1 Ini mfen Yisọs amaamaana akpeep ñkpọ ke mben ibiok. Atu awo e-ekekannake anye ekʌk amaakpon tutu adido se anye akedʌk ubom ke ibiok atie, ke ini afịd mme awo ekedudakka ke esʌk. 2 Anye akekpeep ammọ uwak ñkpọ ke ñke, ke ukpeebñkpọ amọ anye amaabo ntom: 3 "Ikpañ utọñ! Atọinwañ keed akekaa itọ ñkpasi ke inwañ amọ. 4 Naña anye akesuanna ñkpasi ado, usʌk emaeduọññọ ke akpọusʌñ, ndin mme inuen edikoono ammọ etaha. 5 Usʌk emaeduọññọ ke mme isọñ itiad, i–imiifọnnọ ñkpọ. Ammọ emaetịppe usọp-usọp, sia isọñ ikitʌñọke. 6 Ke ini utịn amaakedisakka adimia ammọ, ammọ emaeyeeme sia ammọ ikinieghe adʌñ. 7 Usʌk ñkpasi ekeduọññọ ke ikọd ñkukịm, e-ekekọttọ efʌk ammọ, anam ammọ ikinieghe mfịd. 8 Kpayeado mme ñkpasi mfen emaeduọññọ ke eti isọñ. Ammọ emaetịppe, ekọọt, enyʌñ enwịm abek mfịd akewakka, usʌk edịb mme duob, usʌk ata, usʌk ikie."

9 Ndin Yisọs amaabo, "Awo akeedodo a-anieghe utọñ, yak anye akop."

10 Akem ke ini Yisọs akebaaha ikpọọñ ke idem amọ, mme mbed duob mme iba ye mbon e-ekebaaha ekpere anye emaebịp anye ñkpọ ebaña mme ñke ado. 11 Anye amaabọọrọ ammọ ate, "E-eyaak mme ndedịbe ñkpọ abioubọọñ Abasi inọ ndufo. Ado amaado mbon mfen, etañ afịd ñkpọ ke ñke enọ ammọ 12 nọ ato do,

" ‘ammọ ekeme edikekịt ado idiọọñọke,

enyʌñ ekokop ado inwañake ammọ,

miidooho ammọ ekeme ikappa esịd ndin ato do efeen enọ ammọ.’ "

13 Ndin Yisọs amaabo ammọ ate, "Ñke ami inwañake ndufo? Ñke mfen adiinam die inwaña ndufo? 14 Atọ inwañ ke ñke ami atọ ikọ Abasi. 15 Usʌk awo eba nte ñkpasi e-eduọññọke ke akpọusʌñ ke emaetọ ikọ Abasi. Ammọ emaesʌk ekokop ikọ Abasi, Setan adi adiben ikọ e-eketọọhọ ke esịd ammọ afep. 16 Mbio mfen eba nte ñkpasi e-etọọhọ ke isọñ itiad, ammọ ekop ikọ Abasi enyʌñ enem esịd ke ataa idaha ekoppo do. 17 Ado sia ammọ imiinieghe adʌñ, ikọ Abasi ikpeeneke ke esịd ammọ. Mfịna ye ndutʌhọ emaedi ke ntak ikọ Abasi, ammọ eduọññọ usọp-usọp. 18 Ñko mbon mfen etie nte ñkpasi e-eduọññọke ke ikọd ñkukịm, ammọ ekop ikọ Abasi; 19 ado mfịna ederimbod, ye abiaña a-atooho inie ye udọñ nsio-nsio ñkpọ mfen edʌk edi, edikọt efʌk ikọ Abasi, efiik ikọ, iyakka anye anwịm mfịd. 20 Ndin mbon mfen etie nte ñkpasi e-etọọhọ ke eti isọñ. Ammọ edo mbon ekoppo ikọ Abasi, ebọ anye, enyʌñ enwịm mme abek mfịd e-ewakka, usʌk edịb mme duob, usʌk ata, usʌk akañ ikie akan se eketọ."

21 Yisọs amaabo ammọ ate, "Ndufo esidomo utuenikañ eben usan efʌk me esinịm ke idak ikʌk? Ndufo isidomoke ikañ iben idot ke ñkpọ udod utuenikañ? 22 Sia ñkpọ keed akeedodo e-edịppedịp, eyaeyaara, se adodo e-efʌkkọfʌk eyaefʌkkọ. 23 Awo akeedodo a-anieghe utọñ, yak anye akop."

24 Ndin Yisọs amaakaa iso atañ ate: "Inekke itʌm ikere se ndufo ekop ami. Se adodo a-ndufo edomoke enọọ awo, kpa ado ke ediidomo inọ ndufo, mmiidooho akan se ndufo ekedomo enọọ awo mfen. 25 Awo akeedodo a-anieghe ñkpọ, eyaemaana edian enọ anye, ado awo i-imiinieghe, eyaebọ idem se anye akenenie."

26 Ñko anye amaamaana abo, "Abioubọọñ Abasi aba nte awo a-asuanna ñkpasi ke isọñ. 27 Akonayio ye uweemeayio, me anye adadaiya, me adedemme-o, ñkpasi ado asʌk atịppe anyʌñ akọt, akpesʌkado anye imiidiọọñọke naña asaña. 28 Isọñ ke idem amọ ikpọọñ anam abakpa anwịm idem, emịne atịppe, akema iwuod awuọ ada, ke akpatre afịd idem ye mfịd ewuọñọ eda. 29 Mfịd amaakedat, atọ inwañ aban ikwa adakka adikpịkke sia ini idọk akem."

30 Anye amaamaana abo, "Ñnyịn idiibo ke abioubọọñ Abasi aba nte nsoo ñkpọ, me idiidat nsoo utọ ñke itañ iwọt naña abioubọọñ aba? 31 Anye aba nte ñkpasi mọstad, a-adooho andisịp ñkan ke atu afịd ñkpasi ke ederimbod. 32 Ado emaetọ ema, anye atịppe, akọt anyʌñ akpon akan afịd mme eto inwañ, anyʌñ anieñe ataa ikpọ ñkọk tutu adido se mme inuen anyọñ edi edisọrọ ke mfuud amọ."

33 Yisọs amaadat uwak ñke ntom akwọrọ ikọ Abasi anọ ammọ akeene naña akenwaña ammọ. 34 Anye ikitañña ikọ ndomokeed inọ ammọ ke miidooho ke ñke. Ado ini se anye akeba ikpọọñ ye mme mbed amọ, anye amaanam afịd ñkpọ anwaña ammọ.

35 Ke ndubiayio usen ado, anye amaabo mme mbed amọ ate, "Yak ñnyịn iwọññọ ika edem uko." 36 Ke ammọ emaekekpọñ mme atu awo, mme mbed amọ emaeben anye edakka ke ubom, kpa naña anye akesaña. Mme ubom mfen emaeba do ñko ye anye. 37 Ataa akpọsọñ ayobio amaatọọñọ tutu udakka akpa mmọọñ abʌññọ adʌk ubom akpere adiyọhọ esịd ubom. 38 Afịd ini ami, Yisọs akeba ke itak ubom asʌk adaiya ke udodiwuod. Ndin mme mbed amọ emaeketọi anye ke idab ebo anye ate, "Andikpeeb, awuọ ubegheke fiin adieke ñnyịn ideññe?"

39 Anye amaademme, asua anọ ayobio anyʌñ abo mbufuud akpa mmọọñ ate, "Dop! Naa sʌñ!" Ndin ayobio amaatre, afịd ñkpọ anyʌñ adobo biai.

40 Anye amaabo mme mbed amọ ate, "Ntak i-idem inyeññe ndufo ntom-o? Ndufo isʌkkọ inenie mbuọdidem?"

41 Akpọsọñ ndịk amaanam afịd ammọ, ndin ammọ emaenyʌñ ebiime emọ-emọ ete, "Anie awo ido ami? Kpa afịm ye mme mbufuud akpa mmọọñ ekop uyio amọ!"