1 Mme Ikwọ Sọlọmọn

2 Yak anye antʌm miin inua ye ntʌminua ake inua amọ,

sia ima mfo annem miin esịd akan ukọd.

3 Ufịk nti pefium mfo anneenem;

anyịñ mfo atie nte pefium e-eduọkkọ.

Idooho ñkpọ ñkpaidem ke ñkparawa ibaan uma fiin!

4 Mben miin nọ mfeghe ye afo, nam nọ ñnyịn isọsọp!

Yak adidem andat miin adʌk ubeed amọ.

Ñnyịn imidaara inyʌñ ikop inem ke afo;

ñnyịn iyaitooro ima mfo ikan ukọd.

Ammọ e-enen adukpono fiin!

5 Nditọ ibaan Yeruselem,

ami ndo abubịd awo, ado mmeyaiya,

abubịd nte mme atayad Keda,

nte mme afọñ anyenusʌñ atayad Sọlọmọn.

6 Kuutịñ anyen unse miin sia ami mmebre,

sia ayio amfọp anam yak ami ndo abubịd.

Nditọeka mmi ideen emaeyat esịd ye ami

enyʌñ enam ami nse ñkpọ mbaña mme inwañ fain;

ado anam ami ñketre adise ñkpọ mbaña inwañ fain mmi.

7 Ndọkkọ miin, afo ake ami mmaaha,

itie se afo anọọ udịmedọñ mfo mbid

ye itie se afo anam edọñ mfo eduọk adudu ke ufọọd uweemeayio.

Ntak ami ñkpebaaha nte awonwaan a-afʌhọke ñkpọ afʌk iso-o

ye mme edọñ mme ufan mfo?

8 Adieke afo umuudiọọñọke, afo andiyaiya ñkan ke atu mme ibaan,

keene mme afañusʌñ a-mme edọñ esañake

nyʌñ nam mme ñyịn ebod mfo eta mbid do

ekpere mme atayad mme akpemeedọñ.

9 Edima mmi, ami udat fiin ndomo ye uman enañmbakara

ke atu mme enañmbakara ewatta sariọd ñkpọekọñ Fero.

10 Mfʌk mfo eyaiya ye mme ñkpahautọñ,

ye mme ñkpọuto ke itọñ mfo.

11 Ñnyịn iyainam ñkpahautọñ kold unọ fiin,

ake edọññọ silfa.

12 Ke ini adidem aketieghe ke akpokoro ndidia,

pefium mmi amaasuan ufịk amọ.

13 Awoima mmi ado etək ekpad mee annọ miin

a-aduọkkọ adudu ke ufọọd eba mmi.

14 Awoima mmi ado eboho ñkpokpoñ hena annọ miin

a-atooho mme inwañ fain ake En Kedi.

15 Afo ayaiya die ntom, edima mmi!

Sai, ameyaiya tutu!

Anyen mfo ado mme ibiom.

16 Afo ayaiya die ntom, awoima mmi!

Sai, se naña anduọhọ!

Ikʌk ñnyịn anyʌñ aseseghe.

17 Abom ufọk ñnyịn edo sida;

eto anyọñ akọm ufọk ñnyịn edo fir.