mga kabayo.

Darating sila na handang-handa

para salakayin kayong mga taga-Babilonia.

43 Nabalitaan ito ng hari ng Babilonia

at siyaʼy nanlupaypay.

Nakaramdam siya ng takot at sakit

katulad ng babaeng manganganak na.

44 Bigla kong sasalakayin ang Babilonia

katulad ng leon na galing

sa kagubatan malapit sa Ilog Jordan,

sasalakay patungo sa pastulan

ng maraming tupa.

Magsisitakas sila,

at pipili ako ng taong mamamahala

sa Babilonia.

Sino ang maitutulad sa akin?

Sino ang mangangahas na kalabanin ako?

Sino ang pinunong makakalaban sa akin?

45 "Kaya pakinggan mo ang balak gawin ng Panginoon

laban sa Babilonia.

Kahit ang kanilang mga anak

ay bibihagin

at ang kanilang mga bahay ay gigibain.

46 Sa pagbagsak ng Babilonia, yayanig ang lupa

at maririnig sa ibang bansa ang iyakan nila."