1 Ewe jewe ndagowe!

Meze nk’uwegeranya ivyamwa mu gihe vyeruye,

mu gihe co gutorora mu mizabibu;

ata mahando y’inzabibu zo kurya aboneka,

ata n’insukoni z’amasega ngo zimpembure.

2 Abizigirwa baheze mu gihugu;

nta mugororotsi n’umwe agisigaye.

Umuntu wese abundira kuvisha amaraso;

umuntu wese ahiga mugenziwe ngo amute mu mutego.

3 Ibiganza vyabo vyompi vyamogoreye gukora ibibi;

umutware asaba ingero,

abacamanza bakira ibiturire.

Abahambaye bategekesha agahahazo ngo baronke ivyo bipfuza,

kandi bose bahuje umutima.

4 Umuntu mwiza muri bo ameze nk’umubambangwe,

uwurusha abandi ukugororoka arusha ububi uruzitiro rw’amahwa.

Umusi wawe wo kugenderwa n’Imana urashitse,

umusi abarinzi bawe bazovuza inzamba.

Ni igihe cawe co kuzazanirwa.

5 Ntiwizigire umubanyi;

ivyizigiro vyawe ntibibe ku mugenzi.

Naho yoba umugore mubumbatirana,

wirinde ivyo iminwa yawe ivuga.

6 Kuko umuhungu ntiyubaha se,

n’umukobwa ahagurukiye kugwanya nyina,

umukazana akagwanya inabukwe,

abansi b’umuntu bakaba abo mu rugo iwe.

7 Ariko jeho nzokwitega Uhoraho nizigiye,

nzororera Imana Umukiza wanje;

Imana yanje izonyumva.

8 Ntunyitambe ku muvyimba, wa mwansi wanje we!

Naho naguye, nzovyuka.

Naho nicaye mu mwijima,

Uhoraho azombera umuco.

9 Kubera namucumuyeko,

nzokwihanganira uburake bw’Uhoraho,

kugeza aho azoburana urubanza rwanje

akarutsinda.

Azonsohora anshire mu muco;

nzobona ukugororoka kwiwe.

10 Maze umwansi wanje azobibona

hanyuma amaramare,

umwe yambwira ngo:

"Mbega Uhoraho Imana yawe ari hehe?"

Amaso yanje azokwibonera ugutemba kwiwe;

kandi azosiribangirwa hasi n’ibirenge

nk’ivyondo mu nzira.

11 Umusi wo kwubaka inzitiro zawe urashitse,

umusi wo kwagura imbibe zawe.

12 Kuri uwo musi abantu bazoza bakugana

bavuye muri Ashuri no mu bisagara vyo muri Egiputa,

mbere kuva muri Egiputa gushika ku ruzi Efurate,

no kuva ku kiyaga gushika ku kindi

no kuva ku musozi gushika ku wundi.

13 Isi izohinduka ubweranyange kubera abayibako,

bitewe n’ivyo bakoze.

14 Ragiza abantu bawe inyobozo yawe,

umukuku w’ishamvu yawe,

wibera ukwawo mw’ishamba,

ahantu h’uburagiro hamera.

Baragire i Bashani n’i Gileyadi

nko mu gihe ca kera.

15 "Nko mu misi mwava muri Egiputa,

nzobereka ibitangaza vyanje."

16 Amahanga azobibona amaramare,

inkomezi zabo zose zihere.

Bazoshira amaboko yabo ku munwa bumirwe.

17 Bazorigata umukungugu nk’inzoka,

nk’ibikoko bikwega inda hasi.

Bazosohoka bahinda agashitsi bava mu bibundo vyabo;

bazohindukirira Uhoraho Imana yacu bari n’ubwoba

kandi bazogutinya.

18 Ni iyihe Mana imeze nkawe,

iharira icaha, ikababarira ibigabitanyo

vy’amasigarira y’ishamvu yiwe?

Ntiwama uratse ibihe vyose

ahubwo uhimbarwa no kugira imbabazi.

19 Uzosubira kutugirira ikigongwe;

uzosiribangira ivyaha vyacu musi y’ibirenge vyawe

n’ibigabitanyo vyacu uzobita i bwina mu kiyaga.

20 Uzoba umwizigirwa ku ba Yakobo,

uzokwerekana urukundo kuri Aburahamu,

nk’uko wabirahiye ba sogokuruza bacu

mu bihe vya kera.