1 Ami mmedʌk ndi inwañ mmi, ayịneka mmi, anwaanndọ mmi;

Ami mmekoono mee mmi ye inem ñkpadia mmi.

Ami mmedia ndukpa akwọọk ye adanakwọọk mmi;

Ami mmenwọñ ukọd mmi ye mmọọñeba mmi.

Idia, mme ufan, inyʌñ inwọñ,

inwọñ uyọhọ ima ndufo.

2 Ami mmaadaiya ado esịd mmi ikidaiyake.

Kpañ utọñ! Awoima mmi asʌk akọñ udọk:

"Beere nnọ miin, ayịneka mmi awonwaan, edima mmi,

ibiom mmi, anana ndo mmi.

Iwuod andʌppọ anọ mmọọñ ntuhube,

ided mmi adeññe anọ ndedeñ akonayio."

3 Ami mmesio afọñidem mmi,

ado se ntịmme mben nsịne?

Ami mmeyeyie ukod mmi;

ado se ntịmme nnam ammọ ebat?

4 Awoima mmi asịn ubọk amọ ke mbaak eto,

esịd mmi atọọñọ aduọ ke ntak amọ.

5 Ami ndakka nda adibeere nnọ awoima mmi,

ubọk mmi anyʌñ atọi mee,

mmọọñ mee asaaña ke nnuunubọk mmi,

ke mme umʌmubọk ekọbudọk.

6 Ami mbeere nnọ awoima mmi,

ado awoima mmi amaadakka, anye amaanyọñ.

Esịd amanduọ ke unyọñ amọ.

Ami mmaayem anye ado ñkekịtte anye.

Ami mmaakoot anye ado anye ikiñyieghe.

7 Mme akpeme abio emaeñkịt miin

naña ammọ ekesaañake ekanna eseet abio.

Ammọ emmia miin, ammọ ennọññọ miin unan;

ammọ emaembọ miin ufọfʌhọ afọñidem mmi,

kpa mbon ukpeme mme ndibene!

8 Nditọ ibaan Yeruselem, ami mmiwuuk ndufo nte,

adieke ndufo ekịtte awoima mmi,

nsoo ke ediitañ inọ anye?

Idọkkọ anye ke ami mmesʌkkọ nnọ ima.

9 Die ke awoima mfo afọn akan mbon mfen,

ñyaiyañkan ke atu mme ibaan?

Die ke awoima mfo afọn akan mbon mfen,

yak afo inọ ñnyịn utọ ewʌhọ ami?

10 Awoima mmi ayamma anyʌñ ayiibe ñkem,

awuọ ada ke atu tọsịn duob.

11 Iwuod amọ ado ñyaiya ñkan kold;

ided amọ ado ñwaaña-ñwaaña

anyʌñ abre nte ekọọñebʌkayob.

12 Anyen amọ atie nte ibiom

ke mme mben mmọọñ idịm,

eyette ke mmọọñeba,

edịppeke edot nte ñkpọ mmaidem.

13 Mfʌk amọ eba nte mme ikʌk inem ñkpadia

asañake ye inemufịk adan.

Ñkpọkinua amọ eba nte mme lili

ake atọiyọ mee.

14 Mme ubọk amọ edo mme esañ kold

a-ayọhọke ye topas.

Idem amọ atie nte mmọnọ-mmọnọ nnʌkeniin

edatta nsọñudua itiad ebana.

15 Ukod amọ edo mme adaaha mabịd

e-eduwʌkkọ ke ataa eti kold.

Anye adiwuọ nda abit Lebanọn,

ayaiya nte mme sida amọ.

16 Inua amọ ado inịññe ke idem amọ;

anye ado uyai afịd-afịd.

Anye ami ado awoima mmi, anye ami ado ufan mmi,

nditọ ibaan Yeruselem.