1-15 Nao long taem ya, King Deved i putum twelef kampani blong twanti fo taosen soldia blong hem, we ol kampani ya wanwan oli gat komanda blong olgeta wetem ol kapten blong olgeta. Wok blong ol komanda ya, oli stap lukaot long ol wok blong king long kingdom blong hem, nao oltaem, wan komanda wetem kampani blong hem i wok blong wan manis, finis narafala komanda wetem kampani blong hem i tekem ples blong hem. Ol komanda ya, sam oli hed blong ol famle blong olgeta mo sam oli lida blong ol laen* blong olgeta, mo nem blong olgeta i olsem.

Long fas manis, i gat Jasobeam, we papa blong hem Sabdiel, we i laen blong Peres ya, we i pikinini blong Juda.*

Mo long namba tu manis, i gat Dodae, we i laen blong Ahohi, mo Miklot i nambatu blong hem. Mo long namba tri manis, i gat Benaea, we papa blong hem pris ya Jehoeada. Hem i lida blong smol kampani ya tu we nem blong hem, se "Ol Toti Man blong King Deved". Biaen, pikinini blong hem Amisabad i tekem ples blong hem, i kam komanda blong bigfala kampani ya blong hem. Mo long namba fo manis, i gat Asahel, we i brata blong Joab. Biaen, pikinini blong hem i tekem ples blong hem, i kam komanda blong kampani ya. Mo long namba faef manis, i gat Samut, we i laen blong Ijara. Mo long namba sikis manis, i gat Ira, wan man Tekoa, we papa blong hem Ikes. Mo long namba seven manis, i gat Helej, wan man Pelon, we i laen blong Efrem.* Mo long namba eit manis, i gat Sibekae, wan man Husa, we i laen blong Sera, we i pikinini blong Juda. Mo long namba naen manis, i gat Abiesa, wan man Anatot, we i laen long Benjamin.* Mo long namba ten manis, i gat Maharae, wan man Netofa, we i laen blong Sera. Mo long namba leven manis, i gat Benaea, wan man Piraton, we i laen blong Efrem. Mo long namba twelef manis, i gat Heldae, wan man Netofa, we i laen blong Otniel.

16-22 Nem blong ol jif blong ol laen* blong Isrel* i olsem.

Jif blong ol laen blong Ruben,* Eliesa, we papa blong hem Sikri.

Mo jif blong ol laen blong Simeon,* Sefatia, we papa blong hem Mahaka.

Mo jif blong ol laen blong Livae,* Hasabia, we papa blong hem Kemuel.

Mo jif blong ol laen blong Eron, pris ya Jadok.

Mo jif blong ol laen blong Juda,* Elihu, we i brata blong King Deved.

Mo jif blong ol laen blong Isakara,* Omri, we papa blong hem Mikael.

Mo jif blong ol laen blong Sebulun,* Jismaea, we papa blong hem Obadaea.

Mo jif blong ol laen blong Naftali,* Jeremot, we papa blong hem Asriel.

Mo jif blong ol laen blong Efrem,* Hosea, we papa blong hem Asasi.

Mo jif blong ol laen ya blong Manase* we oli stap narasaed Jodan Reva i kam long wes, Joel, we papa blong hem Pedaea.

Mo jif blong ol laen ya blong Manase we oli stap narasaed Jodan Reva i go long is, Jido, we papa blong hem Sekaraea.

Mo jif blong ol laen blong Benjamin,* Jahasiel, we papa blong hem Abnere.

Mo jif blong ol laen blong Dan,* Asriel, we papa blong hem Jeroham.

23 ✝Long taem ya we King Deved i mekem sensas blong kaontem ol man, hem i no kaontem olgeta we yia blong olgeta i no kasem twanti, from we Hae God i promes se bambae hem i mekem ol laen blong Isrel oli kam plante we plante olsem ol sta antap long skae. 24 ✝Long taem ya, Joab, we mama blong hem Jeruia, hem i stap kaontem ol man, be i no finisim olgeta, mo from we Hae God i panisim olgeta from sensas ya, olgeta oli no raetem ful namba blong olgeta long buk blong ol ripot blong king.

25-31 Nem blong ol haeman we oli stap lukaot long olting blong king i olsem.

Ol storum long haos blong king, man blong lukaot long olgeta, Asmavet, we papa blong hem Asiel.

Mo ol narafala storum blong hem long ol taon mo ol vilej, mo long ol strong ples blong haed, man blong lukaot long olgeta, Jonatan, we papa blong hem Usi.

Mo ol man blong wok long garen, man we i bos blong olgeta, Esri, we papa blong hem Keleb.

Mo ol plantesen blong grep, man blong lukaot long olgeta, Simei, we i man Rama.

Mo ol storum blong waen, man blong lukaot long olgeta, Sabdi, we i man Sefam.

Mo ol plantesen blong olif mo ol plantesen blong sikamo* olbaot long ol smosmol hil long wes, man blong lukaot long olgeta, Balemon, we i man Geda.

Mo ol storum blong olifoel,* man blong lukaot long olgeta, Joas.

Mo ol buluk long bigfala levelples ya Saron, man blong lukaot long olgeta, Sitrae, we i man ples ya.

Mo ol buluk long ol bigfala levelples ya long medel blong ol hil, man blong lukaot long olgeta, Safat, we papa blong hem Adlae.

Mo ol kamel, man blong lukaot long olgeta, Obil, we i laen* blong Ismael.

Mo ol dongki, man blong lukaot long olgeta, Jedaea, we i man Meronot.

Mo ol sipsip mo ol nani, man blong lukaot long olgeta, Jasis, we i laen blong Hega.

32 Nao Jonatan, wan papa blong King Deved, hem i wan man blong givim gudfala advaes long man, mo hem i skul gud.* blong King Deved, hem i wan man blong givim gudfala advaes long man, mo hem i skul gud. Mo hem wetem pikinini blong hem Hakmon, tufala i stap lukaot long edukesen blong ol pikinini blong king. 33 Mo Ahitofel, hem i advaesa blong king, mo Husae we i laen* blong Aki, hem i fren blong king, mo hem tu i stap givim waestok long hem. 34 Mo biaen, long taem we Ahitofel i ded, Abiata mo Jehoeada we papa blong hem Benaea, tufala i kam advaesa blong king. Mo Joab, hem i komanda blong ol soldia blong hem.