1 Nao long taem ya we King Deved i stap rul, hadtaem i kasem ol laen* blong Isrel,* we oli sot long kakae tri fulyia. Ale, king i go prea long Hae God blong faenemaot se hadtaem ya i kasem olgeta from wanem. Mo Hae God i givim ansa long hem se, "Trabol ya i stap from we bifo, King Sol i bin kilim ol man Gibeon oli ded, nao mak blong blad ya we i ron i stap yet long olgeta ya we oli stap kamaot biaen long hem." 2 ✝Ol man Gibeon ya oli no man Isrel, oli wan smol grup nomo we oli laen blong Amoro,* be oli kam stap long Gibeon, nao ol laen blong Isrel i bin mekem promes wetem olgeta blong lukaot long olgeta, blong trabol i no kasem olgeta. Be King Sol i bin traem blong kilim olgeta, from we hem i wantem tumas blong mekem i gud long olgeta man blong kantri blong hem.

3 Nao King Deved i singaot ol man Gibeon i kam, mo i talem long olgeta se, "Olgeta. Mi mi wantem stretem samting nogud ya we King Sol i mekem long yufala bifo. Mifala i man blong Hae God, mo mi mi wantem blong bambae yufala i save fren gud long mifala, nao Hae God bambae i blesem mifala."

4 Be olgeta oli talem se, "Rao ya blong mifala wetem King Sol mo olgeta we oli stap kamaot biaen long hem, silva mo gol i no save stretem, mo mifala i luk se mifala i no gat raet blong kilim wan long yufala tu."

Nao king i talem se, "?Be yufala i ting se bambae mi mekem olsem wanem long yufala?"

5 Mo olgeta oli talem se, "Bifo, King Sol i wantem kilim mifala evriwan i ded. Hem i no wantem livim wan long mifala i stap laef long Isrel. 6 Ale, mifala i wantem se naoia, yu mas givim long mifala seven man long olgeta ya we oli kamaot biaen long hem. Bambae mifala i go kilim olgeta oli ded, mifala i hangem olgeta long Gibea blong Hae God i save luk, from we bifo, ples ya i taon blong man ya we Hae God i jusumaot hem blong i kam king."

Nao king i talem se, "Bambae mi givim olgeta long yufala."

7 ✝Be from we king i bin mekem wan promes wetem Jonatan bifo long fes blong Hae God, hem i sevem Mefiboset we i smol bubu blong King Sol. 8-11 ✝Hem i tekem tu pikinini blong king ya we mama blong tufala Rispaha, wetem faef pikinini bakegen we mama blong olgeta Merab, we i dota blong king ya. Rispaha ya, hem i wan narafala woman blong king ya. Papa blong woman ya Aea, mo tufala pikinini ya blong hem Amoni mo Mefiboset. Mo ol pikinini ya blong Merab, papa blong olgeta Adriel, we papa blong hem wan man Mehola, we nem blong hem Basilae. King Deved i givim olgeta ya i go long ol man Gibeon, nao oli go kilim olgeta i ded, mo oli hangem olgeta long wan hil, blong Hae God i save luk olgeta. Oli kilim olgeta long taem we bale* i raep, stret long taem we ol man oli stat blong tekem kakae blong hem i kam.

Nao Rispaha i tekem ol ololfala klos, i go long ston ya we ol dedbodi blong olgeta ya i stap long hem, nao i yusum ol klos ya blong wokem wan wansaed haos blong hem long ples ya. Nao hem i stap nomo long ples ya, i stat long taem* ya we oli stat tekemaot kakae blong bale, gogo kasem taem blong ren. Long dei, hem i stap ronemaot ol pijin long ol dedbodi ya, mo long naet tu, hem i stap lukaot gud long olgeta blong blokem ol wael anamol oli no kam kakae olgeta.

Nao taem king i harem samting ya we Rispaha i mekem, 12 ✝hem i go long Gilead, i go luk ol man blong taon ya Jabes, blong i tekembak ol bun blong King Sol mo blong pikinini blong hem Jonatan. Ol bun blong tufala i stap long ples ya, from we bifo, long dei ya we ol man Filistia oli kilim King Sol i ded long hil ya Gilboa, oli hangem dedbodi blong tufala ya long bigfala nasara blong ples ya Betsan, be biaen, ol man Jabes oli kam stilim dedbodi blong tufala bakegen. 13 Nao king i tekem ol bun blong tufala ya, wetem ol bun blong ol seven man ya we ol man Gibeon oli hangem olgeta i ded, 14 nao oli go berem olgeta bun ya long beregraon blong Kis, papa blong King Sol. Beregraon ya i stap long Jela, long distrik ya Benjamin.* Ol man blong king oli mekem ol samting ya stret olsem we hem i talem. Mo biaen long ol samting ya, God i ansa long ol prea blong olgeta from kantri ya.

15 Nao ol man Filistia oli girap blong kam mekem faet bakegen long ol laen* blong Isrel,* mo King Deved wetem ol man blong hem oli godaon blong faet long olgeta. Olgeta oli stap longtaem lelebet, mo wan taem, taem oli stap faet, king i kam taed we i slak tumas. 16 Ale, wan lariken man blong ol man Filistia, we nem blong hem Jisbibenob, hem i ting se bambae i save kilim king ya i ded. Man ya, hem i stap karem wan spia we poen blong hem oli wokem long bras, we hevi blong hem i kasem tri kilo haf, mo i hangem wan niufala naef blong faet tu. 17 ✝Be Abisae i kam givhan long king, nao i faet long lariken man ya, i kilim hem i ded. Nao ol man blong king oli mekem hem i promes se bambae hem i no moa go wetem olgeta bakegen long faet. Oli talem long hem se, "Tingting blong mifala evriwan long kantri ya i stap long yu nomo, mo mifala i no wantem blong yu yu lus."

18 Biaen long taem ya, olgeta oli go faet long ol man Filistia bakegen, long ples ya Gob. Mo long taem ya, Sibekae we i man Husa, hem i kilim wan narafala lariken man blong Filistia i ded, we nem blong hem Saf.

19 Mo biaen, oli go mekem faet long ol man Filistia bakegen long Gob, mo Elanan, we papa blong hem man Betlehem ya Jaere, hem i kilim wan narafala lariken man i ded. Man ya i wan man Gat, we nem blong hem Golaeat, mo handel blong spia blong hem i bigwan olsem rafta blong haos.

20 Nao biaen bakegen, oli go mekem faet long taon ya Gat bakegen, mo long taon ya, i gat wan lariken man blong olgeta i stap we i laekem faet tumas. Man ya i gat twelef fingga long han blong hem, sikis long wan, sikis long wan, mo twelef fingga long leg blong hem tu, sikis long wan, sikis long wan. 21 Hem i singaot i kam long ol laen blong Isrel blong oli go faet long hem, nao Jonatan, we papa blong hem Sama, we i brata blong King Deved, hem i go kilim man ya i ded.

22 Ol fo lariken man ya oli kamaot biaen long ol lariken man blong Gat bifo, mo King Deved wetem ol man blong hem oli kilim olgeta evriwan oli ded.