1 Bifo, oltaem, ol lida blong ol laen* blong Isrel* oli stap tekem nem blong olgeta man evriwan, folem ol laen blong olgeta, mo oli stap raetemdaon ol nem ya long buk ya we nem blong hem, Ol Stori blong Ol King blong ol Laen blong Isrel.

Biaen, ol man Babilonia oli kam tekem ol man blong kantri ya Juda* oli go stap wok slef* long Babilon. Hemia panis we God i givim long ol man blong hem from we oli gowe long hem. 2 ✝Mo taem olgeta oli stat kamkambak long ol taon blong olgeta, blong go stap long ol graon blong olgeta, ol faswan blong olgeta, i gat ol pris mo ol Livaet,* mo ol man blong wok long haos* blong God, mo ol narafala man we oli kamaot biaen long Isrel ya bifo. 3 Olgeta ya, sam oli laen blong Juda, mo sam oli laen blong Benjamin,* mo sam oli laen blong Efrem,* mo sam oli laen blong Manase,* be olgeta oli kam stap long Jerusalem*.

4-6 Long olgeta ya, i gat sikis handred naenti famle we oli laen blong Juda, we olgeta oli kamaot biaen long Peres mo Sela mo Sera, we trifala i pikinini blong Juda.

Lida blong olgeta we oli kamaot biaen long Peres, nem blong hem Utae, we papa blong hem Amihud, mo bubu blong hem Omri. Mo tu nara olfala bubu blong hem bifo, i gat Imri, mo Bani.

Mo lida blong olgeta we oli kamaot biaen long Sela, nem blong hem Asaea we hem i hed blong famle blong hem.

Mo lida blong olgeta we oli kamaot biaen long Sera, nem blong hem Jehuel.

7-9 Mo bakegen, long olgeta we oli kam stap long Jerusalem, i gat naen handred fifti sikis famle we oli laen blong Benjamin, mo ol hed blong ol famle ya i olsem. I gat Salu, we papa blong hem Mesulam, mo bubu blong hem Hodavia, mo papa blong bubu blong hem Hasenua, mo Jibnea, we papa blong hem Jeroham, mo Elaha, we papa blong hem Usi, mo bubu blong hem Mikri, mo Mesulam, we papa blong hem Sefatia, mo bubu blong hem Rehuel, mo papa blong bubu blong hem Jibnia.

10-12 Mo ol pris we oli kam stap long Jerusalem,* nem blong olgeta, Jedaea, mo Jehoearib, mo Jakin, mo Asaria, we i nambawan haeman long haos blong Hae God. Pris ya Asaria, papa blong hem Hilkia, mo bubu blong hem Mesulam, mo ol olfala bubu blong hem bifo, i gat Jadok, mo Meraeot, mo Ahitub.

Mo i gat pris ya Adaea, we papa blong hem Jeroham, mo bubu blong hem Pasuru, mo olfala bubu blong hem bifo, Malkia.

Mo i gat pris ya Mahasae, we papa blong hem Adiel, mo bubu blong hem Jasera, mo ol olfala bubu blong hem bifo, i gat Mesulam, mo Mesilemit, mo Hime.

13 Long taem ya, i gat wan taosen seven handred sikisti pris we oli hed blong ol famle blong olgeta, mo we oli savegud olgeta wok we oli stap mekem insaed long haos blong Hae God.

14 Ol Livaet* we oli kam stap long Jerusalem,* nem blong olgeta i olsem. I gat Semaea, we papa blong hem Hasub, mo olfala bubu blong hem bifo Asrikam we i kamaot biaen long Hasabia, mo stamba blong laen* blong olgeta, Merari we papa blong hem Livae* ya bifo. 15 Mo i gat Bakbakara, mo Heres, mo Galal. Mo i gat Matania, we papa blong hem Mikaha, mo olfala bubu blong hem bifo, Sikri we i kamaot biaen long Asaf. 16 Mo i gat Obadaea, we papa blong hem Semaea, mo olfala bubu blong hem bifo Galal we i kamaot biaen long Jedutun. Mo i gat Berekia, we papa blong hem Asa, mo bubu blong hem Elkana, we ol laen blong hem oli stap long ol vilej raonabaot long taon ya Netofa.

17 Ol gad blong haos* blong Hae God we oli kam stap long Jerusalem,* nem blong olgeta, Salum, mo Akub, mo Talmon, mo Ahiman, wetem ol brata blong olgeta. Mo Salum, hem i lida blong olgeta.

18 Bifo olgeta, ol bubu blong olgeta ya oli stap wok long haos tapolen ya we Moses olgeta oli wokem, oli stap gad long doa blong hem, long saed i go long ples ya we ol haos tapolen blong ol laen* blong Livae* bifo oli stap long hem. Mo biaen, long taem blong haos blong Hae God long Jerusalem, i kam kasem taem ya we ol man Juda* oli go wok slef* long narafala kantri, ol bubu blong olgeta ya oli stap gad long haos ya, long doa blong hem long saed i go long is we nem blong hem "Doa blong King". 19 Salum, papa blong hem Kore, mo bubu blong hem Ebiasaf, mo hem wetem ol narafala laen blong Kora oli stap gad long doa ya blong haos blong Hae God olsem we ol bubu blong olgeta bifo, oli stap mekem, taem oli stap gad long Haos Tapolen ya we oli stap go long hem blong mit wetem Hae God. 20 Long taem ya bifo olgeta, Finehas, we papa blong hem Eleasara, hem i lida blong olgeta, mo Hae God i stap wetem hem. 21 Mo long taem ya bifo, Sekaraea, we papa blong hem Meselemia, hem tu i stap gad long doa blong Haos Tapolen ya. 22 Olgeta evriwan we ol pris oli jusumaot blong oli gad long ol doa ya, namba blong olgeta i kasem tu handred twelef, mo oli raetemdaon nem blong olgeta folem ol vilej blong olgeta. Bifo, King Deved mo Profet Samuel, tufala i putumap ol bubu blong olgeta blong oli holem wok ya, 23 mo olgeta ya wetem olgeta we oli stap kamaot biaen long olgeta oli stap gad long ol doa ya blong haos blong Hae God kam kasem tede. 24 Yad blong haos ya i gat fo doa blong hem, we wan i lukluk i go long saot, mo wan i lukluk i go long not, mo wan i lukluk i go long is, mo wan i lukluk i go long wes. Mo i gat fo man we oli stap gad long ol doa ya, 25 mo oltaem ol brata blong olgeta we oli stap long ol vilej oli stap kam givhan long olgeta. Nao oltaem, fo man oli kam, oli stap gad long ol doa ya go kasem seven dei, nao fo narawan oli kam tekem ples blong olgeta. 26 Ol fo lida blong olgeta oli Livaet,* mo wok blong olgeta, oli mas lukluk we evri samting i stap go stret, mo oli mas lukaot long ol narafala rum insaed long stonwol blong haos blong Hae God, mo blong lukaot long ol samting we ol pris oli putumgud olgeta insaed long ol rum ya. 27 Oltaem olgeta ya oli stap klosap nomo long haos ya, from we oli gad long haos ya, mo evri moning, oli stap openem ol doa blong hem.

28 Sam long ol Livaet,* wok blong olgeta i blong lukaot long olgeta samting we ol pris oli stap yusum long taem blong mekem wosip. Oltaem, taem oli stap tekemaot ol samting ya blong ol pris oli yusum, oli mas kaontem olgeta, mo taem oli stap putumbak olgeta, oli mas kaontem olgeta bakegen. 29 Mo sam long olgeta oli stap lukaot long ol narafala samting long haos* blong Hae God, wetem flaoa mo waen mo olifoel* mo insens* mo ol samting we oli stap putum long insens mo tabu oel blong mekem i smel gud. 30 Be ol pris nomo oli gat raet blong tantanem ol samting ya blong wokem insens mo tabu oel.

31 I gat wan long olgeta ya we nem blong hem Matitia, we hem i fasbon blong Salum, we i laen* blong Kora. Hem i stap lukaot long wok blong wokem ol bred* ya we i no gat is long hem, blong givim i go long Hae God.

32 Mo sam laen blong Kohat oli stap lukaot long wok blong wokem ol spesel bred ya we i tabu, we long Sabat* dei, pris i stap putum long Rum we i Tabu, insaed long haos blong Hae God.

33 Mo sam famle blong ol Livaet, wok blong olgeta i blong mekem kwaea long haos blong Hae God, mo ol hed blong ol famle ya oli gat ol rum blong olgeta insaed long stonwol blong haos ya. Olgeta ya oli no save mekem ol narafala wok, from we oltaem, long dei mo long naet, oli mas rere blong singsing.

34 Olgeta ya oli hed blong ol famle blong ol Livaet. Olgeta oli stap long Jerusalem* mo oli lida blong ol wok ya.

35 Bifo, wan man, we nem blong hem Jehiel, hem i statem taon ya Gibeon, mo i stap long hem. Nem blong woman blong hem, Mahaka, 36 mo fasbon pikinini boe blong tufala, nem blong hem Abdon. Mo ol narafala pikinini boe blong tufala, nem blong olgeta, Juru, mo Kis, mo Bal, mo Nere, mo Nadab, 37 mo Gedoro, mo Ahio, mo Sekaraea, 38 mo Miklot, we i bonem Simea. Mo olgeta we oli kamaot biaen long olgeta ya oli stap long Jerusalem,* klosap long ol narafala laen* blong Benjamin*.

39 Nere, hem i bonem Kis, mo Kis i bonem King Sol. Mo King Sol i gat fo pikinini boe blong hem we nem blong olgeta, Jonatan, mo Malkisua, mo Abinadab, mo Esbal.* long 8.33. 40 Jonatan, hem i bonem Meribal* long 8.34., mo Meribal i bonem Maeka. 41 Mo Maeka i gat fo pikinini boe blong hem we nem blong olgeta Piton, mo Melek, mo Tarea, mo Ahas. 42 Mo Ahas i bonem Jaraha, mo Jaraha i gat tri pikinini boe blong hem we nem blong trifala, Alemet, mo Asmavet, mo Simri. Mo Simri i bonem Mojaha, 43 mo Mojaha i bonem Binea, mo Binea i bonem Rafaha, mo Rafaha i bonem Eleasa, mo Eleasa i bonem Ajel. 44 Mo Ajel i gat sikis pikinini boe blong hem, we nem blong olgeta, Asrikam, mo Bokruhu, mo Ismael, mo Searia, mo Obadaea, mo Hanan.