1 Ntọọñọ eti etob a-abañake Yisọs a-adooho Krais, Ayịn Abasi,* 2 kpa naña ewet ke ñwed prọfed Aisaiya:

"Ami ñyaanọ isʌñutom mmi nọ ubem fiin iso,

a-adiikidiọñ usʌñ inịm unọ fiin,"

3 "uyio awo andikoot ke anaan abo,

‘Idiọñ usʌñ inọ Abọọñ,

inam nnen-nnen usʌñ inọ anye.’ "

4 Ke ntom ke Yọọn Aduọkmmọọñ akebiọññọ ke anaan, adikwọrọ uduọkmmọọñ adikappa esịd, nọ efeen mme idiọọkñkpọ. 5 Afịd abio esịd idʌñ Yudia ye afịd mbon awo ke Yeruselem emaewuọñọ ekaa ebịne anye. Ke ammọ emaekeyaara mme idiọọkñkpọ ammọ, anye amaaduọk ammọ mmọọñ ke Inyañ Yọdan. 6 Yọọn akesịne afọñ e-ekedatta ided kamel enam, ye ñkpaha ikpa ke isịn amọ, ndin ndidia amọ akedo ñkukuñkpọyọriyọ ye adanakwọọk. 7 Etob a-anye akenọọhọ ado ami: "Anye a-adiidi anie adudu añkan miin, ami ndotto adinʌhọ ntat idʌk ikpaukod amọ. 8 Ami ñkama mmọọñ inịm ndufo uduọkmmọọñ ado anye adiiduọk ndufo mmọọñ ye Adisana Sịbidịd."

9 Ke ini ado, Yisọs amaato Nasared ke Kalili adi ndin Yọọn amaanyʌñ aduọk anye mmọọñ ke Yọdan. 10 Ke ini Yisọs akesañake awuọ ke mmọọñ, anye amaakịt nte hefịn abakka iba ye naña Adisana Sịbidịd asọiyọ nte ibiom adoro anye ke iwuod. 11 Ndin uyio amaato hefịn ate: "Afo ado Ayịn mmi, a-ami mmaaha eti-eti; mmenekke nnem esịd ye afo."

12 Idaha-idaha ado, Sịbidịd amaaben anye akaa anaan, ndin 13 anye akeba ke anaan usen aba, ndin Setan amaanyʌñ adomo anye idomo. Anye akeba do ye mme ndiọi unam ikọd, ndin mme enyere emaese ñkpọ ebaña anye.

14 Ke emaekesịn Yọọn ke ufọk ñkpakọb, Yisọs amaakaa Kalili, akekwọrọ eti etob Abasi. 15 Ukwọrọikọ amọ akedo, "Ini a-adi. Abioubọọñ Abasi a-akpere. Ikappa esịd inyʌñ inịm eti etob ke akpanikọ!"

16 Naña Yisọs akesañake ke mben Akpainyañ Kalili, anye amaakịt Saimọn ye ayịneka amọ Andru naña etop iyịre esịn ke ibiok, sia ammọ ekedo mme akọiyak. 17 Yisọs amaabo ammọ ate, "Idi, iñkeene miin, ndin ami ñyaidọñ ndufo ekekọ mbon awo." 18 Inikeed-inikeed, ammọ emaekpọñ iyịre ammọ enyʌñ ekeene anye.

19 Anye ikisañake inyọọñ usʌñ ke anye akekịtte Yems, ayịn Sebidi, ye ayịneka amọ Yọọn ke ubom nte esʌk ediọñ iyịre ammọ. 20 Yisọs ikibiatta ini adikoot ammọ, ammọ ñko ikibiatta ini adikpọñ ete ammọ, Sebidi ke ubom, ye mbon utom ammọ ñnyʌñ ñkeene Yisọs.

21 Ammọ emaekaa Kapanum, ndin akediwuọ usen Sabad, Yisọs amaadʌk akaa sinakọk anyʌñ aketọọñọ adikpeep ñkpọ. 22 Ukpeebñkpọ amọ amaakpa mme awo idem sia anye akekpeep ammọ nte awo a-anieghe adudu, idooho nte mme andikpeeb mbed. 23 Kpa idahado awodeen keed ke sinakọk a-akenieghe idiọọk sịbidịd amaasio ñkpo ate, 24 "Nsoo ke ayem ye ñnyịn, Yisọs Ayịn Nasared? Afo amedi adisobo ñnyịn? Mmediọọñọ awo se afo ado: Adisana Ayịn Abasi!"

25 Yisọs amaaduat anye ke akpọsọñ uyio ate: "Dop uyio. Wuọ anye ke idem!" 26 Ndedeghe sịbidịd ami amaatuak awo ami afai-afai, abọọñ akpọsọñ ñkpo anyʌñ awuọ akpọñ anye.

27 Idem amaakpa afịd awo tutu ammọ ebịp emọ-emọ ate, "Nsoo ido ami? Ufa ukpeeb a-asañake ye adudu! Tutu anye asinọ mme ndiọi sịbidịd uyio, ammọ enyʌñ ekop!" 28 Etob amọ amaasuana usọp-usọp akanna afịd ñkanñkʌk Kalili.

29 Ammọ ekesʌk ekpọkpọñ sinakọk, ammọ emaesaña ye Yems ye Yọọn ekaa ufọk Saimọn ye Andru. 30 Eka anwaan Saimọn akenaana ke ikʌk sia anye akenie ufiobidem, ndin ammọ emaekedọkkọ Yisọs ebaña anye. 31 Ndin Yisọs amaakaa akemʌm anye ubọk anyʌñ anwam anye adakka ada. Ufiobidem ado amaakweeñe anye, ndin anye amaadakka ada akenam ndidia anọ ammọ.

32 Ndubiayio ado, ke utịn amaakesop, mme awo emaekoono afịd mbon udọñọ ye mbon se dimọn akemʌm esọk Yisọs. 33 Afịd awo ke abio emaedibono ke mben udọk, 34 ndin Yisọs amaakọk mme uwak awo se ikinieñe nsio-nsio udọñọ. Anye amaanyʌñ abịn uwak dimọn asịññe mme awo ke idem, ado anye ikiyakka mme dimọn etañ ikọ, sia ammọ emaediọọñọ awo se anye akedo.

35 Ke ataa ubakusen, ke ayio miikinwañake ima, Yisọs amaadakka ada, akpọñ ufọk akaa ndobo-ndobo itie, a-anye akekebọññọ akam. 36 Saimọn ye mme nsaña amọ emaekaa ekeyem anye, 37 ndin ke ammọ emaekekịt anye, emaebo anye ete: "Afịd awo esʌk uyem fiin!"

38 Yisọs amaabọọrọ ammọ ate: "Yak ñnyịn ika mme abio mfen se ikpere mmi, nọ ami ñnyʌñ ñkekwọrọ ikọ ke udo. Ke ntak ado ke ami ndi." 39 Ndin anye amaasaaña ke afịd Kalili, akwọrọ ikọ ke mme sinakọk anyʌñ abịn mme dimọn asịññe mme awo ke idem.

40 Awo akpamfia* keed amaadibịne Yisọs anyʌñ atọọñọ edọñ akpeiye anye ate, "Adieke afo anyịmmeke, afo amekeme adinam nọ ami nsana."

41 Esịd amaaduọ Yisọs, mbọm anyʌñ anam anye.* Anye amaanyan ubọk amọ atuuk awo akpamfia ami ate, "Ami mmenyịmme, sana!" 42 Kpa idahado, akpamfia amaakweeñe anye, ndin anye amaasana.

43 Yisọs amaasio awo akpamfia ado unyọñ ini keed anyʌñ adʌt anye utọñ ate: 44 "Kịt bo ke utañña ñkpọ ami unọ awo ndomokeed. Ado kaa ke wọt aku idem mfo nyʌñ nam mme uwa naña Moses aketemme ke awo akpamfia amaasana, nte ñkpọ ntiense nọ ammọ." 45 Utu ke ado, awo ami amaaketañ anwa-anwa se Yisọs akenam anọ anye. Ke ntak ami, Yisọs ikikanna idʌk mme abio aba anwa-anwa, ado akappa akeba ke mme ndịbe-ndịbe itie. Kpayeado, mme awo ke afịd itie ekesʌk edidi ebịne anye.