1 Mme anyịñ nditọ Isrel e-ekekeeneke Yekọb eka isọñ Iyib edo ami, kwa awo kwa ubon amọ:

2 Rubịn, Simiọn, Lifai ye Yuda,

3 Isaka, Sebulọn ye Benyamin,

4 Daan ye Naftali; Kad ye Asaa.

5 Afịd nditọ Yekọb ekedo awo ata mme duob; Yosef mmọdo akebaba ke Iyib.

6 Akema Yosef ye afịd nditọete amọ ideen ye afịd emana ado emaekpañña, 7 ado nditọ Isrel emaetọt eti-eti; ammọ emaetara, enyʌñ etọt ke ibad enyʌñ ewak tutu afịd isọñ akeyọhọ ye ammọ.

8 Akem ufa adidem, a-Yosef imiikidooho ñkpọ ndomokeed inọ anye inyʌññọ ikidiọọñọ se Yosef akenam anọ Iyib, amaadida ukara ke Iyib. 9 Anye amaabo ikọd amọ ate, "Nditọ Isrel e-edinekke ewak ikan ñnyịn. 10 Ana ñnyịn idu uwem ke mbufiọk ye ammọ, imiidooho ntoro, ammọ eyaewawak ekan ado, ndin adieke ekọñ atịppeke, ammọ eyaeda ye mme asua ñnyịn enwana ye ñnyịn, enyʌñ ewuọọñọ ekpọñ idịd ñnyịn."

11 Ke ntak ado ammọ emaenịm mme etubom ifʌn enọ ammọ, adifiik ammọ ke unyenyịk utom; ndin ammọ emaebọp itie unịm ñkpọ ke Pitọm ye Ramese nte mme abio ubonoñkpọ enọ Fero. 12 Ado naña nte ekefefiik ammọ, ntoro ke ammọ ekekaiso etọt enyʌñ etara, ndin mbon Iyib emaekappa ebaak nditọ Isrel, 13 enyʌñ ekaa iso enọ ammọ utom ibak-ibak. 14 Ammọ emaenam uwem adooro nditọ Isrel ke ntak akpọsọñ utom adiwuak mbad mbot ntək itiad ubọbufọk ye nsio-nsio utom ke mme inwañ. Ke afịd akpọsọñ utom ado, nditọ Iyib ikinieghe mbọm ibaña ammọ.

15 Adidem Iyib amaadọkkọ mbiauman nditọ Hibru, e-ekekereke Sifra ye Pua abo, 16 "Ndufo imaimʌm ibaan Hibru uman ke itie umʌmuman, ekpekịt ke nsekayịn awodeen ke ado, iwot anye, ado akpedo ayịn awonwaan, iyaak anye adu uwem." 17 Ado, mbiauman nditọ Hibru emaebaak Abasi, ndin ikinamma se adidem Iyib akebo ammọ enam. Ke ntoro ammọ emaeyaak nditọ ideen edu uwem. 18 Ndin adidem Iyib amaadọñ ekoot mbiauman ado, anyʌñ abịp ammọ abo, "Nsoo inam yak ndufo enam ntom? Nsoo inam ndufo eyaak nditọ ideen edu uwem?"

19 Mbiauman ado emaebọọrọ Fero ete, "Ibaan Hibru ibaaha nte ibaan Iyib; ammọ ekop adudu ke idem, enyʌñ esiman nditọ mbemiso mbiauman ediwuọwuọ."

20 Ke ntoro Abasi amaafọn ido ye mbiauman ado, ndin nditọ Isrel emaetọt enyʌñ enekke ewak ekan naña ekedodo. 21 Abasi amaanọ mbiauman ado ubon ammọ, sia ammọ emaebaak Abasi.

22 Ke ntom Fero amaanọ afịd ikọd amọ uyio ate: "Ana ndufo etoomo afịd nsek nditọ ideen Hibru e-emanna edọñ ke Inyañ Nail, ado eyaak afịd nsek nditọ ibaan edu uwem."