1 Naña ammọ ekekpereke Yeruselem enyʌñ ediwuọ Betfas ye Betani a-abaaha ke Abod Ọlif, Yisọs amaadọñ mbed amọ iba ate: 2 "Ikaa ke idʌñ a-adaaha ke iso ndufo ko; imaisʌk idọdʌk eyaekịt abaak dọñki naña ayịre, a-adooho kpaanam awo ndomokeed iwatta, itat anye inyʌñ iben anye idi mi. 3 Awo ndomokeed akpibịp, ‘Ntak enamma ntoro-o,’ ‘Idọkkọ anye ibo ke Abọọñ ayem, ndin idiikpeeneke, ayaanọ anye eben etịmme edi.’ "

4 Ammọ emaekaa ekekịt abaak dọñki ke akpọusʌñ nte etobo ke mben anyenusʌñ. 5 Ke ammọ eketatta dọñki ami, mme awo e-ekedaaha emaebịp ammọ ete, "Nsoo inam nọ etat abaak dọñki ado?" 6 Ammọ emaebọọrọ naña Yisọs aketemme ammọ. Ndin mme awo ado emaeyaak ammọ eben dọñki edakka. 7 Ammọ emaeben abaak dọñki ami edinọ Yisọs enyʌñ esịññe afọñ anyọñidem ammọ ebịt ke edem amọ ndin Yisọs amaadọọk atie. 8 Uwak awo emaebịt afọñ anyọñidem ammọ ke akpọusʌñ, ke ini mbon mfen ekebịtte mme ñkọk eto a-ammọ ekekpịkkeke ke mme inwañ. 9 Mbon se ikisaña ke iso ye mbon se ikikeene ke edem emaekwaaha ñkpo enyʌñ ebọọñ ete,

"Hosana!*"

"Afọfọn anọ anye a-adiighe ke anyịñ Abọọñ."

10 "Adidiọñ anie adidi abioubọọñ ete ñnyịn Defid!"

"Hosana ke ataa anyọñ hefịn."

11 Yisọs amaadʌk Yeruselem adọọk akaa ke mme esịd akwere tembịd. Anye amaakanna anyen aseet afịd ñkpọ, ado sia ayio amaakesọñ, anye amaaboiyo akaa Betani ye mbed amọ duob mme iba.

12 Edem usen ado, idaha a-ammọ ekekpọññọ Betani, abiọọñ amaadọñ Yisọs. 13 Anye akeda akịt eto fik nte ayọhọ ye mfañ ke nsan-nsan, anye amaasaña akpere akese me anwịm idem. Anye akekesịm ndo, anye akekịt ke mfañ ikpọọñ ayịre, sia ikidooho ini e-eto ami asinwịmme. 14 Ndin anye amaasuuñọ eto ami ate, "Awo ndomokeed idiikịppeke mfịd mfo aba idia ke nsi-nsi." Mme mbed amọ emaekop ini a-anye atañña ikọ ami.

15 Ke ammọ emaekesịm Yeruselem, Yisọs amaadʌk ke mme esịd akwere tembịd anyʌñ atọọñọ adibịn mbon e-ekedeppe ñkpọ ye mbon e-ekenyamma ñkpọ do. Anye amaakanna mme akpokoro mme akpəho akʌk atọọñ ye mme ñkpọitie mbon e-ekenyamma ibiom, 16 ikinyʌññọ iyak awo ndomokeed aben ñkpọ udua asaña aboiyo ke mme akwere tembịd. 17 Ndin ke ini anye akekpeebe ammọ ñkpọ, anye amaabo, "Ado nte awo iwette ibo: ‘Eyaekoot ufọk mmi ufọk ubọñ akam ake afịd idịd’? Ado ndufo emeben anye enam ‘afe mbon inọ.’ "

18 Mme ñkpoon aku ye mme nta akpeeb mbed ekekop ami, emaetọọñọ adiyem usʌñ naña ekpeda ewot anye, ado ammọ ekebaabaak anye ke ntak ukpeebñkpọ amọ, sia idem amaakpa atu awo ekekoppo ukpeebñkpọ amọ.

19 Amaakediwuọ ndubiayio, Yisọs ye mme mbed* amọ emaekpọñ abio ado.

20 Ke ayio amaakesiere, naña ammọ ekesañake ke usʌñ, ammọ emaekịt ke eto fik ado amaayeppe atọọñọ ke adʌñ. 21 Pita amaatoiyo anyʌñ abo Yisọs ate, "Andikpeeb, kase! Eto fik a-afo akesuuñọke ayeeme mfañ."

22 Yisọs amaabọọrọ, "Nie mbuọdidem ke Abasi. 23 Ke akpanikọ* ke ami ntañ inọọ ndufo, adieke awo akeedodo abooho ekamba abod ami, ‘Dakka ke top idem mfo sịn ke akpainyañ,’ anye miinyʌññọ inie eyịghe ke esịd amọ, ado anịm ke akpanikọ ke se anye atañ ayaatịppe, eyaenam enọ ammọ. 24 Ke ntoro, ami idọkkọ ndufo, se adodo a-ndufo ebọññọ akam ebeeñe, inịm ke akpanikọ ke emebọbọ enie, ndin eyaebọ se ndufo ebeeñe ado. 25 Ñko ndufo imaida adibọñ akam, adieke enieghe utọk ye awo ndomokeed, ifeen inọ awo ado nọ Ete ndufo a-abaaha ke hefịn afeen mme idiọọkñkpọ ndufo. [26 Ado adieke ndufo imiifeene inọ awo mfen, Ete ndufo a-abaaha ke hefịn idiifeene mme idiọọkñkpọ a-ndufo enamma inọ ndufo."]*

27 Ammọ emaemaana ediwuọ Yeruselem, ndin ke ini Yisọs akesañake ke mme akwere tembịd, mme ñkpoon aku, mme akpeeb mbed, ye mme ñkpisọñ emaedi ebịne anye. 28 Ammọ emaedibịp anye ete, "Adudu akee ke afo adat anam mme afịd ñkpọ ami? Ñko anie akunọọ fiin adudu adinam se afo anam ami?"

29 Yisọs amaabọọrọ ammọ ate, "Ami ñko ñyaibịp ndufo mbịme keed. Imbọọrọ miin, ndin ami ñyaidọkkọ ndufo nte ami ndat adudu nnañña mme ñkpọ ami. 30 Uduọkmmọọñ Yọọn, me aketo hefịn me aketo awo? Itañ innọ miin."

31 Ammọ emaedọñọ adu ke idem ammọ ete, "Mmimọ ikpibo, aketo hefịn, anye ayaibịp, ‘Ntak a-ndufo imiikinịmme anye ke akpanikọ-ọ?’ 32 Ado ñnyịn ikpibo, ‘Aketo awo.’ " (Ammọ ekebabaak atu awo, sia afịd awo emaenịm ke Yọọn akedo ayọhọ prọfed.)

33 Ndin ammọ emaebọọrọ anye ate: "Ñnyịn idiọọñọke."

Yisọs amaabọọrọ ammọ ate: "Ami ndiinyʌññọ ntañ inọ ndufo nte ami ndat adudu nnam mme ñkpọ ami."