1 Ke Yisọs akesañake awuọ akpọñ tembịd, mbed amọ keed amaabo anye, "Andikpeeb, kap se mme ikpọ aniendịk itiad ami, ye utọ ikpọ mfọọn ufọk ami!"

2 Yisọs amaabọọrọ anye ate, "Ndufo emekịt afịd mme ñkpoon ufọk ami? Ndomo itiad ami keed idiisọññọ idoro ke emọ-emọ; eyaetoomo afịd ammọ eduọọñọ ke isọñ."

3 Naña Yisọs aketieghe ke Abod Ọlif, ke nsakiso tembịd ado, Pita, Yems, Yọọn ye Andru emaebịp anye ke atu idem ammọ ete, 4 "Tañ inọ ñnyịn ini akee ke mme ñkpọ ami ediitịppe. Nsoo idiido idiọọñọ ke mme ñkpọ ami eyaesọp edisu?"

5 Do ke Yisọs akebo ammọ ate, "Inekke ikpeme mbaak awo ndomokeed adiben ndufo awakka akpọñ usʌñ. 6 Sia uwak awo eyaewuọ edi ke anyịñ mmi, edibo ndufo ete, ‘Ami ndo anye,’ eyaenyʌñ enam uwak awo ewakka ekpọñ usʌñ. 7 Ndufo imaikop ibaña ekọñ ye etob ekọñ, ikiiyak nọ esịd ndufo atịmede. Mme ñkpọ ami ana edat itie, ado idooho idiọọñọ utịd ini adodo; utịd idiwuọhọ diin. 8 Idịd ayaanwana ye idịd, abioubọọñ ayaanwana ye abioubọọñ. Mme unyeñisọñ eyaeba ke mme itie mme itie, akañ ayaaba. Mme ñkpọ ami edoñño idiọọñọ ntọọñọ ubiak uman.

9 "Ana ndufo enekke ekpeme idem ndufo. Eyaikappa ndufo esịn ke ubọk mme ukara ntək abio enyʌñ imia ndufo ikpa ke mme sinakọk. Eyaidaaha ndufo ke ikpe ke iso mme adaukara ye mme ndidem nọ ndufo edo ntiense enọ ammọ ke ntak mmi. 10 Ndin nte akpa ñkpọ, ana ekwọrọ eti etob enọ afịd mme idịd. 11 Ini keed akeedodo i-imʌmmọ ndufo eben eka ikpe, ikiikere me nsoo ke ediitañ inyaaña idem. Itañ kpa se Abasi itemme ndufo kpa idahado, sia idooho ikọ ndufo ke ediitañ; ado ikọ Adisana Sịbidịd.

12 "Ayịneka ayaatap ayịneka anọ ñkpa, ñko ete ayaanyʌñ atap ayịn amọ anọ ñkpa. Nditọ eyaedakka eda enwana ye mme ete ye mme eka enyʌñ enam ewot ammọ. 13 Afịd awo eyaisua ndufo ke ntak mmi, ado awo a-asọọñọke ada akewuọ utịd ayaanie adinyaaña.

14 "Ndin ndufo imaikịt naña ‘Mbubiam ñkpọ a-adatta nsobo adi,’ abaaha * ke itie i-imiikpibaaha, yak awo a-akoodo ñwed ami anekke adiọọñọ se awuọñọ; idahado yak mme andiba ke Yudia efeeñe ekaiya ikpọabod. 15 Ke awo ndomokeed a-adoroke ke anyọñ akọm ufọk asọiyọ ayem adikidʌk ufọk ñkeben ñkpọ ndomokeed nsio. 16 Ke awo ndomokeed a-abaaha ke inwañ atịmme akaa ufọk akeben afọñ ufʌkidem amọ. 17 Ado, mbọm ibaan e-esañake ye idịb ye ibaan e-esʌkkọ enọnọ mme nsekayịn eba ke utọ mme usen ado! 18 Ikap ibọñ akam ite yak ñkpọ ntịppe ami akuudo ke ini akpọsọñ atueb, 19 sia mme usen ado ediido ini ukuud; utọ a-adooho kpaanam ibaaha tọọñọ ke aditọọñọ, ke ini a-Abasi akebotto ederimbod tutu awuọ idahami; idiinyʌññọ ibaba aba.

20 "Ndin mmiikpidooho a-Abọọñ Abasi akenamma mme usen ado eməho, awo ndomokeed ikpibọkkọke. Ado ke ntak mme ndimek ikọd Abasi, anye a-anam mme usen ado eməho. 21 Ke ini ado awo ndomokeed akpibo ndufo, ‘Se mi, se Krais mi!’ me, ‘se, se anye ko!’ ikiinịm ke akpanikọ. 22 Uwak mme nsu-nsu krais ye mme prọfed nsu eyaewuọñọ edi enyʌñ edinam mme idiọọñọ ye mme utịppeñkpọ nọ ebiaña mme awo, ammọ ekpekan, kpa ye mme andimek Abasi. 23 Ke ntoro, iba ke ñkpemeidem sia ami mmebabak ntañ afịd ñkpọ inọ ndufo.

24 "Ado, ke mme usen ukuud ado emaeboiyo,

" ‘utịn ayaakappa ekịm,

afiọñ idiinyʌññọ inọ unwana,

25 mme ntantaafiọñ ñkọ eyaeto ke anyọñ eduọññọ,

ñko eyaenyeeñe mme adudu ke mme hefịn.’

26 "Ke ini ado, afịd awo eyaekịt Ayịn Awo naña adi ke ntọñanyọñ ye ayọhọ adudu ye ubọọñ. 27 Ndin anye ayaadọñ mme enyere amọ edikoono mme andimek ikọd amọ eto ke inuuk afịm inaañ, atọọñọ ke ataa utịd ederimbod tutu awuọ utịd mme hefịn.

28 "Ndin, ndufo idat ukpeebñkpọ ito eto fik: Anye amaasịññe nseghe ñkọk, amaana ko mme mfañ ewuọñọ, edat ado ediọọñọ ke ndaayio akpere. 29 Kpayeado, ndufo imaikịt afịd mme ñkpọ ami naña atịppe, eyaediọọñọ ebo ke* adikpere, mmọdo kpa ke inuausʌñ. 30 Ntañ akpanikọ inọ ndufo, emana ami idiiboiyoke ifep mbemiso mme ñkpọ ami etịppe. 31 Anyọñ ye isọñ eyaeboiyo efep, ado tutu amama mme ikọ mmi idiiboiyoke ifep.

32 "Amaado usen ado, me awa ñkanika ado, awo ndomokeed idiọọñọke; kpak mme enyere ke hefịn, me Ayịn, ke imiibọhọke Ete ikpọọñ. 33 Inekke iba ke mbeeñeidem, inekke itịñ anyen*! Sia ndufo imiidiọọñọke ini adidi Ayịn Awo. 34 Atie nte awo akpọñ ufọk aka isañ; ayaak adudu ke ufọk anọ nditọufọk abo ekpeme; adeeme utom anọ ammọ keedekeed; anyʌñ adọkkọ akpeme inuaatob ate anekke akpeme.

35 "Ke ntoro ikpeme, sia imiidiọọñọke ini a-anieufọk adiinyọñ idi; me adiido ndubiayio me ke ufọọd akonayio; me ke akikọunen akpọkkọ me ke usiere. 36 Anye akpedi adiwad-adiwad, ikiiyak adikịt ndufo nte edadaiya. 37 Se ntañ inọọ ndufo, ami ntañ ado nnọ afịd awo: ‘Ikpeme.’ "