1 Ke ini ado atutu awo mfen emaediboho. Sia ammọ imiikinieghe se edia, Yisọs amaakoot mme mbed amọ anyʌñ abo ammọ ate, 2 "Mbon ami ennie miin udʌk; ammọ ebaba ye ami usen ita idiaha ñkpọ ndomokeed. 3 Adieke ami nnọọhọ ammọ enyọñọ ye abiọọñ, ammọ eyaesʌkkọ ke usʌñ, sia usʌk ammọ eto anyan usʌñ edi."

4 Mme mbed emaebọọrọ anye ete, "Mmọọ ke esịd idʌñ ami ke awo akeme adinie uyo adiiyʌkkọ ammọ?"

5 Yisọs amaabịp ammọ ate, "Eboho uyo ifañ ke ndufo enie?"

Ammọ emaebọọrọ ete "Itiaba."

6 Anye amaabo atu awo ate esuuk etie ke isọñ. Ke anye amaakeben eboho uyo itiaba ami anọ ekọọm, anye amaabʌñ ammọ anyʌñ ayaak anọ mme mbed amọ ate edeeme enọ mme atu awo, ndin ammọ emaenyʌñ enam ntoro. 7 Ammọ emaenie ñkeñe iyak ifañ ñko. Anye amaanyʌñ aben anọ ekọọm ndin abo yak mme mbed edeeme enọ mme atu awo. 8 Mme atu awo ami emaeta enyʌñ ekop uyʌkkọ. Akema mme mbed emaetañ ñyọhọnsʌhọ mbeñe a-akeyọhọke akpasa itiaba. 9 Ñkpọ nte ideen tọsịn inaañ ekeba do. Ke anye amaakenọ ammọ enyọñọ, 10 anye amaakedʌk ubom ye mme mbed amọ ekaa ñkanñkʌk idʌñ e-ekoodo Dalmanuta.

11 Mme Farisi emaedi enyʌñ etọọñọ adibịp Yisọs mbuume. Ke adidomo anye, ammọ emaebịp anye idiọọñọ a-atooho hefịn. 12 Anye amaanekke asiama anyʌñ abo ate, "Nsoo ido ntak e-emana ami eyemme idiọọñọ? Ami ntañ ami ke akpanikọ inọ ndufo mbo, ke awo idiinọọhọ ammọ idiọọñọ ndomokeed." 13 Ndin anye amaadakka akpọñ ammọ, atịmme akedʌk ubom akaaña ada ke edem uko.

14 Mme mbed emaefre adidat uyo ibọhọke eboho uyo keed a-akesịneke ke ubom. 15 Yisọs amaadʌt ammọ utọñ ate, "Inekke ikpeme idem ndufo ibaña yiis mme Farisi ye ake Herọd."

16 Mme mbed emaeneme ñkpọ ami ke idem ammọ ebo, "Ato ntak a-ñnyịn imiinieghe uyo."

17 Sia anye amaakediọọñọ se ammọ ekeneme, Yisọs amaabịp ammọ ate, "Ntak a-ndufo etañña ebaña unana uyo-o? Tutu ami ndufo ikịttekịt usʌñ, ñkpọ inyʌññọ inwanwaña ndufo? Esịd ndufo a-adoro ufiọọn? 18 Ndufo emenie anyen ado ikanna ikịt ñkpọ, e-enie utọñ ado ikanna ikop ikọ? Nte ndufo itoiyoke? 19 Ke ini ami ñkebuuñọ eboho uyo ition nnọ awo tọsịn ition, mbeñe se ndufo eketañ akeyọhọ akpasa ifañ?"

Ammọ emaebọọrọ ete, "Duob mme iba."

20 "Ke ini ami ñkebuuñọ eboho uyo itiaba nnọ awo tọsịn inaañ, mbeñe se ndufo eketañ akeyọhọ akpasa ifañ?"

Ammọ emaebọọrọ ete, "Itiaba?"

21 Anye amaabo ammọ "Isʌkkọ inwanwaña ndufo?"

22 Ammọ emaedisịm Bedsaida, ndin mme awo emaeben nnan edikpeiye Yisọs ete atuuk anye. 23 Anye amaamʌm awo nnan ke ubọk, adat anye usʌñ asaña awuọ akpọñ abio ado. Ke anye amaakefiat etab ke anyen awo nnan ado anyʌñ adot anye ubọk, Yisọs amaabịp anye ate, "Amekịt ñkpọ ndomokeed?"

24 Awo ami amaadịppe anyen ase anyọñ, anyʌn abọọrọ, "Ami mmekịt mme awo, ado ammọ etie nte eto esaaña."

25 Yisọs amaamaana adat ubọk atuuk anyen awo ado. Ndin anyen amọ amaatara, anye amaanyʌñ akịt ñkpọ mfọn-mfọn. 26 Yisọs amaanam anye anyọñ ufọk anyʌñ abo anye, "Kuudedei utịmme unyọñ* esịd idʌñ."

27 Yisọs ye mme mbed amọ emaekaa mme abio e-ekebaaha ke ñkanñkʌk Siseria Filipai. Ke usʌñ a-ammọ ekesañake, anye amaabịp ammọ ate, "Mme awo ebo ke ami ndo anie?"

28 Ammọ emaebọọrọ, "Ubaak ebo, Yọọn Aduọkmmọọñ; mbon mfen ete Elaiya; ado ndusʌk mfen ebo ke afo ado keed ke atu mme prọfed."

29 Anye amaabịp ammọ. "Ado ndufo-o? Ebo ke ami ndo anie?"

Pita amaabọọrọ: "Afo ado Krais."

30 Yisọs amaadʌt ammọ utọñ ate ke etañ ewọt awo ndomokeed ibaña imọ.

31 Ndin Anye amaatọọñọ adikpeep ammọ mbo ke Ayịn Awo ana abọ nsio-nsio ufen ndin ke mme ñkpisọñ eyaesịn anye, mme ikpọ aku ye mme andikpeeb mbed eyaesịn anye, eyaenyʌñ ewot anye, ndin usen ita amaaboiyo anye ayaaset. 32 Anye amaatañ anwa-anwa abaña ñkpa amọ, ndin Pita amaaben anye asanna ada anyʌñ atọọñọ adisua nnọọ anye.

33 Ado ke ini Yisọs amaakekanna ise mme mbed amọ, anye amaaduat Pita ate, "Setan, kanna nda miin ke edem! Afo unieghe eti akikere ubaña ñkpọ Abasi, ado akere abaña ñkpọ uduudawo."

34 Ndin anye amaakoot atu awo ye mme mbed amọ adat anyʌñ abo ammọ ate, "Awo akeedodo a-ayemme iñkeene miin ana akañ idem amọ anyʌñ aben krọs amọ añkeene miin. 35 Sia awo akeedodo a-ayemme adinyaaña uwem* amọ ayaaduọọk anye, ado awo akeedodo a-aduọọhọ uwem amọ ke ntak mmi ye ke ntak eti etob ayaanyaaña anye. 36 Nsoo ufọn ke awo adiinie, adieke anye adiaha afịd ederimbod, ado aduọọk ukpọñ amọ? 37 Me nsoo ke awo adiidat ikpʌhọ ye ukpọñ amọ? 38 Awo a-akoppo abuud ambaña miin ye ikọ mmi ke emana efịbe ye idiọọkñkpọ ami, Ayịn Awo ayaakop abuud abaña anye naña anye adiidi ke ubọọñ Ete ye mme ndisana enyere."