Akpa Ñwed Pita 3

Item Ndọ

1 Ke ukem usʌñ ado, ana ibaan ndọ esuuk iwuod enọ mme ebe ammọ nọ ato do akpedo a-aba awo ndomokeed ke atu ammọ i-imiinịmme ikọ Abasi ke akpanikọ, ammọ ekeme adiikappa esịd, itooho ke ukwọrọikọ, ado ato ke eduuwem ibaan ammọ; 2 ke a-ammọ emaekịt naña ibaan ammọ enie adisana ido ye ukpono ke uwem ammọ. 3 Uyai ndufo ikpinaaha akọñọ ke mbanaidem ikpọkidem, nte udọk ided ye adikọñọ ñkpọ mbanaidem a-kold, ye adisịne uyaiya afọñidem. 4 Ado uyai ndufo akpena ato esịd idem awuọ adi, nsi-nsi uyai a-adooho sʌñ-sʌñ ye ifuuro-ifuuro sịbidịd a-adooho akpan ñkpọ ke iso Abasi. 5 Sia ntom ke ndisana ibaan esed e-ekedotto anyen ke Abasi ekesibana idem ammọ. Ammọ emaesuuk idem enọ mme ebe ammọ, 6 kpa naña Sera akesuuk idem anọ Ebraham, anyʌñ akoot anye, "Abọọñ mmi." Ndufo edoñño nditọ ibaan amọ, adieke ndufo enamma se ifọn, imiinyʌññọ iyak ndịk idʌk ndufo idem.