1 Ke ini Moses akesʌkkọ abọọk ufene Yetro, ete anwaan amọ, a-akedooho aku ke Midian, anye amaakoono ufene akesịm edem ukañ anaan tutu akewuọ Họreb, abod Abasi. 2 Do ke enyere Abọọñ akeyaara idem awọt anye ke edemeikañ ke esịd ikọd. Moses amaakịt ke akpesʌkado i-ikañ akesakka ke ikọd, ikañ ikitaaha ikọd. 3 Ndin Moses amaakere ke esịd amọ abo, "Ami ñyaasaña ñkese utọ ñkpọ ñkpaidem ami, ntak i-ikañ imiitaaha ikọd."

4 Ke ini Abọọñ amaakekịt ke anye amaakanna akaa adise, Abasi amaakoot anye ke ufọọd esịd ikọd, "Moses! Moses!"

Moses amaabọọrọ, "Se miin mi."

5 Abasi amaabo anye, "Kuusaña ukpere ukan ado! Sịññe ikpaukod ke ukod mfo, sia itie a-afo adaaha do ado adisana isọñ." 6 Ndin Abasi amaabo, "Ami ndo Abasi ete mfo, Abasi Ebraham, Abasi Aisik ye Abasi Yekọb." Moses akekop ami, anye amaadịp iso amọ, sia anye amaakop ndịk adise Abasi.

7 Ndin Abọọñ amaabo Moses, "Ke akpanikọ, ami mmekịt ukuud ikọd mmi ke Iyib. Ami mmekop ntuaña ye eseeme ammọ ke ubọk mme etubom ifʌn ammọ; mbọm anyʌñ annam miin abaña ufen a-ammọ ebọọhọ. 8 Ke ntoro ami mmesọiyọ ndi adinyaaña ammọ nsio ke ubọk mbon Iyib, ñnyʌñ mben ammọ nsio ke isọñ ado ñkesịn ke eti isọñ a-anwañake, isọñ a-afiọọrọke ye mmọọñeba ye adanakwọọk, isọñidʌñ mbon Kenan, mbon Hed, Amọọ, mbon Peris, Hif ye mbon Yebus. 9 Idahami, ntuaña nditọ Isrel adinsịm miin, ñko ami mmekịt naña mbon Iyib efiik ammọ. 10 Kaa idahami. Ami udọñ fiin utom nnọ Fero mbo akeben ikọd mmi Isrel asio ke isọñ Iyib."

11 Ado Moses amaabo Abasi ate, "Ami ndo anie adika mbịne Fero ñnyʌñ ñkesịññe nditọ Isrel ke Iyib?"

12 Ndin Abasi amaabo anye, "Ami ñyaaba ye afo. Ndin se idiido idiọọñọ unọ fiin ke ado ami udọñ fiin ado mi: Afo umauben ikọd mmi usio ke Iyib, ndufo eyaekpono Abasi ke ekamba abod ami."

13 Moses amaabịp Abasi abo, "Akpedo ami ñkaa ñkedọkkọ nditọ Isrel mbo, ‘Abasi mme eteete ndufo andọñ miin utom inọọ ndufo,’ ndin ammọ embịp miin ebo, ‘Nsoo ido anyịñ amọ?’ Nsoo ke ami ndiibọọrọ ammọ?"

14 Abasi amaabo Moses, "Ami Ndo Se Ami Ndo. Se afo uduudọkkọ nditọ Isrel ado ami: ‘Ami Ndodo andọñ miin inọọ ndufo.’ "

15 Abasi amaanyʌñ abo Moses, "Dọkkọ nditọ Isrel bo, ‘Abọọñ, Abasi mme eteete ndufo, Abasi Ebraham, Abasi Aisik ye Abasi Yekọb, andọñ miin inọọ ndufo.’

"Anyịñ mmi ado ami ke nsi-nsi,

anyịñ se ndufo ediñkoot miin

ke afịd emana.

16 "Kaa, kekoot ñkpisọñ ke Isrel bok itie keed nyʌñ bo ammọ, ‘Abọọñ, Abasi mme eteete ndufo, Abasi Ebraham, Aisik ye Yekọb, amaayaara idem añwọt miin anyʌñ abo: Ami mmikpeme ndufo mmenyʌñ ñkịt se inam ndufo ke Iyib. 17 Ndin ami mmenwọñọ adiben ndufo nsio ke ukuud ke Iyib ñkesịn ke isọñ mbon Kenan, mbon Hed, mbon Amọọ, mbon Peris, mbon Hif ye mbon Yebus, isọñ a-afiọọrọke ye mmọọñeba ye adanakwọọk.’

18 "Mme ñkpisọñ ke Isrel eyaekpañ utọñ unọ fiin. Ndin ana afo ye ñkpisọñ Isrel eka ekebo adidem Iyib, ‘Abọọñ, Abasi nditọ Hibru, amaasoobo ye ñnyịn. Yak ñnyịn inam isañ usen ita ika anaan nọ ikiwa uwa inọ Abọọñ Abasi ñnyịn.’ 19 Ado ami mmediọọñọ ke adidem Iyib idiiyakka ndufo enyọñọ ibọhọke ke akpọsọñ ubọk anyịk anye. 20 Ke ntoro ami ñyaasio ubọk mmi ñnyan ñnyʌñ ñkpọkkọ nditọ Iyib ye afịd utịppeñkpọ se ami ndiinam ke atu ammọ. Ado amaaboiyo, anye ayaayaak ndufo enyọñọ.

21 "Ndin ami ñyaanam mbon Iyib ewọt nditọ Isrel mfọn, mbaak ndufo idinyọñọ ubọk ñkaña. 22 Afịd se ido awonwaan anie adibeeñe mbọhọidʌñ amọ ye awonwaan se idʌñ ke ufọk amọ ñkpọ silfa ye kold ye mme afọñ, se ediisịn nditọ ndufo ideen ye ibaan. Ntom ke ndufo ediibịme inie nditọ Iyib."