1 ✝Mo taem king i kam olfala tumas, hem i putumap pikinini ya blong hem Solomon i tekem ples blong hem, i kam king blong Isrel.

2 Mo bakegen, King Deved i tekem olgeta lida blong ol laen* blong Isrel,* wetem ol pris, mo ol Livaet* oli kam wanples. 3 Nao hem i kaontem ol Livaet we yia blong olgeta i kasem toti i go antap, mo namba blong olgeta evriwan i kasem toti eit taosen man. 4 Nao hem i seraot olgeta, i putum twanti fo taosen man blong oli stap lukaot long ol wok blong haos* blong Hae God, mo i putum sikis taosen man blong oli stap raetemdaon ol ripot blong wok ya, mo blong oli stap stretem ol rao blong ol man, 5 mo i putum fo taosen man blong oli stap gad long haos ya, mo laswan, i putum fo taosen man blong oli stap presem Hae God, we oli stap singsing mo oli stap plei long ol instramen we king i givim long olgeta.

6 Mo hem i seraot olgeta ya bakegen long tri haf, folem trifala pikinini blong Livae* ya bifo, we nem blong trifala, Geson, mo Kohat mo Merari.

7 Ol laen long Geson i olsem. Hem i bonem tu pikinini boe blong hem we nem blong tufala, Lahadan mo Simei. 8 Mo Lahadan i bonem tri pikinini boe blong hem we nem blong trifala, Jehiel mo Setam mo Joel, 9 mo laen blong hem i gat tri haf blong hem, we i kamaot biaen long trifala pikinini ya. Mo Simei i gat tri pikinini boe blong hem we nem blong trifala, Selomot, mo Hasiel mo Haran. 10,11 Mo Simei ya i gat fo pikinini boe blong hem bakegen, we nem blong olgeta i stat long fasbon i go kasem lasbon, i gat Jahat, mo Sina, mo Jehus, mo Beria, mo laen blong hem i gat fo haf blong hem, we i kamaot biaen long olgeta ya. Be olgeta we oli kamaot biaen long Jehus mo olgeta we oli kamaot biaen long Beria oli no plante, mo biaen, oli kaontem olgeta olsem wan haf nomo.

12 Mo ol laen blong Kohat ya i olsem. Hem i bonem fo pikinini boe blong hem we nem blong olgeta, Amram mo Ijara mo Hebron mo Usiel. 13 ✝Amram i bonem Eron mo Moses ya, we i man blong wok blong Hae God, mo Eron wetem ol pikinini blong hem, Hae God i makemaot olgeta se oli gat spesel wok blong olgeta, mo ol laen blong hem bambae oli mas holem wok ya oltaem, gogo i no save finis. Spesel wok ya blong olgeta i olsem. Oltaem oli mas lukaot long ol samting we i tabu, i blong Hae God, mo oli mas bonem insens* blong mekem wosip long hem, mo oli mas mekem ol narafala wok blong hem, mo oli mas blesem ol man long nem blong hem. 14 Be ol laen blong Moses ya oli joen wetem ol Livaet. 15 Moses i bonem tu pikinini boe blong hem we nem blong tufala, Gesom mo Eliesa, 16 mo long famle blong Gesom, Sebuel i lida blong olgeta, mo olgeta we oli kamaot biaen long Gesom oli laen blong hem. 17 Eliesa i bonem wan pikinini boe blong hem nomo we nem blong hem Rehabia, be Rehabia i gat plante pikinini we oli kamaot biaen long hem. 18 Ijara, we i namba tu pikinini boe blong Kohat, hem i bonem wan pikinini boe blong hem we nem blong hem Selomit, mo olgeta we oli kamaot biaen long Ijara oli laen blong hem. 19 Hebron, namba tri pikinini blong Kohat, hem i bonem fo pikinini boe blong hem we nem blong olgeta, Jeria, mo Amaria, mo Jehasiel, mo Jekameam, mo laen blong hem i gat fo haf blong hem we i kamaot biaen long olgeta ya. 20 Usiel, namba fo pikinini blong Kohat, hem i bonem tu pikinini boe blong hem we nem blong tufala, Maeka mo Jisia, mo laen blong hem i gat tu haf blong hem, we i kamaot biaen long tufala ya.

21 Mo ol laen blong Merari ya i olsem. Hem i bonem tu pikinini boe blong hem we nem blong tufala, Mali mo Musi. Mali tu i bonem tu pikinini boe blong hem we nem blong tufala, Eleasara mo Kis, mo laen blong hem i gat tu haf blong hem, we i kamaot biaen long tufala ya. 22 Be Eleasara i ded we hem i no gat pikinini boe blong hem, i bonem ol dota nomo, mo ol dota ya blong hem oli mared* long ol brata blong olgeta nomo we oli pikinini blong Kis. 23 Musi, namba tu pikinini blong Merari, hem i bonem tri pikinini boe blong hem we nem blong trifala, Mali, mo Eda, mo Jeremot, mo laen long hem i gat tri haf blong hem, we i kamaot biaen long trifala ya.

24 Hemia nao trifala haf ya blong laen blong Livae ya bifo, wetem ol naranarafala haf blong trifala, we ol man blong king oli raetemdaon nem blong olgeta. Olgeta ya we yia blong olgeta i kasem twanti i go antap, olgeta evriwan oli joen long wok ya long haos blong Hae God.

25 Nao king i talem se, "Ol laen blong Isrel. Hae God i God blong yumi, mo hem i mekem finis we yumi gat pis, mo hem bambae i stap olwe long taon ya Jerusalem* gogo i no save finis. 26 ✝Naoia, wok blong ol Livaet bambae i jenis. Haos Tapolen ya we yumi stap go long hem blong mit wetem Hae God, wetem ol samting we ol pris oli stap yusum blong mekem wosip, bambae olgeta ya oli no moa save karem i go olbaot." 27 Nao from toktok ya blong king, oltaem, taem ol Livaet ya oli gat twanti yia blong olgeta, ol lida blong olgeta oli stap raetemdaon nem blong olgeta, blong oli save givhan long pris, 28 ✝mo wok blong olgeta i olsem. Olgeta oli stap givhan long ol pris long ol wok blong mekem wosip long haos blong Hae God, mo oli stap lukaot long ol yad mo ol rum blong haos ya.* mo ol Livaet oli stap givhan long olgeta long ol wok blong mekem wosip long haos blong Hae God, mo oli stap lukaot long ol yad mo ol rum blong haos ya. Mo oli stap lukaot long ol samting we oli tabu, oli blong Hae God, blong oli no doti long fes blong hem. 29 Olgeta oli stap lukaot long tabu bred ya we ol pris oli stap givim i go long Hae God, wetem flaoa ya we i blong bonem blong mekem sakrefaes, mo bred* ya we oli no putum is long hem, mo ol kakae blong sakrefaes we oli kukum long oven, mo oltaem, oli stap skelem ol samting we ol man oli givim blong mekem sakrefaes, mo oli stap makem olgeta. 30,31 Mo evri dei, long moning mo long sapa, mo long ol narafala taem blong mekem ol sakrefaes ya we oli bonem i bon evriwan, we hemia long ol Sabat* dei mo long ol Lafet blong Niumun* mo ol narafala lafet olsem, olgeta oli stap presem Hae God, oli stap leftemap hae nem blong hem. Ol lida blong olgeta oli mekem ol rul blong makem namba blong ol man blong mekem ol wok ya, mo oltaem, oli stap wok folem ol rul ya. Mo wok ya blong mekem wosip long Hae God, hem bambae i stap long olgeta, gogo i no save finis. 32 Fastaem, wok blong olgeta, oli stap lukaot gud long Haos Tapolen ya we ol bubu blong yumi oli stap go long hem blong mit wetem Hae God, be biaen oli stap lukaot long haos ya blong hem. Ol pris oli stap mekem wosip insaed long haos ya, mo oltaem, ol Livaet ya oli stap givhan long olgeta.* oli stap mekem wosip insaed long haos ya blong Hae God oli laen blong Livae mo oli kamaot biaen long Hae Pris ya Eron, mo oltaem, ol Livaet ya oli givhan long ol pris long ol wok ya blong olgeta.