1 Ami ndo roos ake Sarọn,

ye lili ake mme abedeñ.

2 Nte lili ke atu mme ñkukịm

ke edima mmi ado ke atu ñkparawa ibaan.

3 Nte eto apịl ke atu mme eto ke akai

ke awoima mmi ado ke atu ñkparawa ideen.

Ami mmekop inemesịd aditie ke idak ndeeñ amọ,

ndin mfịd amọ anneenịññe miin ke inua.

4 Yak anye andat miin aka ke ufọk usọrọ,

ndin yak afọñidiọọñọ ake anye amfʌkkọ miin ado ima.

5 Nsọọñọ miin idem ke mme nsaad ndomuyo kreb,

ndemme miin uwem ke mme apịl,

sia ami mmesʌkkọ nnọ ima.

6 Ubọk ufiin amọ asịne ke idak iwuod mmi,

ubọk nnasia amọ anyʌñ amfat miin.

7 Nditọ ibaan Yeruselem, ami mmiwuuk ndufo

ke ntak mme edob ye mme ebed ikọd:

Ikiitọi, ikiinyʌñ idịppe nduduai ima

tutu anye ayem nọ idemme.

8 Awoima mmi! Kpañ utọñ!

Se! Se anye adiighe mi,

asʌk ataam aboiyo ke mme ikpọabod,

asaña akanna adaña ntəkabod.

9 Awoima mmi abit edob imiidooho anye abit ñyịn ayaara ebed.

Se! Anye ada ado ke edem ndibene ñnyịn,

asʌk ase ke mme ubenafịm

ada ke mben akọ anyuuñọ.

10 Awoima mmi amaatañ amaanyʌñ ambo miin ate,

"Dakka da, edima mmi,

uyai mmi, di mbịne miin.

11 Se! Ini atueb a-aboiyo;

edịm a-adep ama anyʌñ abiide.

12 Mme ñkpokpoñ ewuọñọ ke unadod;

ini ukwọ ikwọ a-adi,

e-ekop uyio ikwọ mme ibiom

ke isọñ ñnyịn.

13 Eto fik abak asịññe mfịd amọ;

mme nseghe fain esuan inem ufịk ammọ.

Dakka da, di, awoima mmi;

uyai mmi, di mbịne miin."

14 Ibiom mmi a-asịneke ke mme abaitiad,

a-abaaha ke mme itie ndịbe edem mme ikpọabod,

ñwọt miin iso mfo,

yak ami ñkop uyio mfo;

sia uyio mfo anenem,

iso mfo ayayaiya.

15 Mʌm mme ewaikọd inọ ñnyịn,

kpa ntək ewaikọd

e-ebiada mme inwañ fain,

mme inwañ fain ñnyịn amaatọọñọ isịññe ñkpokpoñ.

16 Awoima mmi ado ake mmi ami ñko ñnyʌñ ndo ake amọ;

anye asaaña ke atu mme lili.

17 Tutu ayio asiere

mme ndukpọñ enyʌñ esop,

wọññọ da, awoima mmi,

nyʌñ ba nte asọbusọb ñyịn edob

me nte ñyịn ebed

ke mme itiad-itiad ntək abod.