* 1 Ukod mfo ke ikpaukod ayaiya eti-eti,

O adiaha abọọñ!

Mfọọn ukod mfo eba nte ñkpọ mbanaidem,

ubọkutom anam utomusọ.

2 Akob mfo ado ikara-ikara iko ukọd

i-imiinanake uwawaak ukọd.

Itakisịn mfo ado ebono utọ abakpa

e-edatta lili etọ akọ ekanna.

3 Eba mfo etie nte nditọ edob iba,

ebit amanamba nditọ edob.

4 Itọñ mfo aba nte tọwa nnʌkeniin.

Anyen mfo ado ñkpọdiọhọ mmọọñ Hesbọn

a-abaaha akpere inuaatob Bad Rabim.

Akpọiwuo mfo aba nte tọwa Lebanọn

a-aseeghe Damaskọs.

5 Iwuod mfo uyat fiin anyanya nte Abod Kamel.

Ided iwuod mfo aba nte udọdọk afọñ ubọọñ;

anyan uwawañ ided mfo asịn adidem ukad.

6 Afo ameyaiya anyʌñ annọ miin inemesịd,

ima mmi, ye ñkpọ idadesịd mfo.

7 Anyan idaha mfo aba nte ayob,

eba mfo ñko ebit eboho mfịd.

8 Ami mmaabo, "Ami ñyaadọọk ekpad ayob;

Ami ñyaakịppe mfịd amọ."

Yak eba mfo aba nte eboho kreb ke idem fain,

inem ufịk inua mfo atie nte mme apịl,

9 inua mfo ñko aba nte ukọd anịññeke akan.

Ukọd ami akpekap akaa nnen-nnen abịne awoima mmi,

awere sʌñ-sʌñ asaaña ke ñkpọkinua ye eded.

10 Ami ndo ake awoima mmi,

anye anie udọñ annọ miin.

11 Di, awoima mmi, yak ñnyịn ika ke abioinwañ,

yak ñnyịn ikina ke mme esịdidʌñ ke akonayio.

12 Yak ñnyịn ibak ika inwañ fain

ikise me mme fain emaesio emịne,

me ñkpokpoñ ammọ etaara,

ñko me pomekrened enyʌñ esio ñkpokpoñ;

ke itie ado ami ñyaunọ fiin ima mmi.

13 Mme mandrek esioño inemufịk ammọ,

afịd inem ndidia ebono ke inuausʌñ ñnyịn,

ufa ye akaan

ake ami ñkekoonoke mbono unọọ fiin, awoima mmi.