1 None rero ko dukorana n’Imana, turabinginga ngo ntimupfishe ubusa ubuntu bw’Imana. 2 Kuko Imana ivuga iti:

"Igihe gikwiye kigeze narakwumvise,

no ku musi wo gukirizwako naragutabaye."*

Ndababwiye ko iki ari co gihe co kwemererwamwo, uwu ni wo musi wo gukirizwako.

3 Turirinda kugira ngo ntihagire uwo tubera igitsitaza kuko vyotuma igikorwa cacu kigawa. 4 Mu vyo dukora vyose, twerekana ko turi abakozi b’Imana b’ukuri mu kwihanganira amarushwa, imibabaro, n’ivyago vy’ubwoko bwose: 5 mu gukubitwa, mu gushirwa mu mabohero, mu gukora ibikorwa vyinshi biruhije, mu kurara maso, mu gusonza. 6 Ivyo dukora vyose tubikorana imitima itanduye, dufise ubwenge, dufise ukwihangana n’ubugwaneza biva kuri Mpwemu Yera, no mu rukundo atari uruheyiheyi. 7 Twigisha ijambo ry’Imana mu bwizigirwa no mu kuri kwaryo, kandi ubushobozi bw’Imana bukorera muri twebwe. Twitwaje ibigwanisho vy’ukugororoka mu kuryo no mu kubamfu. 8 Turakorera Imana abantu batwubaha canke batugaya, badutuka canke badushima. Turi imvugakuri, ariko batwita ababeshi. 9 Dufatwa nk’abatazwi ariko tuzwi na bose. Dusa n’abegereje urupfu ariko tubandanya tubaho. Turakubitwa ariko ntidupfa. 10 Turababazwa mu mitima ariko twamana umunezero. Dufatwa nk’abakenye ariko dutungishije benshi. Tuboneka nk’aho ata co dufise ariko dufise vyose.

11 Bagenzi b’i Korinto, twababwiranye umutima utagira uburyarya, kandi twabugururiye imitima yacu. 12 Ntitwananiwe no kubereka urukundo, ariko ni mwebwe mwugaye imitima yanyu. 13 None rero ndababwiye nk’abana banje ngo mwakire urukundo rwacu, mutwugururire imitima yanyu.

14 Ntimukifatanye n’abatizera, kuko ubugororotsi n’ubukozi bw’ikibi nta ho bihurira, kandi umuco n’umwijima nta co bisangiye. 15 Mbe Kristo na Beliyali hari ico bahurirako? Mbega uwizera n’uwutizera bohurira ku ki? 16 Mbega urusengero rw’Imana hari ico rwohurirako n’ibigirwamana? Twebwe turi urusengero rw’Imana, kandi Imana yavuze iti:

"Nzoba muri bo

nongere ngendane na bo.

Nzoba Imana yabo,

na bo bazoba abantu banje."*

17 None rero,

"Nimuve muri bo,

mwitandukanye na bo,

ni ko Uhoraho Imana avuze.

Ntihagire igihumanye mukorako,

nanje nzobiyegereza."*

18 Kandi,

"Nzobabera So,

namwe muzombera abahungu n’abakobwa,"

ni ko Uhoraho Mushoboravyose avuze.*