1 Afịd akonayio ke ikʌk mmi

ami mmaayem anye ake esịd mmi amaaha;

ami mmaayem anye, ado ñkekịtte anye.

2 Ami ñyaadakka nda idahami ñnyʌñ nsaña ñkanna abio,

ke mme efaak ye ke mme afe amọ;

ami ñyaayem anye ado ake esịd mmi amaaha.

Ndin ami mmaayem anye, ado ñkekịtte anye.

3 Mme akpemeabio emaeñkịt miin

naña ammọ ekesaañake ekanna eseet abio.

"Nte ndufo emekịt anye ado ake esịd mmi amaaha?"

4 Ami ñkekpọññọkpọñ ammọ ñkpeene

ke ini ñkekịtte anye ado ake esịd mmi amaaha.

Ami mmaamʌm anye ñnyʌññọ ñnyịmme adiyaak anye yak anyọñ

tutu ami mben anye ñkesịm ufọk eka mmi,

ke ubeed anye a-akeñyommoke miin.

5 Nditọ ibaan Yeruselem, ami mmiwuuk ndufo nte

ke ntak mme edob ye mme ebed ke akpa inwañ:

ikiitịmede ikiinyʌñ idemme ima

tutu anye anie udọñ.

6 Anie awo ido ami a-awuọhọ ke anaan adi

nte adaaha nsʌñikañ,

e-efiọññọke pefium ye mee ye insensi

e-ekamake afịd inem ñkpadia mme anyam udua enam?

7 Se! Ado ukpadñkpọ Sọlọmọn,

mbonekọñ ata esaña ekpeme,

mbon se ekpono ekan ke Isrel,

8 afịd ammọ ekọñọ akañkañ,

afịd ammọ enie ifiọk ebaña ekọñ,

ammọ keedekeed ekọñọ akañkañ amọ ke ñkañ,

ebeeñe idem ebaña ñkpọ ndịk ke akonayio.

9 Adidem Sọlọmọn amaanam ukpadñkpọ anọ idem amọ;

anye akekama eto a-atooho Lebanọn anam ukpadñkpọ ado.

10 Anye akekama silfa anam mme abai amọ,

akama kold anam eko amọ.

Akekama iduod-iduod afọñ afʌk akanna anyọñ ñkpọitie amọ,

akama ima abịt akanna esịd ñkpọitie ado.

Nditọ ibaan Yeruselem, 11 iwuọñọ idi,

inyʌñ ise, ndufo nditọ ibaan Saiyọn.

Ise naña Adidem Sọlọmọn ayara anyanya,

anyanya e-eka amọ akeyatta anye

ke usen ndọ amọ,

usen e-esịd amọ akedaarake.