1 Tuhi-tuhi ubakusen, mme ñkpoon aku ye mme ñkpisọñ ye mme andikpeeb mbed ye afịd mbon Sanhidrin, emaenam edioomo ammọ. Ndin ammọ emaebọp Yisọs, eben anye esaña ekeyaak enọ Pailed.

2 Ndin Pailed amaabịp anye ate, "Afo ado adidem mme Yuu?" Ndin Yisọs amaabọọrọ Pailed ate,

"Ado naña afo atañ."

3 Mme ñkpoon aku emaedot anye uwak-uwak ikọ. 4 Pailed amaatịmme abịp anye ate "Ado nte afo uyemme adibọọrọ? Se utọ afịd uwak ikọ se ammọ etañ udot fiin."

5 Ado Yisọs ikisʌkkọ ibọbọọrọ, anam idem amaakpa Pailed eti-eti.

6 Ke ini usọrọ, akesido ido Pailed adisisaana awo ñkpakọb keed akeedodo a-mbon idʌñ eyemme nnọọ ammọ. 7 Ndin amaaba awo keed a-akekereke Barabas, a-akebaaha ke ñkpakọb ye mbon mfen e-ekesịnne ntịme ke abio, kpa ye mbon e-ekewoodo awo ke ntịme ado. 8 Ndin atu awo emaedi ebịne Pailed edibeeñe anye ete anam naña anye asʌk asinam ke ini usọrọ ntom.

9 Ntom ke Pailed akebịp ammọ ate, "Ndufo ebo ñyaak adidem mme Yuu inọ ndufo?" 10 Anye akebịp mbuume ami sia anye amaadiọọñọ abo ke ntak ufọn idem ammọ akenam mme ñkpoon aku ekeyaak Yisọs inọ imọ. 11 Ado mme ñkpoon aku emaedọọñ atu awo ete ebo Pailed asaana Barabas ayaak.

12 Pailed ndin amaatịmme abịp ammọ ate, "Ndufo ebo nnam nsoo ndin ye anye a-ndufo ekoodo adidem mme Yuu?"

13 Afịd ammọ emaedọñ uyio keed ebọñ ete, "Kọñ anye ke krọs!"

14 Pailed amaabịp ammọ, "Ntak-a? Nsoo idiọọkñkpọ ke anye anam?"

Ado ammọ emaenenekke ebọñ ke akpọsọñ uyio ete, "Kọñ anye ke krọs!"

15 Pailed, ke adiyem adinem atu awo esịd, amaasaana Barabas ayaak anọ ammọ. Anye amaanam emia Yisọs, ndin asaana anye ayaak anọ ammọ ate eben ekekọñ ke krọs.

16 Mbon ekọñ emaeben Yisọs ewuọ edʌk esịd akwere, (ado ado Pretorium) enyʌñ ekoot udịm mbon ekọñ ediyọhọ. 17 Ammọ emaesịn anye ewịra, a-akebaaha iduud-iduud, ndin emaedọk anyanya ñkukịm eyat anye ke iwuod. 18 Ndin ammọ emaetọọñọ iben anye ntọọñ ndọk, ete, "Itọñ uwem asọñ adidem mme Yuu!" 19 Ammọ emaeben esañ eyʌppọ anye iwuod emaana eyʌppọ, enyʌñ ekọkkọ etab etọ anye. Akema, emaetọọñọ edọñ etuak iwuod enọ anye. 20 Ke ammọ emaekesuenne anye ema, ammọ emaesio anye iduud-iduud afọñ ewịra enyʌñ eben afọñidem amọ esịn anye. Ndin ammọ emaeben anye ewuọ ekaa adikọñ ke krọs.

21 Saimọn, ete Aleksanda ye Rufọs, a-akedooho awo Siriin, amaato esịd abio ayem adisaña mboiyo, ado ammọ emaemʌm anye enam anye abiom krọs Yisọs. 22 Ammọ emaeben Yisọs ekaa Kọlkọta (a-awuọhọ "itie ñkpọkpọrọ"). 23 Akema ammọ emaeben ukọd e-ewuaha ye atidod mee enọ anye, ado anye ikibọọhọ. 24 Ndin ammọ emaekọñ anye ke krọs, edeeme afọñidem amọ, ke emaekesịn ukañ adidiọọñọ me akee afọñ ke awo keedekeed adiidat.

25 Akedo ñkanika usʌkkeed ubakusen ke ammọ ekekọñ anye ke krọs. 26 Ndin ammọ emaewet ikọ ubiomikpe edian ke krọs, ete:

"Adidem mme Yuu."

27 Ammọ emaekọñ mme ndiọi awo iba ke krọs ediana anye, keed ke ubọk nnasia, keed ke ufiin. 28 [Ntom ke ikọ ñwed Abasi e-ekewette ebaña anye akesu: "Ndin emaebat anye esịn ke atu mme anam idiọọkñkpọ."]* 29 Mbon se ikisaña iboiyo do emaesueñ anye, efuuñ iwuod, ete, "Afo a-aduakka adiwuut tembịd ñnyʌñ mbọp ke usen ita, 30 sọiyọ ke krọs di nyaaña idem mfo!" 31 Kpa ke ukem usʌñ ado, mme ñkpoon aku ye mme akpeeb mbed ke atu idem ammọ ñko emaesaha anye, ete, "Anye amaanyaaña mbon mfen, ado ikanna inyaaña idem amọ. 32 Yak Krais ami, Adidem Isrel ami, asọiyọ adi ke krọs, nọ ñnyịn ikịt inyʌñ inịm anye ke akpanikọ." Mbon e-ekekọññọ ke krọs ediana anye emaekeene esueñ anye.

33 Ke ñkanika duob mme iba uweemeayio, ekịm amaafʌk afịd isọñ tutu ñkanika ita uweemeayio. 34 Ndin ke ñkanika ita uweemeayio Yisọs amaabọñ ke akpọsọñ uyio ate, "Eloi, Eloi, lema sabaktani?" (a-awuọñọke, "Abasi mmi, Abasi mmi, nsoo inam nọ afo añkpọñ miin?")

35 Ke ini usʌk mbon se ikida ikpere ekekoppo, ammọ emaebo, "Kop, anye akoot Elaiya."

36 Awo keed amaafeghe akedat kusa, anyiin ke fineka atot ke eto anyan anọ Yisọs ate anwọñ. Akem awo ado amaabo ate, "Ikpọñ anye ndin. Yak ise me Elaiya ayaadikọññọ anye ke eto."

37 Ke Yisọs amaaketua ke akpọsọñ uyio, anye amaaduọk akpatre ibifịk amọ.

38 Afọñ ikpeghe ke esịd tembịd amaasakka mbaak iba, tọọñọ ke anyọñ tutu awuọ isọñ. 39 Ke ini sentudiọn, etubom mbon ekọñ a-akedaaha do ke iso Yisọs akekịtte naña anye akekpa,* anye amaabo ate: "Ke akpanikọ, awo ami akedo Ayịn Abasi."

40 Usʌk ibaan mmọdo ekeda nsan-nsan ese se ikitịppe. Ke atu ammọ ekedo Mmeri Makdalin, ye Mmeri eka etək-etək Yems ye Yosef* ye Salomi. 41 Mme ibaan ami ekesisaña ye Yisọs ese ñkpọ ebaña anye idaha a-anye akebaaha ke Kalili. Uwak ibaan mfen e-ekesañake ye anye eto Yeruselem edi emaeba do ñko.

42 Akedo ke Usen Mbeeñeidem (a-adooho usen keed mbemiso asiere usen Sabad). Ndin akedikpere ndubiayio, 43 Yosef awo Arimatia, ekamba awuọiso awo ke ekamba Esob mme Yuu, a-anye ke idem amọ aketieghe abet ini adidi abioubọọñ Abasi, amaabịne Pailed uko-uko akebo anye inọ akpo Yisọs. 44 Idem amaakpa Pailed adikop ke Yisọs amaakpakpa. Pailed amaadọñ ekoot sentudiọn, ndin amaabịp me Yisọs amaakpakpa. 45 Ke anye amaakekop ito sentudiọn ke Yisọs amaakpa, anye amaayaak akpo amọ anọ Yosef. 46 Ndin Yosef amaakedep afọñ linen, akekọññọ akpo Yisọs awañ ke linen ado, anyʌñ aben akesịn ke udi e-ekekappa ke itiad. Ndin anye amaakpat itiad akwe inua udi ado. 47 Mmeri Makdalin ye Mmeri eka Yosef emaekịt itie e-ekebuuhọ anye.