1 Nao King Hiram blong Taea i sanem sam man blong hem oli kam luk King Deved blong tokbaot fasin we tufala kantri ya blong tufala i save wokem bisnes. Mo hem i sanem sam man we oli waes long fasin blong katem ston, mo sam man blong wokem haos, wetem ol timba ya sida* blong oli kam wokem wan haos blong King Deved. 2 Mo taem King Deved i luk samting ya, hem i savegud we Hae God i putumap hem i kam king blong ol laen* blong Isrel,* mo we i stap mekem kingdom blong hem i kam antap moa from we i wantem blesem ol man ya blong hem.

3 Nao long taem ya we King Deved i stap long Jerusalem,* hem i stap tekem plante woman oli kam woman blong hem, nao i gat plante pikinini boe mo plante dota blong hem. 4 Ol pikinini boe blong hem we oli bon long Jerusalem, nem blong olgeta i olsem.

I gat Samua, mo Sobab, mo Natan, mo Solomon, 5 mo Jibara, mo Elisua, mo Elpelet, 6 mo Noga, mo Nefeg, mo Jafia, 7 mo Elisama, mo Beheliada, mo Elifelet.

8 Nao taem ol man Filistia oli harem we ol laen* blong Isrel* oli putumap King Deved i kam king blong olgeta laen blong Isrel evriwan, ol soldia blong olgeta oli kam blong lukaot hem blong holem hem. Be taem hem i harem samting ya, hem wetem ol soldia blong hem oli aot long Jerusalem* blong go faet long olgeta. 9 Nao ol man Filistia oli kam kasem bigfala levelples ya Refaem,* long medel blong ol hil, mo oli stap stilim olting blong ol man we oli stap long ples ya. 10 Nao king i prea, i talem se, "Hae God. ?Olsem wanem? ?Sipos mi go mekem faet long olgeta ya, bambae yu yu save givhan long mi blong mi winim olgeta?"

Mo Hae God i givim ansa long hem se, "!Yu go mekem faet long olgeta! !Bambae mi mi givhan long yu blong yu winim olgeta!"

11 Nao king i go long ples ya we biaen oli putum nem blong hem se Balperajim, i mekem faet long olgeta, mo i winim olgeta. Mo hem i talem se, "Hae God i yusum mi blong i brekemdaon ol soldia blong ol enemi blong mi, i gotru, olsem bigfala wota we i ron strong tumas, i brekem wan ples i gotru." Taswe oli putum nem blong ples ya se Balperajim, we i min se "Masta ya we i man blong brekem ples, hem i gotru".

12 Nao taem ol man Filistia oli ronwe, oli livim ol pija blong ol god blong olgeta i stap, mo king i talem long ol soldia blong hem blong oli bonem olgeta evriwan.

13 Be i no longtaem, ol man Filistia oli kambak long bigfala levelples ya bakegen, oli stap spolem ples ya, mo oli stap stilim ol samting. 14 Nao king i prea blong faenemaot rod long Hae God bakegen, mo Hae God i givim ansa long hem se, "Taem yu aot long ples ya, yu no go stret long olgeta. Bambae yu pasraon, yu kam biaen long olgeta, yu mekemrere blong go mekem faet long olgeta, long ples ya we ol tri ya balsam* oli stap long hem. 15 Nao taem yu harem noes antap long ol tri ya, olsem noes blong ol soldia we oli stap maj i kam, bambae yu girap, yu go mekem faet long olgeta, from we mi bambae mi stap go fastaem long yu blong winim olgeta." 16 Nao king i mekem olsem we Hae God i talem long hem, mo olgeta oli ronem ol man Filistia ya oli gobak, mo oli stap kilim olgeta, i stat long Gibeon, i go kasem Gesa. 17 Nao nius blong ol bigbigfala samting ya we hem i mekem i go olbaot long olgeta ples, mo Hae God i mekem ol man long olgeta kantri oli fraet long hem.