1,2 ✝Hae Pris* ya Eron bifo, hem i bonem fo pikinini boe blong hem we nem blong olgeta, Nadab, mo Abihu, mo Eleasara, mo Itamara. Be Nadab mo Abihu, tufala i ded fastaem, we papa blong olgeta i laef yet, mo tufala i no gat pikinini, nao tufala brata blong tufala, Eleasara mo Itamara, tufala i tekem ples blong papa blong olgeta, tufala i kam pris. Mo laen* blong Eron ya i gat tu haf blong hem, we i kamaot biaen long tufala ya. 3 Nao King Deved i seraot olgeta ya bakegen long ol grup blong olgeta, blong oli mekem ol wok blong olgeta, mo pris ya Jadok we i laen blong pris ya Eleasara, mo pris ya Ahimelek we i laen blong pris ya Itamara, tufala i givhan long hem blong seraot olgeta. 4 Hem i seraot ol laen blong Eleasara i go long sikistin grup, mo i seraot ol laen blong Itamara i go long eit grup. Hem i mekem olsem from we namba blong ol hed blong famle long laen blong Eleasara i moa, i winim namba blong ol hed blong famle long laen blong Itamara. 5 Nao from we i gat ol haeman blong haos* blong Hae God, mo ol strong lida blong wok blong hem tu long tufala laen ya, olgeta oli sakem ol spesel ston* blong faenemaot se hu man bambae i holem wanem wok, blong oli seraot ol wok ya long olgeta. 6 Mo taem oli yusum ol ston ya, lida blong wan grup long wan laen i yusum blong faenemaot wok blong grup blong hem, nao lida blong wan grup long narafala laen i yusum blong faenemaot wok blong grup blong hem, mo oli stap mekem olsem, gogo olgeta grup evriwan oli holem ol wok blong olgeta. Nao wan Livaet* we i stap raetemdaon ol ripot long haos blong Hae God, we nem blong hem Semaea, we papa blong hem Netanel, hem i raetemdaon nem blong olgeta. Mo king wetem ol haeman blong hem, mo pris ya Jadok, mo pris ya Ahimelek, we papa blong hem pris ya Abiata, mo ol pris we oli hed blong famle, mo ol Livaet we oli hed blong famle, olgeta evriwan oli witnes blong samting ya.

7 Nao fasin we ol twanti fo grup blong ol pris ya oli kasem wok blong olgeta i olsem.

Faswan, grup blong pris ya Jehoearib, mo sekenwan, grup blong pris ya Jedaea, 8 mo namba tri, grup blong pris ya Hiram, mo namba fo, grup blong pris ya Seorim, 9 mo namba faef, grup blong pris ya Malkia, mo namba sikis, grup blong pris ya Miamin, 10 mo namba seven, grup blong pris ya Hakoj, mo namba eit, grup blong pris ya Abia, 11 mo namba naen, grup blong pris ya Jesua, mo namba ten, grup blong pris ya Sekania, 12 mo namba leven, grup blong pris ya Eliasib, mo namba twelef, grup blong pris ya Jakim, 13 mo namba totin, grup blong pris ya Hupaha, mo namba fotin, grup blong pris ya Jesebeab, 14 mo namba fiftin, grup blong pris ya Bilgaha, mo namba sikistin, grup blong pris ya Hime, 15 mo namba seventin, grup blong pris ya Hesiri, mo namba eitin, grup blong pris ya Hapijej, 16 mo namba naentin, grup blong pris ya Petahia, mo namba twanti, grup blong pris ya Jehesekel, 17 mo namba twanti wan, grup blong pris ya Jakin, mo namba twanti tu, grup blong pris ya Gamul, 18 mo namba twanti tri, grup blong pris ya Delaea, mo namba twanti fo, grup blong pris ya Mahasia.

19 Sekretari ya Semaea i raetemdaon nem blong olgeta ya wetem ol wok blong olgeta we bambae oli stap mekem long haos blong Hae God, olsem we Hae Pris ya Eron, we i olfala bubu ya blong olgeta i bin statem bifo, stret olsem we Hae God we i God blong ol bubu blong yumi i bin talem long hem.

20 Mo i gat ol narafala man tu long laen* blong Livae,* we oli stamba blong ol haf blong laen ya. Nem blong olgeta i gat Jedea, we i kamaot biaen long Sebuel, we hem i kamaot biaen long Amram ya bifo, 21 mo Jisia, we i kamaot biaen long Rehabia, 22 mo Jahat, we i kamaot biaen long Selomit we hem i kamaot biaen long Ijara ya bifo, 23 mo Jeria, mo Amaria, mo Jehasiel, mo Jekameam, we oli pikinini blong Hebron, i stat long fasbon, i go kasem lasbon, 24 mo Samiri, we i kamaot biaen long Maeka, we hem i kamaot biaen long Usiel, 25 mo Sekaraea, we i kamaot biaen long Jisia, brata blong Maeka ya, we hem tu i kamaot biaen long Usiel ya bifo, 26 mo Mali, mo Musi, mo Jahasia, we trifala i kamaot biaen long Merari ya bifo. 27 Jahasia ya i bonem tri pikinini boe blong hem we nem blong trifala, Soham, mo Sakuru mo Ibri. 28,29 Mo Mali ya i bonem tu pikinini boe blong hem we nem blong tufala, Eleasara mo Kis. Eleasara i no gat pikinini boe blong hem, be Kis i bonem wan pikinini boe blong hem we nem blong hem, Jeramehel. 30 Mo Musi ya i bonem tri pikinini boe blong hem we nem blong trifala, Mali, mo Eda mo Jeremot. Hemia nao ol Livaet* we oli kamaot biaen long Livae ya bifo, we ol haf blong laen ya oli kamaot biaen long olgeta.

31 Nao olsem we ol pris oli yusum ol spesel ston* blong seraot ol wok blong olgeta, long sem fasin, ol Livaet oli yusum ol ston ya tu blong seraot ol wok blong olgeta.* oli yusum ol spesel ston blong seraot ol wok blong olgeta, mo long sem fasin, ol Livaet oli yusum ol ston ya tu blong seraot ol wok blong olgeta. Long evri famle blong laen ya, hed blong famle wetem brata blong hem, tufala i kam yusum samting ya blong kasem wok blong famle blong tufala. Mo King Deved, mo pris ya Jadok, mo pris ya Ahimelek, mo ol pris we oli hed blong ol famle blong olgeta, mo ol Livaet we oli hed blong ol famle blong olgeta, olgeta evriwan oli witnes blong samting ya.