1 "Nam akpokoro ufọb insensi ke eto akasia. 2 Ana anye ado mbañ inaañ, kubid keed ke unyọọñ ye kubid keed ke ukpa, ndin kubid iba ke ukoñ*, mme nnʌk amọ edo ifre keed ye anye. 3 Dot anyọñ amọ ye afịd mbañ amọ ye nnʌk amọ ke ataa eti kold, nyʌñ fʌk kold kanna anye. 4 Nam ikara kold iba nọ akpokoro uwa ke idak, iba-iba ke nsakiso mbañ ammọ iba, adimʌm mme mboi e-ekekamake eben anye. 5 Nam mme mboi ke eto akasia, nyʌñ dat kold fʌk ammọ. 6 Yak akpokoro uwa aba ke iso afọñ ikpeghe a-afʌkkọ akebe edioomo mbed enwọñọ, mbemiso ufʌkñkpọ ñkpeubọk a-afʌkkọ itiad akebe edioomo mbed, itie a-ami ndiisoobo ye ndufo.

7 "Erọn ana afọp inem ufịk insensi ke itie akpokoro uwa ado afịd ubakusen idaha a-anye akaaha adidomo ikañ akpokoro uwa. 8 Ana Erọn amaana afọp insensi ke ini a-anye adomoke ikañ uwa ke utịn ubakusen ye ndubiayio nọ insensi asak asio inem ufịk afịd-afịd ini ke iso Abọọñ anọ mme emana ke ini iso. 9 Kuuwaa insensi mfen ke akpokoro uwa ado, me ufọfọb uwa mfen, me uwa mfịd inwañ, kuunyʌñ unam uwa uduọk ukọd ke anye. 10 Akañ keed ke isua, Erọn ana anam uwa ñkpeubọk ye iyiib uwa ñkpeubọk idiọọkñkpọ* anọ mme emana ke ini iso. Ado ataa adisana ñkpọ anọ Abọọñ."

11 Akema Abọọñ amaabo Moses ate, 12 "Umaubat nditọ Isrel, awo keedekeed ana akpe Abọọñ ekọmudua ke iwuod uwem amọ ke idaha esʌkkọ ebat anye. Ndin afo umaubat ammọ, idiọọk udọñọ ndomokeed idiisịmme ammọ. 13 Awo se iboiyo idʌk ukañ e-emaekebabat ana anọ mbaak sekel* keed a-anieghe udob kera edịb, akeene naña mbed adisana itie sekel atemme. Mbaak sekel keed ami ado enọ e-enọọhọ Abọọñ. 14 Afịd mbon e-edooho isua edịb, me awakka akan ado, ana enọ Abọọñ enọ ami. 15 Mme imọawo inaaha enọ awak akan mbaak sekel keed, ñko mme uweene inaaha enọ asịp akan ke ini afo anọọhọ Abọọñ enọ adikpe ubọk mbaña uwem ndufo. 16 Bọ nditọ Isrel akʌk ukpeutịb nyʌñ dat anye nam ñkpọ ke esob itie atayad mbono. Ami adiido ñkpọ aditoiyo inọ nditọ Isrel ke iso Abọọñ, ke adinam ñkpeubọk nnọọ uwem ndufo."

17 Akema, Abọọñ amaabo Moses ate, 18 "Nam besịn ke brọns, a-anieghe ukod brọns, nte ñkpọ uyieidem. Nịm anye ke ufọọd atayad mbono ye akpokoro uwa, nyʌñ sịn mmọọñ ke esịd. 19 Erọn ye nditọ ideen amọ ana eyie ubọk ye ukod ammọ ke mmọọñ ado. 20 Ammọ emaedʌk atayad mbono, ana eyie ubọk ke mmọọñ mbaak ammọ edikpa. Ñko, ammọ emaesaña ekpere akpokoro uwa adiwa uwa ndidia nnọọ Abọọñ, 21 ana ammọ eyie ubọk ye ukod mbaak ammọ edikpa. Ami adiido nsi-nsi mbed inọ Erọn ye mme ubon amọ ke mme emana se idiidi."

22 Akema, Abọọñ amaabo Moses, 23 "Ben mme nti anemufịk mmọọñ-mmọọñ adan mee sekel ikie ition* (500), ake sinamọn mbakka iba ñkpọ nte sekel ikie iba mme aba mme duob (250), inem ufịk adan kalamus sekel ikie iba mme aba mme duob (250), 24 adan akesia sekel ikie ition (500), afịd akeene udomoñkpọ sekel adisana itie ye adan ọlif hin* keed. 25 Nam nọ ado adisana adan adidiọñ, e-ewuaha inem ufịk, utom atem a-pefium. Anye adiido eti adisana adan adidiọñ. 26 Ndin ben anye diọñ atayad mbono, akebe edioomo mbed enwọñọ, 27 akpokoro ye afịd mme ñkpọ utom amọ, udod utuenikañ ye afịd ñkpoduoho amọ, ye akpokoro uwa ufọp insensi, 28 akpokoro ufọfọb uwa ye afịd ñkpoduoho amọ, ye besịn ye mme ukod amọ. 29 Ana afo adiọñ anye nọ ammọ edo ataa ndisana, ndin ñkpọ ndomokeed se ituuk ammọ eyaekappa edo adisana.

30 "Yet Erọn ye nditọ amọ ideen adan, nyʌñ diọñ ammọ nọ ammọ enam ñkpọ ennọ miin nte mme aku. 31 Dọkkọ nditọ Isrel, ‘Ami adiido adisana adan adidiọñ mmi ke afịd emana. 32 Ikiiduọk anye ke idem awo mfen, ikiinyʌñ inam adan mfen ke ukem usʌñ ami. Anye ado adisana, ana ndufo edat anye nte adisana. 33 Ana ewot awo akeedodo imiidooho aku a-anamma ukem inem ufịk adan a-abaaha ntom, anyʌñ aben aduọk awo mfen ke idem.’ "

34 Akema, Abọọñ amaabo Moses ate, "Dat mme anemufịk mfañ, kọm a-resịn, onisa, ye kalbanum, ye ataa eti frankinsensi, afịd ammọ ana edo ukem-ukem udomo, 35 nyʌñ waak ammọ nam inem ufịk insensi, ubọkutom awo se inam eti inem ufịk adan. Ana esịn inʌñ, enam anye asana, anyʌñ ado asaña-asaña. 36 Kọk ubaak amọ nọ adọrọ nte ntọñ, nyʌñ nịm anye ke iso itie akebe edioomo mbed ke atayad mbono, itie a-ami ndiisoobo ye ndufo. Adiido ataa adisana ñkpọ inọ ndufo. 37 Kuunam insensi mfen ke utọ usʌñ ami unọọ idem ndufo; dat anye nte adisana ñkpọ Abọọñ. 38 Awo ndomokeed a-anamma insensi se iba ntom nọ anye akop inem ufịk amọ ana ewot anye esio ke atu mbon ammọ."