1 Akema Abọọñ amaabo Moses ate, "Kaa bịne Fero, sia ami mmesọñ anye esịd ye esịd mme ñkpisọñ amọ, nọ ami nnam mme utom idiọọñọ mmi ke atu ammọ, 2 nọ ndufo ediidọkkọ nditọ ndufo ye nditọnditọ ndufo naña ami ñketʌnọ nditọ Iyib ye naña ami ñkenam mme utom idiọọñọ mmi ke atu ammọ, ñko, nọ ndufo ediọọñọ ke ami ndo Abọọñ." 3 Ndin Moses ye Erọn emaekaa ekebo Fero ete, "Ntom ke Abọọñ, Abasi nditọ Hibru abo: ‘Adiikpeene die mbemiso afo asuuhọ idem mfo ke iso mmi? Yak ikọd mmi eka nọ ammọ ekeñkpono miin. 4 Adieke afo umuuyakka ammọ enyọñọ, ami ñyaaben ñkukuñkpọyọriyọ ndi idịd mfo ñkpọñ. 5 Ammọ eyaefʌk afịd isọñ tutu awo ikịtte ñkaña isọñ aba. Ammọ eyaebiat etək se ikisọsʌhọ unọọ fiin tọọñọ edịmitiad akekweeñe, tutu awuọ afịd eto se ida ke inwañ. 6 Ammọ eyaeyọhọ mme ufọk mfo ye ake mme ñkpisọñ mfo ye ake nditọ Iyib, ñkpọ a-adooho ete ye eka me eteete ndufo kpaanam ikikịtte, tọọñọ ke usen a-ammọ ekedʌkkọ edʌñọ ke isọñ ami tutu mfịn.’ " Ndin Moses amaakanna edem akpọñ Fero.

7 Akema mme ñkpisọñ Fero emaebo anye ete, "Adiikpeene die awo ami adika iso ido ñkpọ iduọ inọọ ñnyịn? Yak ibon ami enyọñọ, nọ ammọ ekekpono Abọọñ Abasi ammọ. Tutu ami afo udiọọñọke ke Iyib adʌk nsobo?"

8 Emaeben Moses ye Erọn etịmme edi iso Fero. Ndin anye amaabo, "Ikaa, ikikpono Abọọñ Abasi ndufo. Ado indọkkọ miin mbon se idiika."

9 Moses amaabọọrọ ate, "Ñnyịn idiika ye iwaad ye mme ñkpisọñ, nditọ ñnyịn ibaan ye ideen, ye udịmedọñ ye udịmenañ ñnyịn, sia ñnyịn inie adinam usọrọ nnọọ Abọọñ."

10 Ndin Fero amaabo, "Abọọñ aba ye ndufo; adieke ami ñyakka ndufo eka, ye ibaan ye nditọ ndufo! Awuọ ndufo emenie idiọọk uduak ke esịd. 11 Iyoo! Yak ideen ikpọọñ eka ekekpono Abọọñ Abasi, sia ami ado se afo asibeeñe." Ndin emaebịne Moses ye Erọn esio ke iso Fero.

12 Akema Abọọñ amaabo Moses ate, "Sio ubọk mfo nyan ke isọñ Iyib yak mme ñkukuñkpọyọriyọ esọiyọ efʌk isọñ enyʌñ esobo afịd ñkpọ inwañ, ye afịd ñkpọ se edịmitiad akebiat asʌhọ."

13 Ndin Moses amaasio esañ amọ anyan ke Iyib, Abọọñ ñko amaanam afịm edem usakkautịn afịme afʌk afịd isọñ Iyib ke afịd uweemeayio ye akonayio. Afịm ado amaakoono mme ñkukuñkpọyọriyọ adi ke usiere usen; 14 ammọ emaetọ edọñọ afịd isọñ Iyib enyʌñ eketekke ekʌbọ ke ekamba udịm kwa ikpeghe ke afịd isọñ Iyib. Utọ akwọkudịm nsobo ñkukuñkpọyọriyọ ado ikibaaha akpa, idiinyʌññọ iba aba. 15 Ammọ emaefʌk afịd isọñ tutu anye adinweenwen. Ammọ emaesobo afịd ñkpọ se ikisʌhọ ke edịmitiad amaakekweeñe, afịd ñkpọ inwañ mme mfịd eto. Ñkpọ ndomokeed se inwịm ke eto me ke mfịd inwañ ikisʌhọke ke isọñ Iyib aba.

16 Ndin Fero amaasọp adọñ ekoot Moses ye Erọn anyʌñ abo ammọ ate, "Ami mmedue Abọọñ Abasi ndufo ñnyʌñ idue ndufo. 17 Idakka innọ ke idiọọkñkpọ mmi akañ keed ami; ñko inyʌñ ikpe Abọọñ Abasi ndufo ubọk nọ aben nsobo ñkpa ami asio añkpọñ miin."

18 Moses amaakpọñ Fero anyʌñ akenam ñkpeubọk anọ Abọọñ. 19 Abọọñ ñko amaanam akpọsọñ ukod afịm edem usobutịn, adikpuut ñkukuñkpọyọriyọ akedọñ ke Ndad-ndad Akpainyañ. Ndomo ñkukuñkpọyọriyọ keed ikisʌhọke ke itie ndomokeed ke isọñ Iyib. 20 Ado Abọọñ amaasọñ Fero esịd, anye inyʌññọ iyak nditọ Isrel enyọñọ.

21 Ndin Abọọñ amaadọkkọ Moses abo, "Sio ubọk mfo nyan ke ikpaanyọñ nọ ekịm afʌk Iyib, ekịm a-anekkeke akịmme." 22 Ndin Moses amaasio ubọk amọ anyan ke ikpaanyọñ, ndin akaakan ekịm amaafʌk afịd isọñ Iyib ke usen ita. 23 Awo ndomokeed ikikanna imọọnọ awo mfen, me adiwuọ nsaña ke usen ita. Kpayeado afịd nditọ Isrel emaekịt unwana ke mme itie a-ammọ ekedʌññọ.

24 Akenam ntoro, Fero amaadọñ ekoot Moses adi, anyʌñ adibo anye ate, "Ikaa, ikikpono Abọọñ. Ikoono ibaan ye nditọ ndufo ikaa; ado iyaak udịmedọñ ye udịmenañ ndufo ibono."

25 Ado Moses amaabo Fero ate, "Ana afo ayaak nọ ñnyịn ikinam uwa ye ufọfọb uwa inọ Abọọñ Abasi ñnyịn. 26 Ufene ñnyịn ñko ana asaña ye ñnyịn; mbai ñkpad ndomokeed inaaha asʌhọ. Ana ñnyịn isio ubaak ammọ ikama ikpono Abọọñ Abasi ñnyịn. Adiido ñnyịn iwọwuọ do ke ñnyịn ididiọọñọ se ñnyịn idiidat ikpono Abọọñ Abasi." 27 Ado Abọọñ amaanam esịd Fero asọñ, anye inyʌññọ inyịmme adiyaak ammọ nọ enyọñọ. 28 Fero amaabo Moses ate, "Kpọñ iso mmi! Kịt bo ke afo udieghe iso mmi aba! Usen a-afo akịtte iso mmi, afo ayaakpa."

29 Moses amaabọọrọ anye ate, "Yak ado kpa naña afo abo, ami nduukịtte fiin iso aba."