1 Ini mfen Yisọs amaatịmme akaa sinakọk, ndin awo keed a-akenieghe ñkpaikpa ubọk amaaba do. 2 Usʌk awo e-ekeyemme ntak adidot Yisọs ikọ, mmọdo ekeba ñko, ndin ammọ emaenekke ewuuk anyen ese me anye ayaakọk awo ado udọñọ ke usen Sabad. 3 Yisọs amaabo awo a-akenieghe ñkpaikpa ubọk ate, "Dakka da ke iso afịd awo."

4 Ndin Yisọs amaabịp ammọ ate, "Anye akee ke mbed abo enam ke Sabad: Adinam eti ñkpọ me adinam idiọọk, adinyaaña uwem me adiwowot?" Ado ammọ ikisioho uyio.

5 Anye ndin amaakanna ase ammọ ke iyadesịd, afʌhọ eti-eti ke ntak isọñesịd ammọ, anyʌñ abo awo ado ate, "Nyanna ubọk mfo." Anye amaanyanna, ndin ubọk amọ amaamaana akappa adeghe ataa afịd-afịd. 6 Idaha-idaha ado mme Farisi emaewuọñọ ke itie ubọñ akam enyʌñ eketọọñọ adidʌk edioomo ye mbon ñka Herọd naña ammọ ekpesaña ewot Yisọs.

7 Yisọs ye mme mbed amọ emaekpọñ ekaa ibiok, ndin uwak atu awo emaeto Kalili ekeene anye. 8 Mme awo ekekop afịd se anye akenam, uwak awo emaeto Yudia, Yeruselem, Idumia ye mme ñkanñkʌk ukañ Yọdan ye mme ukañ Tai ye Sidọn edibịne anye. 9 Ke ntak atu awo ami, anye amaabo mme mbed amọ ate yak ebọ etək ubom enịm inọ imọ, mbaak mme atu awo edifiik imọ. 10 Sia anye amaakọk uwak awo udọñọ, mme adọñọ nsio-nsio udọñọ emaenək idem edi iso nọ ekan etuuk anye. 11 Ini keed akeedodo a-mme ndedeghe sịbidịd ekekịtte anye, ammọ emaeduọññọ ke isọñ ke iso amọ ebọñ ñkpo ete, "Afo ado Ayịn Abasi." 12 Ado anye amaadʌt ammọ utọñ ate ammọ ekuyaara ake imọ ido inọọ mbon mfen.

13 Yisọs amaadọọk anyọñ mben ekamba abod anyʌñ akekoot mbon se anye akeyem, ndin ammọ emaedi ebịne anye. 14 Anye amaamek awo duob mme iba* e-ediiba ye anye, mbon a-anye adiinyʌñ idọñ nọ ekekwọrọ ikọ Abasi; 15 ediinyʌñ inie adudu adibịn mme dimọn nsịññe awo ke idem.

16 Awo duob mme iba a-anye akemekke edoñño ami:

Saimọn (a-anye akenyʌññọ anọ anyịñ Pita),

17 Yems, ayịn Sebidi ye ayịneka amọ awodeen Yọọn (a-anye akenọọhọ ammọ anyịñ Bonekes, awuọñọke "nditọ aduma"),

18 Andru,

Filib,

Batolomiu,

Matiu,

Tọmọs,

Yems ayịn Alfiọs,

Tadiọs,

Saimọn a-akedooho Amaidʌñ,

19 ye Yudas Iskariọd, andikitap anye nnọọ ñkpa.

20 Ke ini Yisọs amaakedʌk ufọk keed, mme atu awo emaemaana ediboho do tutu anye ye mme mbed amọ ikikanna idia ukpọk ndidia. 21 Ubon* amọ ekekop ami, ammọ emaekaa adikpeme anye sia ammọ ekebo, "Iwuod aboiyo anye."

22 Ndin mme akpeeb mbed e-eketooho Yeruselem emaebo ete, "Belsibọb asịne anye ke idem. Anye adat adudu akpan abọọñ mme dimọn abịn mme dimọn asịññe awo ke idem."

23 Do ke Yisọs akekoot ammọ nọ esaña ekpere anye anyʌñ atọọñọ aditañ ikọ nnọọ ammọ ke ñke ate: "Setan akeme die adibịn setan nsio? 24 Adieke abioubọọñ abakkake ada anwana ye idem amọ, abioubọọñ ado idikanna isọọñọ ida. 25 Adieke ufọk anieghe ubakka, ufọk ado idikanna ida ñko. 26 Ñko adieke Setan anwanake ye idem amọ, anye idiikanna isọọñọ ida: awuọ utịd amọ adikem. 27 Ke akpanikọ awo ndomokeed ikanna adidʌk ufọk akpọsọñ awo ibọhọke anye abem iso abọp akpọsọñ awo ado. Do ndin ke anye adiikan ibịme ñkpọ ke ufọk awo ado ikoono. 28 Ke akpanikọ ke ami idọkkọ ndufo, eyaefeen afịd ndiọiñkpọ ye afịd atịme-atịme ikọ adidọk a-mme awo etañña, 29 ado awo akeedodo a-atañña atịme-atịme ikọ emiom adian Adisana Sịbidịd, awo idiifeene idiọọkñkpọ amọ sia ammọ enie ubiomikpe nsi-nsi idiọọkñkpọ."

30 Yisọs aketañ ami sia ammọ ekebo, "Anye anie ndedeghe sịbidịd."

31 Ndin eka ye nditọeka ideen Yisọs emaediwuọ. Ammọ ekeda ke anwa esiin, edọñ awo akekoot anye inọ mmimọ. 32 Atu awo se ikitie ikanna anye emaebo anye ete, "Eka mfo ye nditọeka mfo ideen esʌk uyem ke anwa esiin."

33 Yisọs amaabịp ammọ ate, "Mme anie ido eka ye nditọeka mmi ideen?"

34 Ndin anye amaasuan anyen aseet mme awo e-eketieghe ekanna anye ekʌk, anyʌñ abo, "Eka mmi ye nditọeka mmi ideen edoñño ami! 35 Awo akeedodo a-anamma uduak Abasi ado ayịneka mmi awodeen ye ayịneka mmi awonwaan ye eka mmi."