1 Afo ayaiya die ntom, edima mmi!

Sai, ameyaiya tutu!

Anyen mfo ke esịd ufʌkiso mfo ado ibiom.

Ided mfo abit udịm ebod

e-esọiyọke eto ntəkabod Kilied.

2 Eded mfo aba nte udịmedọñ esʌkkọ efat ided ema,

ewuọñọke ke itie uyieidem.

Ammọ keedekeed enie amanamba;

ibaaha ndomokeed ke atu ammọ asañake ikpọọñ.

3 Ñkpọkinua mfo abit ñyiibe ididuod udʌkafọñ;

inua mfo ayaiya.

Akpọiso mfo ke esịd ufʌkiso mfo

atie nte ubaak pomekrened.

4 Itọñ mfo abit tọwa Defid,

ekebọppọ ke uwak udịm itiad;

ekọọñ tọsịn atuekọñ do,

afịd ammọ edo mme atuekọñ mbonekọñ.

5 Eba mfo aba nte nditọ edob iba,

ebit amanamba nditọ edob

e-esañake edia ndidia ke atu mme lili.

6 Tutu ayio asiere

ndukpọñ anyʌñ asop,

Ami ñyaadọọk ñkaa ekamba abod mee

ye ke etək abod insensi.

7 Afo ameyaiya afịd idem, edima mmi;

ndo ndomokeed ibaaha ke idem mfo.

8 Kpọñ Lebanọn ñkeene miin, anwaanndọ mmi,

kpọñ Lebanọn ñkeene miin.

Sọiyọ ke anyọñ abod Amana,

to ke anyọñ abod Seni, ye ke atịñe abod Hemọn,

to ke itiennaa mme ekpe

ye ke ikpọabod mme ekpeñkem.

9 Afo ameyịp esịd mmi, ayịneka mmi, anwaanndọ mmi;

afo ameyịp esịd mmi

ke akañ keed anyen ndise mfo,

ye ñkpọitọñ keed ake afo akọñọke.

10 Ima mfo anem die ntom, ayịneka mmi, anwaanndọ mmi!

Ima mfo anem die ntom, anem akan ukọd,

ye inemufịk eti adan mfo

afọn akan afịd inem ñkpadia!

11 Ñkpọkinua mfo atọi inịññe nte ndukpa adanakwọọk, anwaanndọ mmi;

mmọọñeba ye adanakwọọk esịne ke idak edeme mfo.

Inemufịk usịneñkpọ mfo

atie nte inemufịk ake Lebanọn.

12 Afo ado inwañ ake ekọppọ enịm, ayịneka mmi, anwaanndọ mmi;

afo ado idịm ake etọọhọ ekanna, usʌñ mmọọñ ake esiide.

13 Mme etoinwañ mfo edo inwañ pomekrened

ye nti mfịdeto,

ye mme eto hena ye naad,

14 naad ye safrọn,

kalamus ye sinamọn,

ye afịd mme kutọ-kutọ eto insensi,

ye mee ye mme alo

ye afịd mfọọn anem ufịk mfiọññọ eto.

15 Afo ado inwañ idịm mmọọñ,

ube ufeghe mmọọñ

a-afegheke ato ke Lebanọn.

16 Demme, afịm anyọñ,

nyʌñ di, afịm usuuk!

Ifịm ke inwañ mmi,

nọ inemufịk amọ asuana afịd itie.

Yak awoima mmi adʌk adi inwañ amọ

anyʌñ atabi mme nti mfịdeto amọ.